Mikabat sa kapin tulo ka semana ayha gihatag sa pamilya ang patayng lawas ni Vilma Salabao, unyonistang lakip sa gimasaker sa pulis ug mga ginsakpan sa 2nd ID sa usa ka manggahan sa Sityo Malalim, Barangay San Jose, Baras, Rizal niadtong Disyembre 17, 2020.

Lakip usab sa mga biktima sa maong masaker silang Carlito Zonio, bininlan ug nangulong upisyal sa seguridad sa manggahan; manag-ig-agaw nga silang Jonathan ug Niño Alberga, mga gwardya; ug si Wesley Obmerga. Adunay tuberkulosis ug sakit sa kidni si Obmerga, samtang adunay kanser si Salabao. Giila ang mga biktima isip Baras 5.

Sa imbestigasyon sa Karapatan-Southern Tagalog, adunay mga timailhan sa grabeng tortyur ang mga patayng lawas sa mga biktima.

Human ang mangilngig nga krimen, nagtanum og mga ebidensyang pusil ug eksplusibo ang mga pasista aron pagawasong mga myembro sila sa Bagong Hukbong Bayan (BHB). Unang gibalita sa 2nd ID sa pagpangulo ni Lt. Gen. Antonio Parlade, Jr. nga mga kolektor kuno sa rebolusyonaryong buhis ang mga biktima, ug napatay dihang misukol. Human ang pipila ka semana, gisulti usab ni Sec. Eduardo Año sa Department of Local and Interior Government nga mga partisano kuno ang mga biktima.

Pagpamatay. Gipatay sa Philippine National Police (PNP)-Camarines Sur si Aldren Lagdaan Enriquez, aktibong myembro sa Camarines Sur People’s Organization nga gipasanginlang myembro sa BHB niadtong Enero 6 sa Barangay Sagrada, Iriga City. Gisulod sa 30 ka pulis ang iyang balay ug walay kaluoy siyang gipusil atubangan sa iyang duha ka batang anak.

Gipatay usab sa PNP-Region 5 si Eddie Barcoma Belludo sa Sityo Camenorial, Barangay Banquerohan, Legazpi City niadtong Enero 11. Giakusahan siyang myembro sa hukbong bayan ug gitamnan og ebidensyang pusil ug eksplusibo.

Pagpamig-ot. Gipasakahan sa gama-gamang kasong pagpatay si Windel Bolinget, lider sa Cordillera Peoples Alliance (CPA) subay sa pasangil sa usa ka pulis sa Tagum City, Davao Del Norte. Giakusahan siya ug ang siyam pang indibidwal sa pagpatay kang Garito Tiklonay Malibato, myembro sa grupong Lumad nga Karadyawan, niadtong Marso 2018. Gipatay si Malibato sa paramilitar nga Alamara.

Iligal nga pag-aresto. Giaresto silang Ruel Custodio ug Ruben Estocado, parehong mag-uuma sa kalubihan nga myembro sa Coco Levy Funds Ibalik Sa Amin, sa giusang pwersa sa mga pulis ug sundalo sa 201st IBde sa Barangay Zone 3, Poblacion, Atimonan, Quezon niadtong Disyembre 26. Giakusahan silang mga myembro sa BHB ug gitamnan og mga pusil ug eksplusibo. Wala sila gitugutang maduaw sa ilang mga pamilya.

Pagdagit. Wala pa gihapon gipakita ang mag-uumang si Anselma Garde, 31, sukad nga gidagit siya sa 62nd IB niadtong Enero 17 sa Sityo Batong-Buang, Barangay Trinidad, Guihulngan City, Negros Oriental.

Sa parehong adlaw, gikanyon ug gibomba sa militar ang bukirong bahin sa mga barangay sa Sandayao, Trinidad, Binobohan, Imelda ug Tacpao sa parehong lungsod. Nagresulta kini sa pagbakwit sa 100 ka pamilya.

Panay. Niadtong Enero 7, pugos nga gipabalik ni Meyor Roberto Palomar sa Tapaz, Capiz ang 500 ka pamilyang Tumandok nga nagbakwit human giaresto ug gipatay sa mga pulis ang ilang mga lider niadtong Disyembre 30, 2020. Sa inisyal nga taho mikabat na sa 300 ang pugos nga gipasurender sa AFP sa Tapaz.

Caloocan City. Gatusan ka mga residente sa Caloocan ang miangal human mag-anunsyo ang DSWD nga kanselado ang proseso sa beripikasyon sa ikaduhang pagpanghatag sa Social Amelioration Program sa lugar niadtong Enero 13. Gireklamo usab nila ang online nga sistema sa pagrehistro sa DSWD nga Starpay tungod kay daghan kaayo kinig ginapangayo nga rekisito ug walay klaro kung unsaon pagkuha ang ayuda.

Navotas. Aron hatagag dalan ang proyektong reklamasyon sa San Miguel sa Tanza, Navotas, 30 ka pamilyang mangingisda ang gipalayas niadtong Enero 15 sa mga ginsakpan sa San Miguel Corporation tungod kay magsugod na ang konstruksyon sa lugar. Reklamo sa mga residente, ginabaha ug delikado ang lugar sa ilang relokasyon. Gibawalan usab sila nga mangisda sa dagat.

Negros. Kapin 7,000 ka pamilya ang apektado sa duha ka magkasunod nga kalit nga pagbaha sa mga lungsod sa Talisay, Silay, Victorias ug EB Magalona sa Negros Occidental niadtong Enero 1 ug Enero 9. Mikabat sa ₱16.5 milyon ang kantidad sa naguba nga kabtangan ug panginabuhian.

Cebu City. Nagdeploy ang militar og mga tangke ug mga sundalo sa mga barangay sa Pasil, Sawang Calero, Suba ug Ermita sa Cebu City niadtong Enero 15. Kahadlok ug kabalaka ang gibunga sa daw martial law sa lugar. Tulo ka adlaw nga mipundo ang mga sundalo dinhi.