KUMARKARO TI PANNAKAILUMLOM ITI RIGAT DAGITI UMILI TI DANDANAC ITI SIDONG TI MILITARISASYON

Pilipino

Iti sidong ti maysa a bulan a panagoperasyon ti militar ken pulis idiay Sityo Dandanac, Brgy. Tamboan, Mt. Province, palalo la unay ti rigat a sasagrapen dagiti umili.

“Mamirmiraut la ngaruden dakami ket pinakaro pay ti nabayag a panagkampo ti militar iti uneg ti ili mi ken ti pananglipit da kadakami,” kuna ni ka Dominic, maysa a lider-mannalon iti Dandanac.

Manipud idi Hulyo 13 inggana iti agdama, agtultuloy dagiti operasyon ti Alpha Coy ti 81st Infantry Battalion ti Philippine Army nga idadauluan ni 1st Lt. Jade Lyzterdan Padinas Gavino, kakuyog ti Regional Public Safety Battalion (RPSB) ti Philippine National Police (PNP).

Nangipaay dagitoy kadagiti patakaran a saanen a maiduma iti martial law, nga isu ti nangpataud iti buteng ken nangpakaro iti krisis iti kabiagan.

Krisis iti kabiagan

“Saan min a masango dagiti talon mi, ket pumaggapasen. Madanaganak nu ania ti pinagbalinan dagiti inmulak ta panagtutudo pay met,” palawag ni Ka Dominic.

Iti Dandanac, kaaduan iti nasurok 80 a kabalayan ket adda ti bassit a talon da, a ti kadawyan a kinalawa ket 1/4 ektarya.

Gagangay a mamindua ti cropping iti uneg ti maysa a tawen; iti panagrugi ti operasyon ti militar ken pulis idi Hulyo ket nairana a panaggagapas ken panangapit iti mani ken mais.

Ti kadawyan nga apit iti 1/4 ektarya a talon ket nasurok lima a kaban ti bagas, wenno 105 salop, a mabaloran iti Php 9,450 ken makonsumo ti pamilya ti lima iti uneg ti 52 nga aldaw.

Ngarud, nu madadael ti 1/3 ti apit gapu iti bagyo wenno peste, ti mabati ket umanay laeng para iti 35 nga aldaw.

Gapu ta agkurkurang ti apit, kasapulan pay ti umili a makidawat ken makipordia para iti panagsupusop iti kabiagan.

Ti kadawyan a sueldo iti pannakipordia ket Php 150, isu a dakkel met laeng ti maikissay iti makabulan a pastrek ti pamilya ita nga inparit ti militar ti panangaway malaksid kadagiti adda awit da a sedula.

Ti nasurok Php 750 a pastrek iti makalawas a pannakipordia ket kagudua laeng ti daily cost of living ti maysa a pamilya.

“Agingga’t agtaltalinaed ti militar ditoy ili mi ket kumaro a kumaro ti pannakailumlom mi iti rigat,” gibus ni Ka Dominic.

Panaglabsing iti karbengan-tao

Innayunan ti 81st IB ti attidog a listaan ti panaglabsing da iti karbengan-tao dagiti umili ti Cordillera ken Ilocos.

Malaksid iti panangmula iti buteng ken panangburak iti nainsigudan nga urnos ti umili, ti panagkampo iti uneg ti ili ket pananglabsing met laeng iti Comprehensive Agreement on the Respect for Human Rights and International Humanitarian Law (CARHRIHL).

Agsinsinumbangir dagiti kaso ti harassment, pammutbuteng, ken panangliplipit kadagiti umili ken lider-mannalon a kas ken ni Ka Dominic.

Ipatpatungpal da dagiti pasista a patakaran kas iti curfew, panangiparit nga umaway ti umili, ken panangrikisa kadagit balay, kalapaw, ken agamang, uray nu awan ti warrant. Binirngasan ti 81st IB a terorista ken indarum pay da Edmund ken Saturnino Laus Dazon, agkabsat a mannalon iti Dandanac.

Iti sango ti nagsarsaruno a pannakaabak ti 81st IB ken PNP iti ima dagiti Nalabbaga a mannakigubat ti New People’s Army (NPA), sigurado a mapaay da iti bulag a panangipatungpal da ti ti diktar ti rehimen a US-Duterte a buraken ti rebolusyonaryo a tignayan.

Makidangadang!

Kunkundenaren ti Cordillera People’s Democratic Front (CPDF) ken ti amin a rebolusyunaryo a pwersa ti Mt. Province ti panagoperasyon ken pananglabsing iti karbengan-tao dagiti tropa ti 81st IB ken dadduma pay nga armado a pwersa ti reaksyunaryo nga Estado.

Makitkita tayo a ti panggep ti panagpugsat ni Duterte iti tongtongan kappia iti baet ti gubyerno ken ti National Democratic Front of the Philippines (NDFP) ket ti batang na para iti panangpairteng dagiti tropa ti Armed Forces of the Philippines (AFP) iti panagooperasyon da.

Iti sango ti kumarkaro a krisis pangekonomya, pairirtengen latta ti rehimen ni Duterte ti all-out war na kontra iti umili tapno agtalinaed iti turay ken agtultuloy a makaawat iti suporta kadagiti gaygayyemen na nga imperyalista, lokal a kapitalista ken appo’t daga.

Kas iti dadduma a paset ti Cordillera, naimbannuaran ti pakasaritaan dagiti umili ti Dandanac iti pannakidangadang para iti biag, daga, kinabaknang, ken karbengan iti bukod a pangngeddeng.

Ngarud, idurduron ti kinarigat ti biag, ti kinaranggas ti Estado, ken ti kinabulok ti sistema dagiti umili nga agkaykaysa ken lumaban para iti pudno a hustisya ken kappia.

Kakailian, paksyaten ti 81st IB!
Labanan ti militarisasyon iti Cordillera!
Paayen ti all-out war ni Duterte!
Ipagballigi ti demokratiko a rebolusyon ti umili!
Agbiag ti lumablaban nga umili a Pilipino!

CORDILLERA PEOPLE’S DEMOCRATIC FRONT
C P D F – Mountain Province
PABLAAK TI CORDILLERA PEOPLE’S DEMOCRATIC FRONT – MOUNTAIN PROVINCE
Agosto 22, 2018

KUMARKARO TI PANNAKAILUMLOM ITI RIGAT DAGITI UMILI TI DANDANAC ITI SIDONG TI MILITARISASYON