Marcos-San Miguel, gipapanubag sa oil spill sa Manila Bay
![](https://philippinerevolution.nu/wp-content/themes/prwc/images/ablogo.png)
![]( https://philippinerevolution.nu/wp-content/uploads/2024/07/manila-bay-oilspill.jpeg )
GIPAPANUBAG SA MGA grupo nga maki-kinaiyahan ang San Miguel Corporation ug ang rehimen ni Marcos sa nahitabong oil spill (miawas nga lana) gikan sa naunlod nga barkong MT Terra Nova sa Manila Bay. Matud nila, angay manubag sila sa kadaut nga dala sa miawas nga lana sa panginabuhi sa komunidad, sistema sa ekolohiya ug kahimsog sa katawhan.
Ang MT Terra Nova mao ang barkong gikontrata sa Petron Corporation, kumpanyang gipanag-iyahan sa San Miguel Corporation, aron maghatod ug 1.4 milyong litro nga pang-industriyang lana sa isla sa Panay. Gitugutan kini nga mobyahe sa Philippine Coast Guard taliwala sa dautang panahon. Miunlod kini pipila ka kilometro gikan sa baybayon sa Limay, Bataan niadtong Hulyo 25 ug nagsugod ang pag-awas sa lana duha ka adlaw human niini.
Ikaduhang dakung oil spill na kini ilalum sa rehimen ni Marcos. Niadtong miaging tuig, miunlod duul sa Lubang, Oriental Mindoro ang MT Princess Empress ug nayabo ang karga niining 800,000 litrong lana nga gikontrata nga ipadeliber sa Petron. Hangtud karon, giantus pa sa halos 25,000 ka mangingisda ang kadaut nga gidala niini sa mga baybayon sa Oriental Mindoro ug kasikbit nga mga prubinsya. Nalambigit usab ang Petron sa oil spill sa Cavite niadtong 2013 (500,000 litro); ug ang pinakagrabe nga oil spill sa Guimaras (2.1 milyong litro) niadtong 2006.
Delikado sa kahimsog sa tawo ang lana nga kasagaran motulo gikan sa mga barko. Naglangkub kini sa mga makadaot nga kemikal sama sa mercury, arsenic ug lead. Kini makahatag og pagpangatol sa panit, iritasyon sa pagginhawa ug kanser. Daku usab ang epekto niini sa kinaiyahan ug kinabuhi sa kadagatan ug baybay. Sa dugay nga panahon, apektado sa maong mga kemikal ang reproduksyon sa mga isda nga magpakita sa pagkunhod sa kuha sa mga mangingisda bisan wala na ang oil spill.
Kung mokaylap og ayo ang nayabong lana sa Manila Bay, maapektuhan ang panginabuhi sa dili moubos sa 29,000 ka mangingisda sa Cavite pa lang. Mahimo usab nga moabot sa ₱351 milyon ang kantidad sa kadaut sa panginabuhian sa 46,000 ka mangingisda sa Central Luzon, Region 4A ug National Capital Region. Gikabalak-ang madaut sa oil spill ang mga bakhawan, seagrass, coral reefs ug mga palaisdaan.