61ST IB KAG CAFGU NGA GOONS SANG KAPITALISTA, GIN-HARASS SANG NPA

Ang artikulo nga ini may salhin sa Pilipino


Ginpalukpan sang isa ka yunit sang NPA sa idalum sang Napoleon Tumagtang Command ang gintingub nga pwersa sang 61st IBPA kag CAFGU sa sitio Butuan, Igcabugao, igbaras, Iloilo sadtong 3:30 sang hapon, Agosto 29, 2018. Naiguan ang isa ka tropa sang kaaway kag indi hungod nga naiguan ang upod nila nga isa ka sibilyan.

Ang mga armadong tropa sang kaaway ang nagasakay sa isa ka salakyan nga ginapanag-iyahan sang Century Peak, isa ka korporasyon nga ginapanag-iyahan sang intsik nga nagapatukod sang proyektong hydroelectric sa mabukid nga bahin sang Igbaras. sa umpisa pa lang, mabaskog na ang pagpamatuk sang madamo nga mangunguma bangud sa halit nga tuga sini sa ila palangabuhian kag sa kapalibutan. Ang proyekto ang gin-umpisahan pa sadtong 2012 kag halin sadto ang mga tropa sang AFP (82nd IB, 61st IB kag CAFGU) ang ginhimo nga mga bayaran nga goons sang kumpanya batuk sa mga pumuluyo nga nagapamatuk. Ang ini nga proyekto ang nagdingut sang kinahanglanon nga irigasyon sa madamu nga mangunguma sa palay sa idalum nga bahin, kag labi nga nagbutang sa ila daku nga katalagman bangud naplastar ini sa landslide-prone nga lugar.

Bisan pa wala ginhungod, hugot sa tagipusuon nga nagapangayo sang pasaylo ang NPA-Panay sa kay Sheila Mae Estevez kag sa iya pamilya, sa naangkon nya nga pilas. Ginahulat pa namon ang report sang mga kaupod nga nagtigayon sang aksyon angut sa natabu. Maathag sa amon nga hugot nga ginadilian sa NPA ang pagtigayon sang anuman nga aksyon nga direkta nga makahalit sa mga sibilyan. Sa subong, nagapangita pa kami sang pamaagi agud makaabot ang nagakaigo nga bulig para sa pagpabulong kag pagpaayo ni Ms Estevez.

Sa liwat, ginapaabot namon ang paandam sa management sang Century Peak nga untaton ang paggamit sang armadong tropa sang AFP, PNP kag paramilitar agud ipamilit ang isa ka proyekto nga nagaguba sa palangabuhian kag labi nga magbutang sa katalagman sa kabuhi sang mga mangunguma.

Subong man, liwat kami nga nagapanawagan sa tanan nga mamumugon sang kumpanya kag mga sibilyan nga nagapuyo sa katambi nga mga lugar nga likawan nga mag-upod sa mga armadong tropa sa salakyan ukon sa paglakat. Ipakigbato ang tawhanon nga kinamatarung sang sibilyan nga indi maulamid sa inaway.

Bangud ang PNP, AFP kag paramilitar sini ang mga nagapanguna nga instrumento sang nagaharing sahi sa pagpanghimulos kag pagpamigos sa mga pumuluyo, ang mga armadong tropa nga ini ang awtomtiko nga target sang mga taktikal nga opensiba sang NPA. Ang mga tropa sang 61st IB notoryus sa paggamit sang sibilyan bilang panaming batuk sa NPA, kag duguon ang ila mga kamot sang mga sibilyan nga ila ginpamatay kag ginpatupatuan nga nagbatu okun NPA. Bisan diin okun bisan san-o pa man, pagabanatan sang sila sang NPA agud hatagan katarungan ang ila mga nangin biktima.

Julio Montana
Tagpamaba
Coronacion “Waling-waling” Chiva Command
NPA-Panay
31 Agosto 2018

61ST IB KAG CAFGU NGA GOONS SANG KAPITALISTA, GIN-HARASS SANG NPA