Kusog ang panawagan karon sa nasud sa India alang sa pagpaluwat kay Prime Minister Narendra Modi tungod sa iyang palpak nga pagtubag sa pandemyang Covid-19 nga nagresulta sa labing paspas nga pagkuyanap sa bayrus sa nasud sa milabayng bulan. Niadtong Mayo 6, misangko na sa kapin 21 milyon ang kinatibuk-ang kaso sa impeksyon ug 230,151 na ang namatay sa nasud tungod sa Covid-19. Kapin 412,618 sa maong mga kaso ang nataho lamang niadtong Mayo 5.

Ang India na ang ginatawag nga “epicenter” (sentro) sa Covid-19 sa tibuok kalibutan human nga labwan ang ihap sa mga kaso sa US. Matud sa World Health Organization, gibanabanang 28% sa mga bag-ong kaso sa Covid-19 sa tibuok kalibutan ang anaa sa India.

Nag-unang ginatudlong hinungdan sa pagkuyanap sa bayrus sa nasud ang gitawag og mga “super-spreader event” o dinagkung pulitikanhong panagtapok ug relihiyoso nga gitugutan sa rehimeng Modi sa milabayng mga bulan. Lakip niini ang elektoral nga mga rali, ug relihiyosong mga panagtapok nga gisalmotan sa minilyong indibidwal ug kung asa dili istriktong ginapatuman ang mga protokol panglawas.

Migrabe usab ang kakulangon sa mga pasilidad ug kahimanang medikal sa India, ilabina sa suplay sa mga tangke sa oxygen. Daghan ang nangamatay sa linya gawas sa mga ospital dihang wala nadapatan og tambal.

Gikabalaka usab karon ang pagkuyanap sa bag-ong baryant sa Covid-19 nga B.1.617 nga unang nakaplagan sa India ug gitawag og “double mutant.” Gituuhang mas makatakod kini ug ginatun-an pa sa kasamtangan kung epektibo pa ba ang kasamtangang mga bakuna batok dinhi.