[PRWC Party Documents] Stand For Socialism Against Modern Revisionism, January 15, 1992

MANINDUGAN SA SOSYALISMO BATUK SA MODERNO NGA REBISYUNISMO

I. Ang Marxista-Leninista nga Panindugan sang Partido Batuk nga Rebisyunismo

Read in English Basahin sa Pilipino

Armando Liwanag, Tagapangulo, Partido Komunista sang Pilipinas

Enero 15, 1992

Ang mga proletaryado nga rebolusyonaryong kadre sang Partido nga padayon nagasunod sa Marxista-Leninista nga panindugan batuk sa moderno nga rebisyunismo kag duot nga nagasunod sa mga debelopment sa Unyon Sobyet kag Nasidlangan nga Europa umpisa sang damlag sang 1960 wala nakibot sa nagabalingaso nga anti-sosyalista kag anti-demokratiko nga bunga sang moderno nga rebisyunismo.

Ang Partido indi dapat malipat nga ang iya mga tagpundar nga proletaryado nga rebolusyonaryong kadre nakatrabaho upod sa mga nabilin sang daan nga gintingub nga mga Komunista kag Sosyalista nga partido sugod sang damlag sang 1963 basta may ara komon nga kasugtanan sa pagbuhi sang anti-imperyalista kag anti-pyudal nga pangmasang paghimakas nga magakahulugan sang pagbuhi sang bag-o nga demokratikong rebolusyon paagi sa rebolusyonaryo nga armadong paghi-makas kag ang daan nga gintingub nga Partido magasunod sa rebolusyonaryo nga esensya sang Marxismo-Leninismo kag sikwayon ang Krushchovista nga rebisyunistang linya sang burges nga populismo kag pasipismo kag ang kasunod nga Krushchovismo nga wala si Krushchov ukon ang Brezhnev nga rehimen.

Gani, sang Abril 1967 sang ang rebisyunistang traidor nga Lava naglapas sa komon nga kasugtanan kag wala magsapak sa Komite nga Manugpatuman nga ginporma sang 1963, nangin kinahanglanon ang paghanda sa pagtukod liwat sang Partido bilang isa ka proletaryado nga rebolusyonaryong Partido. Kada isa makalantaw sa lubos magkabaliskad nga proklamasyon sang mga proletaryado nga rebolusyonaryo kag mga rebisyunistang traidor nga Lava nga ginpalapnag sa Pilipinas kag nabalhag sa natungdan nga Peking (Beijing) Review kag sa Prague Information Bulletin sa sulod sang una nga simana sang Mayo 1967.

Ang pagtukod liwat sang Partido sa teoritikal nga pundasyon sang Marxismo-Leninismo sang Disyembre 26, 1968 nagakahulugan sang pagsaway kag pagsikway sang tanan nga suhetibista kag oportunista nga kasaypanan sang rebisyunistang hubon Lava kag sang moderno nga rebisyunismo nga ginapraktika kag ginapalapnag sining hubon sa lokal kag sa nagabinulos-bulos nga paghari sang hubon Sobyet sa internasyunal nga sakup.

Ang pagsaway kag pagsikway sang moderno nga rebisyunismo mga pundamental nga sangkap sang liwat nga pag-establisar kag liwat nga pagtukod sang Partido kag nasulat sa basehan nga dokumento sang pagpanadlong, "Tadlungon ang mga Kasaypanan kag Tukuron Liwat ang Partido" kag sa Programa kag Konstitusyon sang Partido. Ining mga dokumento nagapabilin nga balido kag epektibo. Wala sang nagapamuno nga organo sang Partido Komunista sang Pilipinas ang may otoridad kag rason nga baliskaron ukon indi pagbatunon ang pagsaway kag pagsikway sang moderno nga rebisyunismo sang Kongreso sang Liwat nga Pagtukod sang Partido sang 1968.

Sa hingapusan sang dekada 1970, ang Partido nagdesisyon sa pagpalapad sang mga internasyunal nga relasyon sang rebolusyonaryong kahublagan dugang pa sa mga relasyon sang Partido upod sa mga Marxista-Leninista nga partido kag organisasyon sa luwas. Ang internasyunal nga representante sang Pungsodnon nga Demokratikong Prente (NDF) nag-umpisa sa pagtuon sang posibibilidad para sa NDF sa pag-akto katulad sang Palestine Liberation Organization, African National Congress kag iban pa nga pungsodnon nga hublag pangkahilwayan sa pagpalapad sang mga mainabyanon kag diplomatikong relasyon sa tanan nga pwersa sa abrod nga handa maghatag moral kag materyal nga suporta sa rebolusyonaryong kahublagan nga Pilipino sa ano man nga mayor nga isyu kag sa ano man nga malab-utan. Ini nga linya sa mga eksternal nga relasyon santo man sa Marxista-Leninista nga panindugan sang Partido kag sa internayunal nga nagahiliugyong prente batuk sa imperyalismo.

Sang 1983, isa ka depinido nga proposal ang ginpagwa nga ang NDF ukon ang ano man nga organisasyon nga katapu sini mapagros nga magpangita sang mga mainabyanon nga relasyon sa mga nagahari nga Partido sa Unyon Sobyet kag Nasidlangan nga Europa kag amo man sa mga partido kag mga kahublagan nga may malapit nga angut sa CPSU. Ugaling, ining panugyan ginpahigad pabor sa kontra-proposal sang international liaison department (ILD) sang Komite Sentral sang Partido nga ang Partido kag indi ang NDF ang magtuon kag magpangita sang mga "fraternal" nga relasyon sa mga nagaharing partido sa Unyon Sobyet kag Nasidlangan nga Europa kag iban nga kaangut nga Partido.