Giambus sa Bagong Hukbong Bayan (BHB)-Abra (Agustin Begnalen Command) ang abusado ug berdugong mga sundalo sa 24th IB ug 72nd Division Reconnaissance Company niadtong Enero 4 sa Barangay Pacgued, Malibcong, Abra. Siyam ang napatay sa opensiba lakip ang platun lider nga si 2Lt. Zaldy D. Lapis, Jr..

Paspas ang gihimong surpresang pag-atake sa yunit sa BHB sa mga sundalo. Usa ka bulan nang nangutingkay ug naglunsad sa nakapokus nga operasyong militar sa mga komunidad ang maong yunit. Giisnayp sa BHB ang mirespondeng helikopter nga paturagas nga nangistraping sa maong lugar. Naghulog og 23 ka bomba ang Super Tucano Bomber Plane nga miguba sa mga kalasangan ug umahan sa mag-uuma gikan Enero 5 hangtud 7.

Kaylap ang krimen sa 24th IB ug 72nd DRC sa katawhang Abreño. Lakip dinhi ang pagpamusil sa unum ka batan-on nga nangisda sa Barangay Lan-ag, Lacub niadtong Pebrero 2020. Nakaluwas ang mga biktima apan nagbunga kini og grabeng troma kanila. Usa sa mga biktima ang lider sa Sangguniang Kabataan sa barangay. Gipagawas pa sa mga sundalo nga mga myembro sa BHB ang maong mga biktima. Gawas dinhi, notoryus ang yunit sa pagpangawat ug pagpangransak sa mga balay sa sibilyan.

Gikan 2018 hangtud 2019, walay hunong ang pagpamig-ot ug pagpanghadlok sa 24th IB sa mga myembro ug lider sa Kakailian Salakniban Tay Amin a Nagtaudan, lokal nga balangay sa Cordillera People’s Alliance sa Abra.

Negros. Trese ka sundalo sa 62nd IB ang napatay human giambus sa usa ka yunit sa BHB-Central Negros niadtong Enero 10. Gipabusikaran sa mga Pulang manggugubat ang mga sundalo sa Sityo Batong-buang, Barangay Trinidad, Guihulngan, Negros Oriental.

Kapin usa ka semana na nga nanghasol ang operasyong militar sa 62nd IB sa komunidad. Ang maong opensiba sa BHB tubag sa mga atake ug pagpamig-ot sa rehimeng Duterte sa katawhang Negrense.

Gipanghimakak usab ni Ka JB Regalado, tigpamaba sa maong yunit sa BHB, ang pamahayag sa militar nga aduna pay usa ka engkwentrong nahitabo niadtong hapon sa parehong adlaw. “Usa kini ka misengkwentro tali sa pwersa sa 62nd IB ug mga CAFGU,” matud pa niya.

Albay. Tulo ka mugbong armas ang nakumpiska sa BHB-Albay (Santos Binamera Command) sa ambus niini sa 31st IB niadtong Enero 17 sa buntag sa Barangay Banquerohan, Legazpi City. Tulo ka sundalo ang napatay.

Rizal. Duha ka beses nga giambus sa BHB-Rizal ang usa ka platun sa giusang tropa sa 80th IB ug Philippine National Police-Rizal sa Sityo Dapis, Barangay Puray, Rodriguez niadtong Enero 4. Usa ang napatay ug daghan ang samaron sa mga sundalo.

Panay. Tulo ka armadong opensiba ang gilunsad sa mga Pulang manggugubat niadtong Disyembre 2020. Duha ka beses nga giambus sa BHB-Capiz ang nag-operasyong tropa sa 12th IB sa Barangay Buri, Tapaz, Capiz niadtong Disyembre 9. Gipabusikaran usab sa BHB-Iloilo ang mobil sa pulis sa Barangay Balicuas, Tubungan, Iloilo niadtong Disyembre 16. Usa ang napatay ug walo ang samaron sa mga sundalo.