[PRWC Party Documents] Stand For Socialism Against Modern Revisionism, Enero 15, 1992

MANINDUGAN SA SOSYALISMO BATUK SA MODERNO NGA REBISYUNISMO

II. Ang Palanublion kanday Lenin kag Stalin

Ang Rekord ni Stalin

Read in English Basahin sa Pilipino

Armando Liwanag, Tagapangulo, Partido Komunista sang Pilipinas

Enero 15, 1992

Napatay si Lenin sang 1924. Wala siya maglawig agud masaksihan ang pagsugod sang lubos nga sosyalistang konstruksyon pang-ekonomya. Ginhimo ini sang nagbulos sa iya kag tampad nga sumulunod nga si Stalin. Ginpatuman niya ini sandig sa mga gintudlo nanday Marx, Engels kag Lenin: diktadurya sang proletaryado kag pangmasang mobilisasyon, pangpubliko nga pagpanag-iya sang kagamitan sa produksyon, pagplano sa ekonomya, industriyalisasyon, kolektibisasyon kag mekanisasyon sang agrikultura, lubos nga empleyo kag mga garantiya sosyal, libre nga edukasyon sa tanan nga lebel, pagpadaku sang serbisyo sosyal kag pagpataas sang istandard sang pagpangabuhi.

Apang antes pa man ang sosyalista nga pang-ekonomyang konstruskyon maka-umpisa sang 1929 sa una nga lima ka tuig nga plano, ginpadayon ni Stalin ang New Economic Policy ni Lenin kag ginpakigbatuan kag ginlutos ang Wala nga Oposisyon nga ginpanindugan ni Trotsky nga nagadala sang sala nga linya nga imposible ang sosyalismo sa isa ka pungsod kag ang mga mamumugon sa Nakatundan nga Europa (ilabi sa Germany) dapat una nga magdaog sa mga armadong pag-alsa kag ang madasig nga industriyalisasyon tigayunon gilayon nga wala sang konsiderasyon sa mga mangunguma.

Nagmadinalag-on si Stalin sa iya linya nga ang sosyalismo mahimo sa isa ka pungsod kag sa pagdepensa sang mamumugon-mangunguma nga alyansa. Kon ginpasugtan si Trotsky, ginsamad tani niya ang mga kahigayunan para sa sosyalismong Sobyet sa pagpanggarit-garit sang mga kapitalistang kusog, sa pagbungkag sang mamumugon-mangunguma nga alyansa kag sa pagsabwag sang pesimismo sa kakulangan sang ano man nga madinalag-on nga mga pag-alsa sa Nakatundan nga Europa.

Sang luto na ang panahon sa pagpabuylo sang sosyalista nga pang-ekonomiyang konstruksyon, ang Tuo nga Opo-sisyon nga ginapangunahan ni Bukharin nag-luntad sa pag-argumento para sa pagpadayon sang New Economic Policy kag ginpama-labagan ang industriyalisasyon kag kolekti- bisasyon sang agrikultura. Kon ginpasugtan si Bukharin, wala makatigayon ang Unyon Sobyet nga makabalay sang isa ka sosyalista nga sosyedad nga may isa ka kumprehensibong base industriyal kag isa ka mekanisado kag kolektibisado nga agrikultura kag naghatag sa iya pumuluyo sa isa ka mas mataas nga istandard sang pagpangabuhi; kag magapa-daku ang burgesya kag mga burges nga nasyu-nalista sa madamo nga republika kag mangin mahapos nga biktima sa atake sang Nazi nga Germany nga ang iya lider nga si Hitler wala naglikum sa iya plano nga kontra sa Unyon Sobyet.

Ang una nga lima ka tuig nga plano matuod ginakinaiyahan sang tuman nga mga kabudlayan bangud sa mga masunod: nagsugod sa limitado nga base industriyal sa kalalawran sang agraryo nga kahimtangan, ang nagapadayon nga mga epekto sang gyera, ang pang-ekonomya kag pangpulitika nga sangsyon sang mga kapitalistang pwersa, ang nagapa-bilin nga katalagman sang dumuluong nga interbensyon militar, ang kabug-atan sang papel nga tagpanguna kag ang bayolente nga reaks-yon sang mga manggaranon nga mangunguma nga nagpamalibad sa pagpaidalom sang ila mga uma, kagamitan kag hayupan sa kolektibi-sasyon, ginpang-ihaw ang ila mga pangtrabaho nga hayupan, kag nag-organisa sa pagpamatuk.

