![]( https://philippinerevolution.nu/wp-content/uploads/2023/12/20231207.peace-talks.png )
Saritaan iti kappia iti baet ti GRP-NDFP, induron ti baro a nabukel a grupo
Nagurnong idi Hulyo 16 ti sumagmamano a mabigbig nga indibidwal ken lider iti Santo Domingo Church Compound, Quezon City para iti maysa a diskusyon ken tapno mangted ti napigsa a mensahe iti rehimen Marcos kanaig ti saritaan iti kappia. Didiay nga aldaw, binukel da ti Council of Leaders for Peace Initiatives (CLPI) tapno iduron ti saritaan iti kappia iti baet ti Gubyerno ti Republika ti Pilipinas (GRP) ken National Democratic Front of the Philippines (NDFP).
Ti CLPI ket bukbuklen dagiti akademiko, abugado, dagiti dati a dekano, dagiti obispo ken lider ti nadumaduma a simbaan, ken dagiti mabigbig a mangitantandudo ti kappia. Nagpanawagan ti grupo ken Marcos Jr nga agiyebkas ti “nalawag ken sigurado a kalikagum nga iyabante ti natalinaay ken napagkaykaysaan a solusyon iti nabayagen nga agraraira nga armado a risiris” iti Pilipinas. Segun iti grupo, ti nainkalintegan a kappia ket kasapulan para iti nadurdur-as nga estado ti pagilyan.
Tinalmegan ti grupo ti kinaawan dagiti kasaruno nga addang ken aksyon kalpasan ti nairuar nga Oslo Joint Statement ti GRP ken NDFP idi Nobyembre 23, 2023. Daytoy ket deklarasyon ti plano wenno tarigagay a balbaliw a luktan ti saritaan ken buklen ti balangkas nu kasano a maiyaramid daytoy.