Indi malipatan sang mga pumuluyo kag sang bilog nga rebolusyonaryo nga pwersa sa sur sang Negros ang ika-tatlo nga tuig sang pagkamartir sang apat ka mga kadre kag Pulang hangaway sadtong ika-14 sang Septyembre tuig 2021, sa isa ka engkwentro sa tunga sang Armando Sumayang Jr Command-New People’s Army (ASJC-NPA) kag sang mga berdugo nga tropa sang 6th Special Action Battalion sa Sityo Balik-balik, Barangay Tabu, Ilog, Negros Occidental. Ang pagdumdum naton sang ila pagkabaganihan magaserbe nga panawagan sa pagpabaskog sang aton rebolusyonaryo nga katungdanan.

Si Jeren “Ka Alvin” Vargas naghalin sa isa ka rebolusyonaryo nga pamilya. Sang nakatapos sang hayskul, nagdesisyon siya nga magpultaym sa NPA. Nangin myembro siya sa Komite sang Larangan (KL) kag nag-akto nga Commanding Officer sang Larangan.

Naghalin sa sahing petiburgesya si Cheene “Ka Nikki” Dacalos. Anay estudyante sang BS Mathematics sa UP-Cebu nagpatapo siya sa NPA sang nag-edad sang 20 anyos. Pareho ni Ka Alvin, katapo si Ka Nikki sa Komite sang Larangan kag nag-akto nga Political Instructor sang platun.

Si Alfredo “Ka Bobong” Sinsano, nabun-ag sa isa ka pamilya nga mangunguma. Bangud nakita niya ang pagpanghimulos sang sahing agalon mayduta, burgesya komprador kag sang burukrata kapitalista, wala sang iban nga banas sa ila kahilwayan kundi ang armado nga paghimakas. Katapo man sa Komite sang Larangan si Ka Bobong.

Si Jonard “Ka Jorge” Alvior, naghalin sa sahing mangunguma, bug-os tagipusuon siya nga naghimakas agud maangkon ang duta para sa mga mangunguma. Wala sang pag-alang-alang niya nga ginatungdan ang iya mga tahas kag mapinalanggaon sa masa kag kaupod.

Nagkalain-lain man ang ila ginhalinan apang sila nagkahiliusa sa isa ka katuyuan nga hilwayon ang pumuluyo sa tumandok nga pyudalismo, burukrata kapitalismo kag imperyalismo.

Nagapabilin nga determinado kag puno sang kapagsik ang ASJC-NPA nga magpalapad, magpabaskug kag itib-ong sa mastaas nga halintang ang armado nga paghimakas, agraryo nga rebolusyon, kag ang nagalapad kag nagadalum nga baseng masa. Ang banas nga ginlat-as nila ni Ka Alvin, Ka Nikki, Ka Jorge kag Ka Bobong angay nga sundon kag dako nga inspirasyon sa mga Pulang hangaway, pamatan-on, kababaenhan, kag sang bilog nga pumuluyo nga mag-uyat sang armas kag ipadayon ang ila legasiya. Pat-od nga wala sang kamatayon ang rebolusyon kon mapatay ang isa ka rebolusyonaryo. Gani, mas nagadamo ang nagahandom nga ipadayon kag labi nga pabaskugon ang armado nga paghimakas agud mahatagan sang hustisya ang ila kamatayon kag lubos nga maangkon ang matuod nga kahilwayan kag demokrasya.

Mabuhi ang mga martir sa rebolusyon!