Walay malaumang pagkunhod sa presyo sa mga giprosesong pagkaon sama sa delata, hotdog ug uban pang produktong nagsalig sa imported nga mga sangkap, lakip ang mga produkto sama sa pan ug gatas nga nagsalig usab sa imported nga mga input. Tungod kini sa padayong pagsaka sa presyo sa batakang mga produktong pagkaon sa kalibutanong merkado.

Matud sa Bloomberg Agriculture Spot Index niadtong Abril, misirit na sa pinakataas nga presyo sa kalibutanong merkado sukad 2013 ang presyo sa trigo, mais ug soybean. Tungod kini sa ubos nga produksyon sa mga nasud nga naga-eksport sa maong produkto ug mas dinagkung bolyum sa pag-import sa China sa maong mga produkto alang sa industriya niini.

Ginagamit ang trigo o wheat sa pagmugna og pan ug susamang mga produkto, samtang ginagamit ang mais ug soybean isip bahog sa hayop (feeds). Ginagamit usab ang soybean sa pagmugna og toyo, tofu ug ubang produkto. Naapektohan ang Pilipinas sa pagsaka sa presyo tungod kay 100% kining naga-import og trigo ug 99% sa suplay sa soybean. Ang epekto sa pagsaka sa presyo sa bahog mabati sa nasud diha sa pagmahal karneng baboy ug manok sa lokal nga merkado.

Niadtong Abril 8, gibana-bana sa Food and Agriculture Organization sa United Nations nga padayon pang mosaka ang presyo sa lana, karne ug gatas.

Sa milabayng 10 ka tuig, nagkataas ang import dependency ratio sa pagkaon. Gikan 18% niadtong 2010, misaka kini ngadto sa 29% niadtong 2019. Nagpasabot kini nga sobra 1/4 sa kinatibuk-ang suplay sa pagkaon sa nasud nagsalig na sa suplay o kakulang sa produktong pagkaon sa kalibutanong merkado. Lakip sa misaka ang bolyum sa imported nga mga igbabaligya sa matag tuig ang bugas (23% sa lokal nga suplay niadtong 2019) ug karneng baboy, baka ug manok. Ang mga tigmugna og pagkaon ug ilimnon naga-import sa halos tanan sa ilang hilaw nga mga materyales gikan sa ubang nasud.