Kas iti dadduma a lugar iti pagilian, nangted ti dakkel a karit kadagiti yunit ti hukbo ti umili ken rebolusyonaryo nga umili ti pandemya a Covid-19 ken kumarkaro a pasismo ti estado iti rehiyon nga Ilocos-Cordillera. Dagitoy ket mapangngeddeng a sinango dagiti yunit ti hukbo ti umili iti rehiyon.

Maibilang ditoy ni Ka Emili, maysa a rebolusyonaryo nga agtutubo a tumaktakder nga opisyal iti pagbiagan (lohistika ken suplay) ti nakapaunegan na a platun. Gapu iti lockdown, naingetan ti pagnaan ti agas, taraon ken kasapulan ti masa ken hukbo. Tapno rimbawan daytoy, naiduron da nga agbalin a managparnuay, agpanunot ken mangiyaramid ti baro a moda ti panagtignay ken pairutan ti panangpetpet ti disiplina militar.

“Kas opisyal ti pagbiagan, maysa a dakkel a karit kanyak ti agpanunot kadagiti pamuspusan tapno makatulong iti panangpataud ken panangipangato iti pagbiagan ti masa iti panawen ti pandemya,” kuna ni Ka Emili. Nagisayangkat da ti kampanya iti salun-at ken edukasyon maipanggep iti Covid-19 tapno pukawen ti buteng dagiti taga-baryo ken ipakaawat ti kinapateg ti panangsurot kadagiti protocol iti salun-at kabayatan nga itultuloy ti produksyon.

Simmaruno nga insayangkat ti yunit ti kampanya ti panangipangato ti produksyon ti hukbo ken masa. “Nagbalin a mas regular ti partisipasyon ti hukbo iti produksyon no maiyarig iti napalabas,” kuna ni Ka Emil. “Ditoy a limmawag kanyag ken kadagiti kakadua ti kinapateg ti kolektibo a panagtignay ken panangisayangkat ti rebolusyon nga agraryo,” kinuna na.

Iti maysa a baryo, nakaapit ti hukbo ken masa ti sinako a karabasa, kamote, aba, ken sayote, a sigud a mabaybay-an laeng gaputa adda met dagiti lako a taraon. “Inyawis mi met ti panagmula ti unas ken kape kas kasukat ti komersyal nga asukar ken kape. Dagiti mula a makatulong tapno pumigsa ti resistensya kas iti suwa, “perres” (lemon) ken dangla, a sigud a nabaybay-an ket pinadakkel ken inusar. Kagiddan ti panangipangato ti kabaelan ti masa nga agpataud ti taraon ti kabaelan da a tumulong iti hukbo ti umili.

Idi nagbalin a nagaraw ti yunit, kasapulan nga agmaniobra da iti asideg a bakir. “Dakkel a bentahe ti kammuan kadagiti mula iti bakir ken kammuan iti panaganup,” kunana. Istorya na, kadagiti panawen a saan da a makaasideg iti baryo, nakabaelan da ti agbiag babaen kadagiti kinabaknang ti bakir, kadagiti prutas ken natnateng, igat ken alingo. Gagu ditoy ngimmato ti pannakaawat na iti kinapateg ti panangaywan ti aglawlaw.

Nagbalin a karit uray iti personal a panangmuli iti bagi ni Ka Emil ti nasango na a kasasaad. “Idi immuna a bulan ti pandemya, nasaludsod ko iti bagik, kabaelak ngata?” Ngem isuna met laeng ti nangsungbat iti bukod na a saludsod. “Saan ko a mammuan no saan ko a mapadasan.” Petpet ti rebolusyonaryo a pangngeddeng, ad-adda pay a nagpursige iti rebbengen na.

“Kabatog ti militarisasyon dagiti atiddog ken narigat a pannagna, puyat ken bannog,” kunana. Dimmakkel iti syudad ken nanam-ay a biag. “Kasapulak a doblien ti anus ko tapno makaanatop. Narigatanak nga agtignay idi damo, ken no dadduma ket bumaba ti moral ko, ngem in-inut a nakaanatupak.” Ti istorya na, nagbalin a mas silulukat iti kakadua iti panangibaga kadagiti pampanunoten ken marikrikna na. “Naadal ko nga agsanggir iti kakadua ken masa,” kinuna na.

Napaneknekan na iti bukod na a bagi a kabaelan dagiti rigat ken sakripisyo iti panagbalin na a Nalabbaga a mannakigubat. “Kabaelan gayan nga ipraktika ti simple a panagbiag ken napinget a pannakidangadang. Nakasaganaak ken ti yunit mi a serken ti nairut a kasasaad ken daddadakkel a karit.”

Kas inbaga ti mensahe ti Komite Sentral iti maika-52 nga anibersaryo ti Partido Komunista ti Pilipinas, babaen iti panangidaulo ti Partido ket determinado ti nalawa a masa ti umili a labanan dagiti pasista nga atake, rebbeken ti rehimen nga US-Duterte ken iyabante ti gubat ti umili inggana ti balligi,” pananggibus na.