Sa milabayng tulo ka semana, milipang sa lain-laing bahin sa nasud ang mga community pantry (bodegang bayan). Tumong niini nga hatagag hinanali ug temporaryong tabang ang mga Pilipinong nawad-an og trabaho o di kaha gamay lang ang nadawat nga ayuda gikan sa gubyerno. Naila ang maong inisyatiba nga adunay panawagang: “mohatag subay sa katakus, mokuha subay sa panginahanglan.”

Mikabat na sa 1,067 ang mga giablihang community pantry sa lain-laing ordinaryong tawo, mga personahe ug organisasyon sa kasamtangan. Nagahatag kini og mga bugas, utan, delata ug uban pang pagkaon nga mamahimong paigoan sa usa ka adlaw o usa ka kan-anan. Kilu-kilometro ang linya sa mas estabilisadong mga pantry, gikan kaadlawon hangtud maggabii.

Matud sa Partido Komunista ng Pilipinas (PKP), “Ang maong mga inisyatiba sa pagtinabangay hugot nga pagpuna ug pagmakmak sa grabeng mga kapakyasan sa gubyernong Duterte nga tubagon ang mga panginahanglan sa katawhan atubangan sa pandemyang Covid-19 ug nagkagrabeng ekonomikanhong kahimtang.”

Inspirasyon ng Maginhawa Community Pantry

Nagsugod ang ideya sa community pantry dihang magbutang og usa ka gamay nga kariton si Ana Patricia Non, usa ka gagmayng negosyante, niadtong ikatulong semana sa Abril sa kadalanan sa Maginhawa St., Barangay Teachers’ Village East, Quezon City nga adunay pipila ka gulay, delata, bugas ug uban pang pangpahupay sa kagutom. Matud kaniya, gisugdan niya ang inisyatiba tungod kay “gikapoy” na siya sa kawala o kakulang sa tubag sa gubyernong Duterte atubangan sa krisis.

Gihimugso sa maong inisyatiba ang bag-ong mga community pantry sa tibuok nasud. Gatusan ang giablihan sa mga kabatan-onan, mga managsilingan, matinabangong indibidwal ug personalidad. Nag-abli usab og mga pantry ang mga demokratikong organisasyon sa kasyudaran. Sa pipila ka lugar, kadungan sa pagpanghatag og pagkaon ang pagpapirma sa petisyon nga nagaasdang sa ₱10,000 ayuda alang sa tanan ug panawagan alang sa pagpaluwat kay Duterte sa pwesto tungod sa pakyas nga pagtubag sa krisis sa panginabuhian.

Nagtukod usab og mga community pantry ang lain-laing institusyong relihiyoso sa ilang mga langkob nga lugar. Giawhag pa sa Catholic Bishops Conference of the Philippines ang mga Katolikong kahugpungan ug organisasyon nga himuong sumbanan ang maong pagtinabangay. Bisan ang mga grupo sa mga artista, musikero, ug daghan pang mga personahe ang nag-abli sa ilang mga community pantry.

Red-tagging ug pagpanabotahe sa rehimeng Duterte

Labaw nga mikaylap ang mga inisyatiba human gi-red-tag sa mga tigpamaba sa National Task Force to End Local Communist Armed Conflict (NTF-ELCAC) ang mga community pantry. Gipailalum sa sarbeylans ang pipila sa mga pantry ug gisulayan paghadlok ang mga organisador. Sa kaso sa duha ka pantry sa Cagayan de Oro, nagpakaylap og mga polyeto ang estado aron dauton ang mga organisador. Naglunsad ang ahensya og kampanyang pagpangdaut batok kang Non, nga gitandi ni Gen. Antonio Parlade kang Satanas sa usa sa iyang mga pamahayag.

Tungod niini, midagsa ang makmak kang Parlade ug sa NTF-ELCAC nga nagpakusog sa panawagang tangtangan og pondo ang ahensya. Miabot ang maong panawagan sa Senado ug Kongreso nga nanghulgang maglunsad og imbestigasyon sa maong pondo ug kang Parlade mismo.

Dihang wala nakaya sa pagpanghadlok, gisakyan usab sa militar ug pulis ang konsepto. Nabutyag ang gipagula nga memorandum sa Philippine National Police (PNP)-Region 10 nga nagmando sa mga presuhan nga magtukod og ilang bersyon sa community pantry nga pagatawagon og “Barangayanihan.” Gimando niini nga “magtanum” sa mga benepisyaryo, ug kuhaan sila og litrato aron ipakaylap sa social media, para ipakita kuno ang “pagpasalamat” sa mga tawo. Giangkon sa PNP nga ang mando nga “i-hijack” ang konsepto sa community pantry naggikan sa nahataas nga upisyal sa pulis ug para kuno magsilbi sa “kontra-insurhensiya.”

“Walay bisan unsang ‘bayanihan’ ang makapahumot sa pasista ug duguang rekord sa PNP. Tungod sa ilang mga pasistang pagpang-abuso, krimen ug pagpanumpo sa katawhan, gikasilagan ang pulis ug militar sa katawhan,” tubag sa PKP sa maong pakana sa PNP.