[PRWC Party Documents] Stand For Socialism Against Modern Revisionism, Enero 15, 1992

MANINDUGAN SA SOSYALISMO BATUK SA MODERNO NGA REBISYUNISMO

III. Ang Proseso sang Kapitalista nga Pagpanumbalik

Una nga Halintang: Ang Rehimeng Khrushchov, 1953-64

Read in English Basahin sa Pilipino

Armando Liwanag, Tagapangulo, Partido Komunista sang Pilipinas

Enero 15, 1992

Sa kay Khrushchov makadto ang marka bilang tagpanguna sang moderno nga rebisyunismo sa Unyon Sobyet, ang una nga sosyalista nga pungsod sa kasaysayan sang katawhan, kag bilang pinaka-impluwensyado sa pagsakdag sang moderno nga rebisyunismo sa kalibutanon nga sakop.

Ang karera ni Khrushchov bilang isa ka rebisyunista nga ara sa poder nag-umpisa sang 1953. Isa siya ka burukratiko nga sipsip kag isa ka aktibo nga tagpatuman sa mga mapiguson nga aksyon durante sa panahon ni Stalin. Agud mangin una nga sekretaryo sang CPSU kag magtipon sang gahum sa iya kamot, ginpahampang-hampang niya ang sumulunod ni Stalin batuk sa isa kag isa kag nagmadinalag-on sa pagpatay kay Beria pagkatapos sang isa ka madasig nga bista. Gindepensahan niya ang bag-ong burgesya nga nagtuhaw halin sa burukrasya kag sa bag-o nga intelihensya.

Sang 1954, ginreorganisa na niya ang CPSU sa pagserbi sa pang-ideolohiya kag pangpulitika nga pusisyon. Sang 1955, iya ginsakdag si Tito nga batuk sa handumanan ni Stalin, ilabi na sa isyu sang rebisyunismo. Sang 1956, ginpahayag niya sa ika-20 nga Kongreso sang Partido ang "likum" nga pamulong-pulong batuk kay Stalin, nga lubos nagnegar sa iya bilang uhaw-sa-dugo nga sapat kag ginpakamalaut ang iya "personal nga kulto". Sang 1957, gin-gamit niya ang armadong kusog agud lutuson ang boto para sa pagpahalin sa iya sang Politburo kag diri naghimo sang kudeta agud makonsolida ang iya pusisyon.

Sang 1956, ang mga anti-Stalin nga pagpakamalaut nag-inspirar sa mga anti-komunista nga pwersa sa Poland kag Hungary agud maglunsar sang mga pag-alsa. Ang pag-alsa sa Hungary mas mabaskog kag mas bayolente. Nagmando si Khrushchov sa hangaway Sobyet nga tapnaon ini, pangunahon sa basehan nga ang liderato sang Partido sa Hungary tuyo nga mangin-padlos sa pangpulitika kag pangmilitar nga relasyon sa Unyon Sobyet.

Apang sang ulihi, sa bug-os nga Nasidlangan nga Europa nga sa idalom sang impluwensya sang Unyon Sobyet, nangin maathag nga wala sang kaso para sa nagaharing hubon Sobyet kon ining mga satelayt nga rehimen mag-adoptar sang mga oryentado nga reporma nga kapitalista (pribado nga empresa sa agrikultura, handicraft kag mga serbisyo, pagbungkag sang kolektibo nga pagpanguma bisan pa nga ginapatuman ang reporma sa duta sa gamay nga sakop kag, ang hilway nga baligyaanay) pareho sa Yugoslavia santo sa anti-Stalin nga linya. Ugaling, ang mga rebisyunista nga rehimen, ara sa istrikto nga mga mandu nga magpabilin sa Council of Mutual Economic Assistance (CMEA) kag Warsaw Pact.

