Duha ka lider-aktibista ang magkadungan nga giaresto sa mga pulis sa Bicol niadtong kaadlawon sa Mayo 2. Giaresto si Dan Balucio, pangkinatibuk-ang kalihim sa Bayan-Bicol ug pastor sa National Council of Churches in the Philippines, sa iyang balay sa Sto. Domingo, Albay. Giaresto usab si Sasah Sta. Rosa, tigpamaba sa Jovenes Anakbayan, sa Villa Obiedo, Cararayan, Naga City.

Aron pagawasong lehitimo ang mga operasyon, gitamnan sa mga pulis og mga pusil ug eksplusibo ang mga balay sa biktima. Giakusahan usab silang mga myembro sa Bagong Hukbong Bayan (BHB). Kadungan usab nga gireyd sa mga pulis ang balay ni Justine Mesias, tigpamaba sa Youth Act Now Against Tyranny Bicol, apan wala siya didto. Ang mga mandamyento nga gigamit sa maong mga reyd gipagula ni Judge Edgar Armes sa Legazpi City Regional Trial Court.

Sa Antipolo City, giaresto sa 80th IB ug Philippine National Police-Rizal ang 30 ka Dumagat sa Barangay Calawis niadtong Abril 13. Gilingla ang mga lumad ug gipaadto sa barangay hall aron dawaton kuno ang ayuda. Giakusahan silang adunay kalambigitan sa BHB.

Ayha niini, aduna usay 30 ka lumad gikan sa Barangay Puray, Rodriguez, Rizal ang gipasakahan og kasong rebelyon niadtong ikaduhang semana sa Marso. Giaresto usa sa parehong lungsod si Benito Lucido, lider sa Integrated Association of Agrarian Reform Beneficiaries uban ang iyang asawa niadtong Mayo 6. Gidala sila sa istasyon sa pulis ug dili pa tin-aw kung unsa ang ipasakang kaso batok kanila.

Giaresto usab sa maong adlaw ang Dumagat nga si Garry Doroteo sa iyang balay sa Tanay. Lakip si Doroteo sa mga misupak sa Kaliwa Dam.

Sa General Nakar, giaresto ug gisakay sa militar sa helikopter ang kagawad sa Barangay Lumutan nga si Loreto Miranda Bolino. Wala pa gihapon siya gipakita hangtud sa kasamtangan.

Sa Bohol, iligal nga giaresto ang mag-uumang si Alfie Sarsale sa Barangay Rizal, Batuan niadtong Abril 30. Giatake sa mga pulis ang iyang balay ug bisan ang iyang mga ginikanan. Gikawat usab ang ₱23,000 nga kita sa pamilya nga halin sa ilang gibaligyang kabaw.

Pagpamatay. Gipatay sa mga elemento sa 15th IB si Frederico Rivera, residente sa Barangay Pinggot, Ilog, Negros Occidental niadtong Abril 24. Gipagawas sa mga sundalo nga napatay ang biktima sa usa ka engkwentro.

Pekeng pagsurender. Pugos nga gipasurender sa 2nd ID ang mga residente sa Barangay San Jose, Antipolo City niadtong Abril 23 isip mga tig-suporta sa BHB.

Pugos usab nga gipasurender sa 15th IB ug 11th IB ang mga residente sa Sityo Taya-o sa Barangay Narra ug Sityo Malabago sa Barangay Tambad, Cauayan, Negros Occidental niadtong Abril. Kabahin kini sa nakapokus nga operasyong militar sa maong mga yunit sa lugar.

Militarisasyon. Halos usa ka bulan dihang nagpatuman og blokeyo ang 1st IB ug 80th IB sa mga komunidad sa mga Dumagat ug Remontado sa Barangay Puray, Rodriguez Rizal ug Barangay Umiray, General Nakar, Quezon.

Sa Negros Occidental, gikordon sa 15th IB ang Sityo Barangay Pinggot, Ilog, Negros Occidental sukad pa niadtong Abril 24. Istriktong gikontrol sa mga sundalo ang paggawas-sulod ug lihok sa mga residente sa nahisgutang mga komunidad.

Pagpanghasi. Gireyd sa 62nd IB ang upat ka balay sa Himamaylan, Negros Occidental niadtong Marso 22. Gikulata ang pipila ka residente ug gitionan og pusil samtang ginainteroga.