Gisaulog sa tibuok kalibutan niadtong Abril 22 ang Earth Day, ang tinuig nga aktibidad nga ginalunsad gikan pa tuig 1970 isip suporta sa pagpanalipod sa kinaiyahan. Sa Pilipinas, gianunsyo sa rehimeng Duterte ang pag-apruba niini sa Nationally Determined Contribution sa nasud sa aron ingnong tampo sa pag-alkontra sa global warming o pag-init sa kalibutan. Gipahayag sa maong dokumento ang saad sa Pilipinas nga anam-anam kunhoran ang ginapagawas nga green house gas sama sa carbon dioxide, methane, ug uban pa ngadto sa 75% sa 2030 ug 100% sa 2040. Nagsubay kini sa pagratipika sa Pilipinas sa Paris Agreement on Climate Change nga gipirmahan sa 196 ka nasud niadtong 2016.

Sa aktwal, sukwahi kini nga mga pahayag sa mga plano sa rehimen sa industriya sa enerhiya. Sa pagkatinuod, nagplano pa kini nga pakusgon ang nagkadakung produksyon sa karbon sa nasud. Sa tibuok kalibutan, ang pagsunog og karbon ang usa sa pinakadakung hinungdan sa greenhouse gas nga nagatabon sa kalibutan ug nagapugong sa paggawas sa kainit. Subay sa Coal Roadmap 2017-2040 sa rehimen, planong ipasaka sa reaksyunaryong estado ang lokal nga produksyon sa karbon padulong 282 metro tonelada (MT) sa 2023-2040 gikan 23 MT sa 2017-2018. Plano usab sa lima ka pinakadakung prodyuser sa enerhiya ang pagpalambo sa iya-iyang kapasidad sa pagmugna sa enerhiya gamit ang karbon gikan 14,579 megawatts (MW) sa kasamtangan ngadto sa 21,836 (MW) sa sunod nga duha hangtud unum ka tuig.

Gipondohan kini nga mga power plant sa dili moubos sa 15 ka dagkung bangko sa nasud. Subay sa koalisyong Withdraw From Coal, nag-una dinhi ang Bank of the Philippine Islands nga gipanag-iyahan sa pamilyang Ayala ug ang Banco de Oro nga gipanag-iyahan sa pamilyang Sy.

Niadtong 2020, mikabat sa $13.42 bilyon ang gibubu sa mga bangko nga kapital sa lain-laing planta ug proyektong karbon. Niadtong Marso, nagprotesta usab ang Youth Advocates for Climate Action Philippines ug Kalikasan People’s Network for the Environment atubangan sa upisina sa Standard Chartered Bank sa Makati aron ipanawagan nga bawion ang $674 milyon nga gipautang niini sa unum ka coal-fired power plant sa lain-laing bahin sa nasud.

Isip pagbabag sa pagpalapad sa operasyon sa mga coal-fired power plant sa nasud, naglunsad og simbolikong aksyon ang lain-laing mga simbahan sa Quezon ug Negros Occidental niadtong milabayng bulan, lakip ang 15 parokya sa lungsod sa Lucena. Makit-an sa Quezon ang tulo ka dagkung coal-fired power plant. Tulo ka lain pang konsesyon ang nagahulat na lang og pagtugot, lakip ang plantang Atimonan One Energy sa Manila Electric Company (Meralco).

Sa kinatibuk-an, 23 ka coal-fired power plant ang nag-operasyon sa Pilipinas. Sa maong mga planta naggikan ang 49% sa kuryente sa nasud. Sitentaysingko porsyento sa ginagamit niini nga karbon naggikan sa laing nasud, nag-una gikan sa Indonesia ug Australia. Kadaghanan sa karbon nga ginamina sa nasud gina-eksport sa China.

Subay sa plano sa rehimen, gibanabana nga mosaka pa ang pagkonsumo sa kuryente gikan sa coal-fired power plant ngadto sa 59% sa 2029. Sa tinuod, samtang ginapanghambog ni Duterte ang pagmenos sa pagsalig sa karbon, nanguna siya sa pag-abli niadtong 2019 sa operasyon sa San Buenaventura Power Ltd. Co., usa ka coal-fired power plant nga gipanag-iyahan sa Meralco, ug nanawagan sa uban pang tigpamuhunan nga magtukod og parehong mga planta. Kini nga mga planta gipondohan gikan sa pautang sa World Bank.

Ginaila isip “pinaka-hugaw” sa mga fossil fuel ang karbon, sukwahi sa giingon ni Duterte nga “limpyo” kini. Doble ang ginamugna niini nga carbon dioxide itandi sa natural gas ug 30% nga mas dako itandi kun ginasunog ang gasolina.

Sa kalibutanhong merkado, kini usab ang pinakamahal nga tinubdan sa enerhiya human mikunhod ang presyo sa lana niadtong 2020. Pinakamahal kini niadtong Marso 2020 dihang mikabat og $66.85 kada MT ang presyo sa karbon, tugbang sa $27.36 kada bariles sa lana. Tungod kay nahikot sa pag-import og karbon, ang mahal nga presyo niini sa kalibutanong merkado ang kanunay nga ginahimong pasangil sa pagsaka sa presyo sa kuryente sa Pilipinas.