Inparaw ti rehimen a Duterte manipud Marso 29 aginggana Abril 11 ti napairutan a lockdown (enhanced community quarantine) iti Metro Manila, Cavite, Laguna, Bulacan ken Rizal. Daytoy ket kalpasan dimmanon ti 10,000 ti kaso ti kaadu ti naakaran ti Covid-19. Segun iti datos ti Department of Health (DOH) idi Abril 1, 72% ti pangkabuklan a kaso ti impeksyon iti pagilian ket nailista iti nasao a lugar.

Inpakaammo ti DOH a dumanon ti 79% ti pangkabuklan a bilang dagiti intensive care unit bed (631 iti 804) ti okupadon iti agdama, kabayatan a 69% met kadagiti isolation bed (3,143 iti 4,526) ken 61% met kadagiti ward bed (2,180 iti 3,439). Adda iti “kritikal a tukad” metten ti pagkatlo (50 iti 152) dagiti ospital iti National Capital Region, kagudua daytoy ket nganngani mapunnon ken kaguda ket napnon ken saan nan a kabaelan nga umawat pay kadagiti pasyente. Maibilang ditoy ti Philippine Orthopedic Center (75% ti kama ti okupado) no sadino a naipakaammo a nagpositibo iti Covid-19 ti 117 iti 180 a mangmangged iti salun-at na.

Idi Abril 4, dimmanon ti 12,576 ti nailista nga inaldaw a baro a kaso, ken 165,715 ti pangkabuklan nga aktibo a kaso ti Covid-19 iti intero a pagilian.