Unum ka mga progresibo ug rebolusyonaryong organisador sa Southern Tagalog ang gidakop sa bag-ong serye sa crackdown sa mga pwersa sa rehimeng Marcos niadtong Oktubre 24 ug 27. Lakip sa mga nadakpan ang usa ka konsultant pangkalinaw sa National Democratic Front of the Philippines (NDFP).

Sa Quezon City, gidakop sa hiniusang pwersa sa 2nd ID ug pulis si Wigberto Villarico, ug kauban niya nga si Marjorie Lizada, sa ilang gipuy-ang balay sa Barangay Fairview, Quezon City niadtong Oktubre 24. Si Villarico usa ka konsultant pangkalinaw sa NDFP sa Southern Tagalog samtang si Lizada iyang istap.

Ang 68 anyos nga si Villarico adunay lain-laing balatian.

Ang pagdakop kaniya supak sa Joint Agreement on Safety and Immunity Guarantees. Siya ang ikatulong konsultant sa NDFP nga gidakop niadtong bulan sa Oktubre. Klaro nga ang pagdakop kanila adunay tumong nga idiskaril ang mga paningkamot nga subling sugdan ang negosasyong pangkalinaw tali sa GRP ug NDFP.

Sa Oriental Mindoro, gidakop niadtong Oktubre 24 ang mga organisador sa mag-uuma nga silang Bong Fran ug Kelvin Joaquin sa Barangay Hagupit, Bongabong. Gidakop sila samtang nagatabang sa mga mag-uumang naapektuhan sa Bagyong Kristine.

Ang duha gidakop base sa mandamyento nga gipagawas sa usa ka korte sa Pinamalayan, Oriental Mindoro sa kasong rebelyon. Gipakita usab sa mga sundalo ug pulis nga nakumpiska gikan kanila ang usa ka .45 kalibreng pistola, eksplusibo, mga gadyet ug dokumento.

Sa Makati City, gidakop sa mga pwersa sa estado ang duha ka organisador sa mga mamumuo niadtong Oktubre 27. Ang duha giila nga silang Gavino Panganiban, upisyal sa kampanya sa Pamantik-KMU, ug si Maritess David gikan sa pederasyong OLALIA-KMU.

Matud sa mga pulis, nag-atubang si Panganiban sa kasong pagpatay ug sulayng pagpatay sa usa ka korte sa Infanta ug Gumaca sa Quezon samtang si David adunay kasong pagsupak sa Comprehensive Law on Firearms and Ammunition sa usa ka korte sa Santa Rosa, Laguna.

Mibarog ang Pamantik-KMU nga ang mga pasangil batok nilang Panganiban ug David hingpit nga walay basehanan ug gihimo lamang aron sumpuon ang mga mamumuo ug ilang pakigbisog.