Atubangan sa pagmahal sa presyo sa utan, walay plano ang Department of Agriculture nga pakusgon ang produksyon niini sa nasud. Kini mismo ang nag-anunsyo sa posibilidad nga makasinati ang nasud sa 79 ka adlaw nga paggamay sa suplay sa utan karong tuiga. Gibanabana nga mokabat sa 434,841 metriko-tonelada (MT) ang kulangon, katugbang sa konsumo sa mga Pilipino sulod sa duha ka bulan ug tunga.

Kaniadto pang milabayng tuig gireklamo sa mga mamalitay ang pagsaka sa mga presyo sa utan nga bunga sa kakulangon sa suplay. Gibanabana nga misaka sa 60% ang mga presyo sa utan sa kinatibuk-an sukad pa niadtong Nobyembre 2020. Adunay mga utan nga halos doble ang gitaas sa presyo.

Imbes nga resolbahon ang kakulangon sa lokal nga suplay, mas giuna pa sa rehimen ang pagpakusog sa produksyon sa mga produktong pang-eksport. Naggahin kini og ₱360 milyon alang sa Productivity Enhancement Project, usa ka proyekto alang sa pagpalambo sa produksyon sa pang-eksport nga mga pananum sama sa saging, kawayan, mangga ug sibuyas. Pinakadaku ang gigahin alang sa saging (₱220 milyon). Pulos mga dagkung prodyuser nga nakarehistro sa Security Exchange Commission ang mamahimong makapahimulos dinhi ug dili ang gagmayng mga mag-uuma. Sa pikas bahin, naggahin lamang kini og tig-₱3,000 nga kwarta ug ₱2,000 ayudang pagkaon sa gibanabanang 900,000 ka mag-uuma alang sa tibuok tuig o katugbang sa ₱8 kada adlaw.