Pero pagkatapos sang una nga lima ka tuig nga plano pang-ekonomya, ara ang popular nga paghinugyaw sa pagkatukod sang mabug-at nga sandigan nga industriya. Sa pagbulig sa mangunguma ara ang konsiderable nga mekanisasyon sang agrikultura, ilabi na sa porma sang mga istasyon sang traktora. May markado nga pag-uswag sa istandard sang pagpangabuhi.

Sang 1936, isa ka bag-o nga konstitusyon ang ginpromulgar. Bilang resulta sang mga kadalag-an sang pang-ekonomyang konstruksyon kag sa atubang sang aktwal nga kumpiskasyon sang mga propyedad sang burges kag agalon nga mayduta kag ang daw pagkadula sang mga nagapanghimulos nga sahi sa pang-ekonomya nga depinisyon, ang konstitusyon nagpahayag nga wala na sang mga mapanghimulos nga sahi kag wala na ang banggianay sang mga sahi magluwas lang sa tunga sang pumuluyong Sobyet kag eksternal nga kaaway. Ining deklarasyon naglakip sang daku nga kasaypanan ni Stalin. Ang kasaypanan nga may duha ka sanga.

Isa ka sanga amo ang kapaslawan sa pagtuhay sang mga kontradiksyon sa tunga sang mga pumuluyo gikan sa mga kontradiksyon sa tunga sang mga pumuluyo kag kaaway kag ang natural nga tendensya nga iaplikar ang administratibong tikang batuk sa halog nga nakongkludar nga kaaway sang mga pumuluyo. May ara gid man matuod-tuod nga British kag German nga espiya kag mga burges nga nasyunalista nga naimbolber sa kontra-rebolusyonaryo nga kalakasan. Kinahanglan gid man sila madula. Apang ginahimo ini paagi sa tuman nga pagsalig sa sistema sang mass reporting (base sa patriotismo) nga naghatag sang impormasyon sa serbisyo pangseguridad. Kag ang prinsipyo sang nagakaigo nga proseso wala maid-id kag mahalungan nga ginasunod agud pagamayon ang target sa kampanya batuk sa mga kontra-rebolusyonaryo nga silutan lang ang may sala sandig sa indi mabali nga ebidensya. Gani sang 1936-38 nga panahon ang pagkaarbitraryo nagbiktima sang daku nga numero sang pumuluyo. Ang rebolusyonaryo nga makasahing edukasyon paagi sa kahublagang masa sa idalom sang pagpamuno sang Partido wala ginlunsar sang maayo sa katuyuan nga hatagan sila sang mataas nga kamuklatan pangpulitika kag mangin alertado ang mga pumuluyo.

Ang ikaduha nga sanga amo ang pagtib-ong sang idea nga ang pagtukod sang sosyalismo isa ka bagay sang pagpataas sang produksyon, pagpasanyog sang administrasyon kag teknika, pagtugot sa mga kadre sa pagdesider sang tanan (bisan pa nga si Stalin wala untat nga nagahambal batuk sa burukratismo) kag paghatag sa mga kadre kag mga eksperto kag mga anak-balhas sang nagapadugang nga mga benepisyo materyal. Ang bag-o nga intelihensya nga ginbunga sang madasig nga paglapad sang sistema nga edukasyong Sobyet may pagbuhin sa pagpati sa makasahi nga proletaryong panindugan kag nagapadaku ang pagpati nga supisyente na nga mangin eksperto agud mangin mga burukrata kag teknokrata sa pagtukod sang sosyalismo. Ang daan kag bag-o nga intelehensya ginsigahum nga proletaryado mientras nga nagahatag sila sang mga serbisyo burukratiko. Wala sang pagkilala sa kamatuoran nga ang burgesya kag iban nga anti-proletayado nga idea makapadayon kag magatubo bisan pa pagkatapos sang kumpiskasyon sang mga propyedad sang burgesya kag agalon nga mayduta.

