Gitawas sa mga mamumuo isip Nasudnong Protesta alang sa Ayuda ang ika-131 nga Pangkalibutang Adlaw sa Pamuo niadtong Mayo 1. Dala-dala nila ug uban pang demokratikong sektor ang panawagan alang sa ₱10,000 ayuda sa tanang nawad-an og trabaho, ₱100 nga hinanaling dugang sa inadlawan, ug pagpatuman sa ₱750 nga nasudnong minimum nga suhulan. Bitbit usab sa mga mamumuong panguma ang ₱15,000 subsidyo alang sa produksyong agrikultural. Dungan-dungan usab ang ilang singgit: Duterte resign!

Ang mga panagtapok gibulitan sa pagpanghadlok, pagpang-aresto ug pagpanumpo sa mga armadong pwersa sa rehimen sa pagsulay nga pugngan kini. Lakip sa mga giaresto sa maong adlaw ang 12 ka indibidwal sa Zambales nga gikasuhan sa paglapas sa mga protokol panglawas ug 34 ka mamumuo ug kabus sa Cebu nga padulong sa mga sentro sa protesta. Mga myembro silang tanan sa organisasyong dugay nang gi-red-tag sa estado. Nagpyansa ug nakagawas sila human ang duha ka adlaw.

Sa Metro Manila, napugos ang napuloan ka libong raliyista nga magtapok sa Welcome Rotonda sa utlanan sa Quezon City human gibarikadahan sa mga pulis ang Liwasang Bonifacio at Mendiola sa Maynila. Giharang usab ang 150 ka indibidwal nga paadto sa rali nga gikan sa Marikina ug ang karaban sa Pamantik-KMU sa Calamba, Laguna.

Sa Davao, napahigayon ang kinaunahang martsa-protesta sukad nga gipahamtang ang mga restriksyon bunga sa Covid-19.

Sa Pampanga, nagmartsa ang mga myembro sa Workers Alliance-Region 3 padulong sa Plaza Miranda, Angeles City. Mokabot sa 1,000 ka mamumuo usab ang nagtapok sa Crossing, Calamba. Aduna usay piket sa Los Baños, Laguna; Antipolo, Rizal ug Bacoor, Cavite. Naglunsad usab og mga protesta sa Cebu, Bacolod City, Naga City sa Bicol ug Baguio City.

Sa Iloilo, nagtukod og mga community pantry ang mga aktibista sa lain-laing bahin sa prubinsya isip pagdumdum sa Adlaw sa Pamuo. Gisundan kini sa mga piket-protesta.