Niadtong Enero 18, gibanabanang mokabat sa 42.2 milyong dosis nga bakuna ang natupok sa 51 ka nasud. Gibanabanang mokabat sa abereyds nga 2.43 milyong dosis usab ang natupok kada adlaw. Mikabat usab sa 8.33 bilyong dosis ang gipareserba na sa pinakadagkung kapitalistang nasud. Lakip ang Pilipinas sa mga nasud nga kinahanglan pang maghulat hangtud sa mosunod nga tuig aron matubag ang panginahanglan sa bakuna.

Sa kasamtangan, limitado pa ang impormasyon kalabot sa epektibidad sa mga bakuna. Sa usa ka bahin, tungod kini sa kumpetisyon ug pagsinekretohay sa monopolyong mga kumpanya sa parmasyutika. Sa pikas bahin, tungod kini sa kahinanali sa sitwasyon kung asa kinahanglan nang ipagula ang mga bakuna sa pinakasayong panahon. Sa miagi, mikabat og tulo ka tuig ang panukiduki ug pagpalambo sa bakuna ayha kini tugutang gamiton sa publiko. Ang mga bakuna batok sa Covid-19 gisalang sa testing sulod lamang sa halos unum ka bulan.

Matud sa tigpamaba sa rehimen niadtong Enero 18, nakapareserba na ang Pilipinas og 25 milyong dosis gikan sa Sinovac, 17 milyong dosis gikan sa AstraZeneca, 10 milyong dosis sa Moderna, ug 30 milyong dosis sa Covovax. Kadaghanan niini wala pay badyet pangpalit ug wala pa nahibaloan kung kanus-a moabot sa Pilipinas.

Sa karon, dili moubos sa 21 ka dagkung syudad sa Pilipinas ang nagsulting maggahin og kaugalingong pondo alang sa bakuna sa ilang mga residente.