Agud tigayunon ang sosyalistang rebolusyon kag konstruksyon sa isa ka pungsod nga may isa ka daku nga populasyon nga nagasobra sa 100 ka nasyunalidad kag may malapad nga kadutaan, may isa ka manubo nga pang-ekonomya kag teknolohikal nga lebel bilang ginaumpisahan, ginwasak sang gyera sibil kag padayon nga ginapahug sang lokal nga kontra-rebolusyonaryo nga pwersa kag mga pwersa sang dumuluong nga kapitalista, kinahanglan nga may sentralisasyon sang panimuot pulitikal amo man ang sentralisado nga pagplano sa paggamit sang limitado nga resorsa. Pero ining kakinahanglanon mahimo masobrahan kag mangin basehan sang burukratismo, pagbuhin sang demokrasya sa proseso sang paghimo desisyon. Ang burukratismo mahimo mangin isa ka makapahilayo nga pwersa nga nagahamulag sa Partido kag estado sa mga pumuluyo. Ang demokratiko sentralismo sarang mag-usmod pakadto sa burukratiko sentralismo.

Sa mga pangkalibutanon nga hitabo, ginbuyok kag ginsuportahan ni Stalin ang mga partido komunista kag anti-imperyalistang kahublagan sa mga kapitalista nga pungsod kag ang mga kolonya kag malakolonya paagi sa Ikatlo nga Internasyunal. Kag humalin sang 1935 pasaka, ginsakdag niya sa internasyunal nga sakop ang polisiya sang antipasista nga Prente Popular. Pagkatapos lang ginsikway sang England kag France ang iya gintanyag nga antipasistang alyansa (kag ginsugyot ang Germany nga atakehon ang Unyon Sobyet) nga nagdesider si Stalin sa paghimo sang isa ka wala-agresyon nga kasugtanan sa Germany sang 1939. Isa ini ka diplomatiko nga maniobra agud sablagan ang posible temprano nga pagsalakay sang Nazi kag pagganar tiempo para sa Unyon Sobyet nga makahanda batuk diri.

Lubos nga gingamit ni Stalin ang panahon antes magsalakay ang Germany sang 1941 sa pagpabakod sang Unyon Sobyet sa ekonomya kag militar subong man sa pulitika paagi sa patriotiko nga panawagan sa bug-os nga pumuluyong Sobyet kag mga konsesyon sa mga konserbatibo nga institusyon kag organisasyon. Halimbawa, ginbalik sa Russian Orthodox Church ang iya mga bilding kag mga pribilehiyo. May markado nga pagligwa pabor sa isa ka malapad nga antipasistang prente popular.

Sa dalagan sang mga preparasyon batuk sa pasista nga pagpanalakay kag sa Dungganon nga Patriotikong Gyera sang 1941-45, ang linya sang patriotismong Sobyet dugang nga nagpakulpa sa linya sang banggianay sang mga sahi sa kubay sang daan kag bag-o nga intelihensya kag bug-os nga pumuluyo. Ang pumuluyong Sobyet naghiliusa. Bisan pa nagbatas sila sang isa ka daku nga kaswalidad nga 20 milyones nga kamatayon kag pagkawasak sang ila pungsod, lakip ang pagkaguba sang 85 porsyento sang ila kapasidad industriyal, gintungdan nila ang malahalon nga papel sa paglutos sa Nazi nga Germany kag kalibutanon nga pasismo kag naghatag sang dalan sa pagtuhaw sang madamo nga sosyalistang pungsod sa Nasidlangan nga Europa kag Asya kag sa mga pungsodnon nga kahublagan pangkahilwayan nga wala pa natabo sadto.

Sa pagtapos sang Ikaduha nga Inaway Pangkalibutanon, ginpamunuan ni Stalin ang pang-ekonomyang konstruksyon sang Unyon Sobyet. Pareho nga nagmadinalag-on siya sa malaparan nga industriyalisasyon humalin sang 1929 pakadto sa 1941 (dose ka tuig lang) antes ang gyera, sa amo man ginhimo niya humalin sang 1945 pakadto sang 1953 (walo ka tuig lang) pero sa sining panahon maathag nga wala sang signipikante nga pagpamatuk halin sa mga kontra-rebolusyonaryo.

Sang 1952, narealisa ni Stalin nga nakahimo siya sang sayup sa indi napanahon nga pagdeklarar nga wala na sang mga sahi kag banggianay sang nga sahi sa Unyon Sobyet, luwas sa banggianay sa tunga sang mga pumuluyo kag kaaway. Ugaling tuman na kaulihi sini, gindugukan na ang Partido kag estado sang daku nga numero sang mga burukrata nga may nagapabuhin nga proletaryado nga rebolusyonaryong kamuklatan. Ining mga burukrata kag ang ila burukratismo nangin base sang moderno nga rebisyunismo.

