![]( https://philippinerevolution.nu/wp-content/uploads/2024/07/20240721.pagbabalik-sa-bagtuan-1024x640.jpg )
Koresponsal Ti panagsubli iti Bagtuan
Iti anag ti tignay panagilinteg nga isaysayangkat ti Partido Komunista ng Pilipinas iti intero a pagilyan, ingga’t kabaelan nga iyab-abante ti amin a rebolusyonaryo a pwersa kadagiti prubinsya ti Southern Tagalog iti nadumaduma nga aspeto dagiti trabaho. Sipipinget nga iyar-aramid dagiti yunit ti New People’s Army (NPA) ti panagsubli kadagiti lugar a nabayagen a napanawan tapno balbaliw a makonsolida ti base a masa ken ad-adda pay a patibkeren dagitoy iti tengnga ti pinainget nga atake ti kabusor.
Maysa ti Bagtuan kadagitoy a lugar. Ti baryo ket nabaknang iti rebolusyonaryo a pakasaritaan isu a maysa daytoy iti nagbalin a pokus a barangay ti National Task Force (NTF)-Elcac. Ti umili iti lugar ket biktima ti aduan nga inkapilitan a panagpasuko, pisikal ken mental a tortyur, panagpangta, panagharas ken intimidasyon. Dandani awan ressat met iti napalabas a lima a tawen ti focused military operations (FMO) ken Retooled Community Support Program Operations (RCSPO) ti berdugo a militar ken pulis tapno dadaelen ti rebolusyonaryo a panagkaykaysa ti masa ditoy.
Nakaplano a maiserrek iti Bagtuan ti sumagmamano a pammarang ken makadadael a proyekto ti panagdur-as karaman ti panagminas iti kabanbantayan. Dadaelen daytoy dagiti uma, kapagayan ken dagiti pagindegan ti masa a naipaima kadakuada gapu iti naballigi nga agraryo a rebolusyon nga inyabante ti masa iti lugar, iti pannakibinnadang ti NPA.
Nupay kasta, saan a nagungon ti masa iti Bagtuan kadagiti panagatake ken pammerperdi dagiti berdugo. Siraragsak a sinabat da ti panagsubli ti yunit ti NPA iti lugar uray nu adda RCSPO a nakaistasyon iti maysa kadagiti komunidad a sakupen daytoy.
Dagus nga inyaramid ti yunit ti NPA ti panangmiting kadagiti kangrunaan a masa iti lugar tapno balbaliw nga urnosen dagiti rebolusyonaryo a trabaho. Babaen ti panagpinget ti masa ken ti yunit, naisayangkat ti serye dagiti panagadal ti Konstitusyon ti Partido, Programa iti Nailian Demokratiko a Rebolusyon ken pablaak ti KTKS iti maika-55 anibersaryo ti Partido. Adu kadagiti dati a pwersa ti sangay ti Partido iti lokalidad (SPL) ti balbaliw a nagsapata iti Partido tapno balbaliw a pasingkedan ti kinapudno da.
“Saan a kabaelan a baliwan ti kabusor ti kinapudno mi iti Partido ken NPA uray pay mano a daras da nga agoperasyon iti lugar tapno butbutngen dakami,” rakurak ni Tatang Ipe, kalihim iti SPL.
Kasta met nga adu a baro a kameng ti napagsapata, pammaneknek a saan a maputputed ti rebolusyonaryo a kaputotan a nagtaud pay kadagiti kaunaan a kameng ti Partido a nangiyuged ken nangirugi ti rebolusyonaryo a tradisyon ken pakasaritaan iti baryo.
“Kas benepisyaryo ti rebolusyon agraryo, ammo mi ti rebbengen mi a tuloy-tuloy nga agtignay iti Partido kas kadakami a natataengan. Nu saan mi nga inaramid daytoy, agawen laeng ti gubyerno ni Marcos ti dagdaga mi,” segun ken Jonas, maysa nga agtutubo a baro a kameng ti Partido.
Gapu ta lalo pay a naawatan ti masa ti nairut a pagkasapulan a balbaliw nga urnosen ti organisasyon ti Partido a mangidadaulo iti tignay masa da, simmaruno nga inyaramid da ti serye ti balbaliw a panangbukel ken panagmiting dagiti sangay ti Partido kadagiti baryo a sakupen ti Bagtuan. Babaen daytoy, binukel da dagiti plano iti sangsangkamaysa a panagdepensa ken panagtignay ti masa iti lugar tapno paayen dagiti atake ti kabusor ken labanan ti aniaman a pammarang ken managdadael a proyekto iti panagdur-as a plano nga iserrek ti NTF-Elcac iti Bagtuan ken ti reaksyunaryo a gubyerno. Binukel da met ti plano iti ammoyo ken panagtitinnulong iti panagmula a napateg iti daytoy a panawen a kangitingitan ti panagmula kadagiti uma ken kadanuman.
Kuna ni Tatang Ipe, “Adda iti ima tayo ti masakbayan tayo. Masalakniban tay laeng ti biag ken pagbiagan tayo nu napigsa ti Partido ken agkaykaysa tayo amin.”
Pammaneknek ti kapadasan ti Bagtuan a saan a pudno ti ipaspasaw ti rehimen US-Marcos ken dagiti pasista a babaunen na a militar ken pulis a sigurado a maibus ita a tawen dagiti rebolusyonaryo a pwersa iti intero a pagilyan. Daytoy ket sibibiag nga ehemplo nga aniaman nga ulpit ti atake ti iyaramid ti kabusor, saan na a maburak ti rebolusyonaryo a panagkaykaysa ti masa ken New People’s Army ken ti proletaryo a Partido a mangidadaulo iti rebolusyon.