Wala gid sang malauman ang sahing anakbalhas sa ginpatigayon nga ikatatlo nga State of the Nation Address (SONA) ni Marcos Jr sadtong Hulyo 22. Lunsay pamulitika kag ‘singgit sa bulan’ ang unod sini nga nagaserbi sa ekonomiko kag pulitikal nga kagustuhan kag interes sang mga dalagkung agalon may duta, lokal nga burgesya kumprador kag mga kapitalista nga ara sa gahum.

Sa agrikultura, ginpadayaw ni Marcos Jr ang iya pagpanagtag sang mga titulo sang duta sa mga mangunguma apang ang matuod, mas gin-abri pa sang iya rehimen paagi sa Department of Agrarian Reform (DAR)ang pagpang-agaw sang kadutaan sa mga benepisyaryo para sa eko-turismo, mina, plantasyon kag iban pa nga maki-dumuluong nga mga proyekto sa idalum sang neoliberal nga mga polisiya sa dikta sang imperyalistang US paagi sa iya ginatikal nga programa sa repormang agraryo nga Support to Parcelization of Land for Individual Titling (SPLIT) kag New Agrarian Emancipation Act (NAEA).

Ini nga iskema ang madata sa isla sang Negros ilabe na gid sa Central Negros. Patalang nga ginaganyat sang local goverment unit (LGU), DAR, Department of Agriculture (DA) kag mga bag-o nga agalon mayduta ang mga mangunguma nga mga beneisyaryo sa pagpaidalum sa SPLIT nga programa. Nagtuga ini sang kinagamo kag pagwasak sang paghilius asa tunga sang mga benepisyaryo.

Sa sunud-sunod nga mga kalamidad nga naaguman sang mga pumuluyo, puro band-aid solution kag mga pasalig ang ginhambal ni Marcos Jr. Sa Central Negros, indi ang tanan nga mangunguma ang nakadawat sang ayuda para sa nag-agi nga kalamidad sang El Niño kag kadam-an sa ila ang nagareklamo bangud wala nakabaton sang ayuda halin sa reaksyonaryo nga gobyerno. Subongman, nagapabilin sa mga evacuation centers sa La Castellana ang kadam-an nga apektado sang paglupok sang bulkan Kanlaon nga wala na sang nagaabot nga suporta gikan sa lokal nga gobyerno. Samtang, ginapunggan sila sa pagbalik sa pagtalauma bangud sa posible pa nga paglupok sang bulkan.

Ginbalewala sang rehimen US-Marcos II ang hubon sang kusog-pangabudlay sa pihak sang implasyon. Wala ginhambal sa iya SONA ang pagpasaka sa sweldo sang mga mamumugon agud pangibabawan ang tuman nga kapigaduhon, kawad-on sang trabaho kag iskema sang kontraktwalisasyon. Halos indi na makakaon sa tatlo ka beses sa isa ka adlaw ang mga mamumugon sa kampo sa Central Negros nga nahigot sa sweldohanay nga P150-200 ang adlaw sa pihak sang pagmahal sang mga balaklon. Dugang pa, ang kadam-an sa ila ang wala man sang trabaho kag kita sa karon nga tiempos-muertos ukon tig-gutom. Madamo sa ila kabataan ang wala makapadayon sa ila pagtuon bunga man sang mataas kag madamo nga balayran sa eskwelahan.

Wala man nalakip sa SONA ni Marcos Jr ang makatarunganon kag malawigon nga kalinong sa pungsod. Ginalikaw sini ang paghimo sang kongkreto nga solusyon sa nagaluntad nga gyera-sibil sa pungsod. Nagapadayon ang militarisasyon sa kaumhan nga nagresulta sang madamuan nga pagpanglapas sa tawhanon nga kinamatarung sang Armed Forces of the Philippines (AFP) kag Philipine National Police (PNP). Ginpasiguro man sang militar ang mga proyekto kag imprastruktura sang mga nagahari nga sahi kaangay sang mga plantasyon sang mga pagng-eksport nga pananom, farm to market roads kag iban pa.

Gingamit man ni Marcos Jr ang SONA para sa pag-atake sa iya pareho man nga inutil, papet kag pasista nga si Duterte. Ang gilayon nga pagpa-untat ni Marcos Jr sang POGO, ang nagadis-og sa China kag nagahublas sa kasumpong sa pulitika nga blokeng-Duterte. Samtang ang ginhambal ni Marcos Jr kaangot sa “aton ang West Philippine Sea,” wala naman sang ispesipiko, estratehiko kag nagakaigo nga mga tikang sa pagsolbar. Ini ang matuod nga laragway sang inutil, pasista kag papet sa imperyalistang US nga kinaiya sang rehimen Marcos II nga magabutang sa katalagman sang pumuluyong Pilipino.

Sa pangkabilogan, indi mabatian sa apat ka pamusod sang Kongreso kag iban pa nga ahensya sang gobyerno ang kongkreto nga sabat sa matuod nga ugat sang pag-antus sa kaimulon sang pumuluyong Pilipino. Maangkon lamang ang matuod nga reporma sa duta kag pungsodnon nga indutriyalisasyon paagi sa pagtib-ong kag pag-usoy sa banas sang armadong paghimakas, dira sa dugang nga pagtukod kag pagpalig-on sang mga organo sang gahum pampulitika sa balayon sang demokratiko nga rebolusyon sang banwa paagi sa pangmalawigon nga inaway banwa.##