Ang lubos nga pagnegar kay Stalin ni Khrushchov ginpresentar bilang isa ka pagpanadlong sa personal nga kulto, burukratismo kag terorismo; kag bilang una nga rekisito sa pagpabukad sang demokrasya kag sibilidad, madasig nga pag-uswag pang-ekonomya nga nagabalay sang materyal kag teknolohikal nga pundasyon sang komunismo sa baynte anyos, ang malinong nga porma sang sosyal nga rebolusyon halin sa isa ka mapanghimulos nga sistema pakadto sa isa ka indi mapanghimulos, makiglinong sa Estados Unidos, hulu-halintang nga pagbungkag nukleyar kag katawhayan pangkalibutanon, isa ka kalibutan nga wala sang mga gyera kag armas.

Tubtub sa bibig lang ang pag-alagad ni Khrushchov sa diktadurya sang proletaryado kag sa mga basehan nga prinsipyo sang sosyalistang rebolusyon kag konstruksyon kay sa amo tion gin-introdusar niya ang mga idea sa pagpahuyang sini. Gin-gamit niya ang burges nga populismo, gindeklarar nga ang CPSU isa ka Partido sang bug-os nga pumuluyo kag ang estadong Sobyet estado sang tanan nga pumuluyo sa basehan nga mga anti-Marxista nga buluhaton sang diktadurya sang proletaryado nahim-os na. Gin-gamit niya ang burges nga pasipismo, gindeklarar nga posible kag nagakaangay para sa katawhan nga magpili para sa matawhay nga transisyon pakadto sa sosyalismo kag matawhay nga pagpakig-kumpitensya sa ekonomya upod sa mga kapitalistang kusog agud malikawan ang nukleyar nga pagkapapas sang katawhan; malinong nga pagpangabuhi halin sa lebel sang diplomatiko nga polisiya pakadto sa pangkabilugang linya nga nagagahum sa tanan nga klase sang mga panggwa nga relasyon sang Unyon Sobyet kag sang CPSU; kag ang indi pagkilala sa bayolente nga kinaiya sang imperyalismo.

Sa pang-ekonomya nga patag, gin-gamit niya ang ngalan ni Lenin batuk kay Lenin kag Stalin paagi sa pag-misrepresentar kay Lenin nga New Economic Policy bilang dalan pakadto sa sosyalismo imbes isa ka transisyunal nga mga tikang pakadto sa sosyalistang konstruksyon. Ginpatuman niya ang desentralisasyon sa pila ka degri, ginhatagan sang awtonomya ang mga empresa pang-estado kag nangin bahala sa ila kaugalingon nga pagkwenta sang bili kag mga ganansya kag pagpasaka sweldo kag mga bunos sa basehan sang mga ganansya sang mga indibidwal nga empresa. Ang mga pribado nga talamnan ginpadaku kag ang mga malapad nga areya sang duta (halin 50 asta 100 ektarya) ginpaarkilahan sa mga grupo, masami sa mga panimalay. Madamo sang mga istasyon sang traktora para sa mga kolektibo nga palangumhan ang ginpangbungkag kag ang mga makina pang-agrikultura ginhatag sa mga pribado nga entreprenyur. Ginsakdag ang hilway nga baligyaanay sa mga agrikultura kag industriyal nga mga produkto kag mga serbisyo.

Sa amo man nga pamaagi nga ang rebisyunista nga pinamulong ni Khrushchov nagsampaw sa Marxista-Leninista nga terminolohiya, ang nagsampaw sa kapitalista nga pagpanumbalik. Ang sosyalista nga sistema sa produksyon kag distribusyon sa gihapon dominante sa isa ka panahon. Gani, ang ekonomya nga Sobyet sa idalom ni Khrushchov nagarehistro sa gihapon sang mataas nga tantos sang pagtin-ad. Pero ang rehimen labing nagpabugal sa mas mataas nga tantos sang pag-uswag sa pribado nga sektor.

