[PRWC Party Documents] Stand For Socialism Against Modern Revisionism, January 15, 1992

Manindugan Para sa Sosyalismo Batuk sa Modernong Rebisyunismo

III. Ang Proseso sang Kapitalista nga Pagpanumbalik

Ang Komonwelt sang mga Independyente nga Estado

Read in English Basahin sa Pilpino

Armando Liwanag, Tagapangulo, Partido Komunista ng Pilipinas

Enero 15, 1992

Ang Komonwelt sang mga Independyente nga Estado (Commonwealth of Independent States ukon CIS) nga amo ang nagbaylo sa Unyon Sobyet ginadominahan sang Rusya, nga nagawagayway sang daan nga bandera sang Dungganong Ruso nga sobinismo, kag nagabatyag sang malala nga mga kontradiksyon sa tunga sang Rusya kag sa iban nga republika, sa kubay sang mga republika nga may mga komon nga dulunan, sa tunga sang mga sakop sang Rusya kag mga lokal nga nasyunalidad sa indi Ruso nga republika kag sa kubay sang nagalain-lain nga nasyunalidad sa sulod sang mga republika.

Ang mga kontradiksyon nagaimbolber sang mga isyu pulitikal, ekonomiko, pinansyal, seguridad, etniko kag dulunan. May pulitikal sa bilog nga ginatawag nga komowelt. Seryuso ang nagaluntad nga di-paghangpanay sa tunga sang Rusya kag Ukraine angut sa isyu pang-ekonomya kag pinansyal kag sa kwestyon sang pagtunga sang Sobyet nga hangaway, navy kag air force, sa pagkapot sang mga armas nukleyar kag mga isyu sang dulunan sang mga lupa kag kadagatan. May ara nga mga kahublagan independensya sa kubay sang mga minoridad nga nasyunalidad sa Rusya kag mga gyera sibil sa Georgia kag sa tunga sang Armenia kag Azerbaijan.

Ang ekonomiko nga kinagamo ginpalala pa sang pagliberalisa sa mga presyo sang Enero 2. Ang mga presyo sang mga basehan nga kulunsumuhon nagdugang sang sobra sa baynte ka beses. Ang mga balaligyaan pang-estado nagakahubsan paagi sa tago nga baligyaanay sa hilway nga merkado. Bisan ang bulig nga pagkaon halin sa luwas nagaawas pakadto sa hilway nga merkado. Masobra katunga sang populasyon nahulog manubo pa sa linya sang kaimulon kag ara sa katalagman sang gutom. Nubenta porsyento sang populasyon ang ginalauman mahulog sa linya sang kaimulon. Sa idalom sang sini nga mga sirkumstansya, magakatabo ang mga demonstrasyon sa dalanon kag mga welga sang mga mamumugon batuk sa mga hayagan nga kapitalistang rehimen. Ang mga unyon sang mga mamumugon ginapukaw sang tuman na ka mapiguson kag mapanghimulos nga mga kondisyon kag nagsugod na paglunsar sang mga pangkabilugan nga welga sa malapad nga sakup. Ang Unity for Leninism and Communist Ideals, ang United Front of the Working People, ang Russian Workers' Communist Party kag ang Communist Party of Bolsheviks in Leningrad (St. Petersburg) amo ang labing militante sa paghiwat sang mga aksyong masa batuk sa Ruso nga rehimeng burges ni Yeltsin.

Sa Unyon Sobyet, masobra sa 90 porsyento sang mga mayor nga industriya ang ginapanag-iyahan sa gihapon sang estado. Amo man sini sa kaso sa mga pungsod sang Nasidlangan nga Europa, magluwas sa Poland nga madasig ang pribatisasyon kag ang mga empresa nga ginapanag-iyahan sang estado 65 porsyento sa gihapon, suno sa isa ka report. Ining nagapadayon nga pagdominar sang mga empresa nga ginapang-iyahan sang estado wala nagakahulugan sang sosyalismo. Sa malawig na nga panahon, madamo sa mga empresa nga ini ang nag-angkon sang kapitalista nga kinaiya samtang napaidalom sila sa kontrol kag nangin mga instrumento sang mga burukrata kapitalista kag mga pribado nga entreprenyur wala sapayan nga ini ginapanag-iyahan gihapon sang estado. Napahinay ang pribatisasyon sang sining mga empresa pang-estado sang kakulangan sang tunay nga pribado nga kapital, ang pagkaladula sang mga sinuptan sa kubay sang mga pumuluyo kag ang kakulang sang dumuluong nga interes nga mag-angkon sang mga daan nga planta kag sa mga bag-o nga pamuhunan.

Ang sadto anay komunistang burges kag dumuluong nga tagapamuhunan ang labing interesado sa pag-angkon sa pinakanubo nga presyo sang mga propyedad pang-estado nga nag-ani sang madasig kag daku nga ganar. Indi episyente kag nagakapudpod nga mga empesa pang-estado ang ginamentinar bangud lang nga ini kinahanglanon sosyal kag padayon nga galatasan sang mga pribado nga entreprenyur (halimbawa, asero kag iban nga metal, enerhiya kag iban nga hilaw nga materyales, transportasyon, kag iban pa). Ang pagsirado kag pagbuhin sang produksyon madasig nga nagapadayon. Sa proseso, minilyon nga mamumugon ang ginpahalin sa trabaho. Ara ang proseso sang de-industriyalisasyon nga nagahaboy pabalik sa Unyon Sobyet ukon mga republika sang ginatawag nga CIS kag Nasidlangan nga Europa sa kamunoy sang ikatlong kalibutan kag kapitalismo.

Isa ka mabaskog nga pulitikal kag pang-ekonomya nga sentro ang kulang sa CIS. Apang may yara nga mabaskog nga sentro militar bangud nagapabilin ang sentral nga kumand sang may armado nga pwersang Sobyet. Bisan ang mga lider sang kapitalista nga pungsod nga nagakabalaka bahin sa nukleyar kag iban nga estratehikong armas nagainsister nga ipadalom ini sa isa ka kumand militar. Ugaling, ang pulitikal kag pang-ekonomya nga kinagamu ang magaduso sa opisyales militar nga ibutang ini sa ila mga kamot samtang ang opisyales kag tinawo militar kag ang malapad nga masa sang pumuluyo labing disgustado na.

Isa gihapon ka palamangkutanon para sa guwa nga mga taga-obserbar kon bala ang natabo nga pag-alsa sosyal sa tradisyon sang mga Bolsheviks (ang opisyales kag tinawo militar nagapakig-angut sa organisasyon sang mga mamumugon) ukon isa ka kudeta agud tukuron ang pasismo militar sa bilog nga sakop sang ginatawag nga komonwelt ukon sa isa ka serye sang mga republika (pareho sa Gergia). Ang nagaluntad nga panan-awan amo nga ang bag-ong burgesya sa sulod kag sa guwa sang armado nga pwersa labing poderuso nga sa subong mahimo nga ang pasismo militar makaluntad nga mas daku sangsa pagbalik sa sosyalista nga dalan kon may bag-ong debelopment gid man nga matabo