Sang napatay si Stalin sang 1953, ginbayaan niya ang Unyon Sobyet nga isa ka makusog sa pangpulitika, pang-ekonomya, pangmilitar kag pangkultura nga sosyalistang pungsod. Madinalag-on nga nahiliusa niya ang mga pumuluyong Sobyet sa madamo nga mga republika kag nasyunalidad kag ginpangapinan ang Unyon Sobyet batuk sa Nazi Germany. Liwat nga ginbalay niya ang industriyal nga ekonomya nga may mataas nga tantos sang pagtubo sa kada tuig, may bastante nga lokal nga pagkaon para sa mga pumuluyo kag may pinakamadaku nga produksyon sa kalibutan sang langis, karbon, asero, bulawan, lamigas, algudon kag iban pa.

Sa idalom sang iya pagpamuno, ang Unyon Sobyet nagpatubo sang pinakadaku nga numero sang manugpanalawsaw nga syen-tipiko, mga doktor, mga artista kag manunulat kag iban pa. Sa literatura kag artistikong patag, naglambo ang sosyal-realismo samtang sa amo man, ang bug-os nga palanublion kultural sang Unyon Sobyet ginsakdag.

Sa polisiya pangluwas, napunggan ni Stalin sa Europa kag Asya ang mapanalakay nga pwersa sang US, ginsuportahan ang mga pumuluyo nga nagapakig-away para sa pungsodnon nga kahilwayan kag sosyalismo, gin-nyutralisa ang sadto monopolyo nukleyar sang Estados Unidos kag wala untat nga panawagan sang kalinungan pangkalibutanon bisan pa ang ginapamunuan sang US nga alyansa sa Nakatungdan naglunsar sang Cold War kag nagahimo sang mga probokasyon.

Absoluto nga kinahanglanon ang husto nga ebalwaron si Stalin bilang isa ka lider agud malikawan ang tugalbong sang moderno nga rebisyunismo kag sa pagkontra sa labing matingil nga mga anti-komunista nga nagaatake sa Marxismo-Leninismo sa idalom sang tabon nga anti-Stalinismo. Dapat naton hibal-on kon ano ang iya mga merito kag mga demerito. Dapat naton respetuhon ang mga istorikal nga pamatuod kag husgahan ang iya liderato sa sulod mismo sang iya panahon 1924 asta 1953.

Indi syentipiko nga maghimo sang lubos nga pagnegar kay Stalin bilang isa ka lider sa iya panahon kag itampok ang basol sa iya asta ang moderno nga rebisyunismo, mga polisiya kag mga aksyon nga gin-adoptar kag ginhimo nga maathag batuk sa ngalan ni Stalin kag -- sa una amat-amat anay kag masunod sa madasigan-- nga pagdul-ong sang pagkabag-sak sang Unyon Sobyet kag ang pagpanum-balik sang kapitalismo. Ang mga lider dapat husgahan mayormente sa panahon sang ila responsibilidad bisan pa nga ginatinguhaan naton tuytuyon ang nagapadayon kag di-pagpadayon halin sa isa ka panahon padadto sa masunod.

Ang mga merito ni Stalin sa sulod sang iya panahon nga pagpamuno amo ang prinsipal kag ang iya mga demerito amo ang sekondarya. Sa husto siya nga bahin kag madinalag-on sa tanan nga paghimakas sa pagdepensa sang sosyalismo pareho sa mga pagpamatuk sa Wala nga oposisyon nga ginpangunahan ni Trotsky kag sa Tuo nga oposisyon nga ginpamunuan ni Bukharin, ang nagapanggamo nga mga manggaranon nga mangunguma, mga burges nga nasyunalista kag sa mga pwersa sang pasismo nga ginpamunuan ni Hitler. Natigayon niya nga maisa, ginkonsolida kag ginpauswag ang estadong Sobyet. Matapos ang Ikaduha nga Inaway Kalibutanon, ang gahum Sobyet pangaduha lang sa Estados Unidos. Namentinar ni Stalin ang tindog batuk sa mga pamahug sang imperyalismong US. Bilang isa ka lider, gintiglawas ni Stalin kag gin-ubayan ang proletaryado nga Sobyet kag pumuluyo halin sa isa ka kadalag-an pakadto sa masunod.