Sa paghatag awtonomya sa mga empresa pang-estado, nag-angkon ang mga manedyer sang gahum sa pag-empleyo kag pagpahalin sang mga mamumugon, magtransaksyon sang negosyo sa sulod sang Unyon Sobyet kag sa luwas; magpataas sang ila kaugalingon nga sweldo, mga bunos kag iban nga pribilehiyo sa kapyerdihan sang mga mamumugon, pagbuhin sang mga pundo para sa pagpatin-ad sa iban nga bahin sang ekonomya; kag sa pag-entra sa burukratiko nga kurapsyon sa pagdala sa hilway nga baligyaanay.

Angut sa pribado nga agrikultura, matunog ang pagpabugal nga mas produktibo ini sangsa estado kag mga kolektibo nga pagpanguma. Ginakalipay ang liwat nga pagtuhaw sang mga manggaranon nga mangunguma. Apang sa kamatuoran, ang garuk nga mga burukrata kag mga pribado nga mangunguma kag mga komersyante amo ang nagahimbunanay sa pagpanubo kag pagpangawat sang mga produkto (paagi sa pagpalapaw kag binulto-bulto nga deklarasyon bilang depektuso nga produkto) sang mga kolektibo kag pang-estado nga panguma agud palutson ini sa hilway nga balaligyaan. Sa katapusan, ang Unyon Sobyet nag-antus sa madalom nga pagnubo sa agrikultural nga produksyon kag nagbakal sang daku bulto sang lamigas.

Ang pang-edukasyon nga sistema nagpadayon sa paglapad, nagpatuhaw sang dalagku nga numero sang mga bag-o nga intelihensya nga impluwensyado na sang mga idea sang moderno nga rebisyunismo kag nagalantaw sa Nakatundan bilang mga modelo sang episyente nga pagdumala kag para sa kalidad sang mga produkto. Sa arte kag literatura, ginpakanubo ang sosyal-realismo kag ang unibersal nga humanismo, pasipismo kag mistisismo nagtuhaw bilang moda.

Ang rehimen ni Khrushchov nag-angkon sang prestihiyo halin sa mga pag-abanse sa syensya kag teknolohiyang Sobyet sa kahawaan kag halin sa nagapadayon nga sosyalistang konstruksyon. Ini tanan wala natabo kon wala ang nauna nga mga trabaho sa idalom sang pagpamuno ni Stalin. Ginpatuman ni Khrushchov ang madasigan nga pag-obra sang mga balay kag opisina nga ginkalipay sang burgesya.

Ang CPSU kag ang Chinese Communist Party amo ang pangunahon nagabanggianay sa daku nga pang-ideolohiya nga debate. Wala sapayan kay Khrushchov nga pag-uliay buot sang malip-ot kay Tito, ang Moscow Declaration sang 1957 kag ang Moscow Statement sang 1960 nagmentinar nga ang moderno nga rebisyunismo amo ang katalagman sang internasyunal nga kahublagan komunista bilang resulta sang mapag-on kag mapagros nga tindog sang Tsino kag iban pa nga komunista nga partido.

Ginpasangkad ni Khrushchov ang pang-ideolohiya nga debate asta sa pagtublag sa mga estado-sa-estado nga relayon sa tunga sang Unyon Sobyet kag Tsina. Sa missile crisis sa Cuba, matingkad nga ginkomprontar niya si Kennedy. Angut sa Vietnam, naga-oponer siya sa rebolusyonaryong paghimakas sang pumuluyo nga Byetnames kag nagaku-lumuron sa paghatag sang limitado nga suporta sa ila.

Ang paglala sang industriya nga Sobyet kag sa pagkaguba sang agrikultura kag paggamo sang mga relasyon pangluwas nagtulod sa pagkuha kay Khrushchov paagi sa isa ka kudeta sang magkabarkada nga Brezhnev. Nangin sekretaryo heneral si Brezhnev sang CPSU kag si Kosygin ang primyer. Ang nauna amo ang nag-asyumer sang pusisyon nga presidente.