Gipusil sa duha ka wala nailang lalaki si John Heredia, kanhing direktor sa National Union of Journalist of the Philippines, sa Barangay Lawa-an, Roxas City, Capiz niadtong Mayo 2. Nahitabo kini usa ka adlaw ayha ang anibersaryo sa World Press Freedom Day.

Si Heredia ang ika-21 nga tigbalita nga gipatay ilalum sa rehimeng Duterte. Nakarekord usab ang Altermidya, grupo sa alternatibong tigbalita, og 68 ka kaso sa paglapas sa kagawasan sa pagpamahayag ilalum ni Duterte.

Matud sa 2021 World Press Freedom Index nga gipagula sa Reporters Without Borders niadtong Abril 27, ika-138 ang Pilipinas sa listahan sa 180 ka nasud sa hisgutanan sa pagpanalipud sa kagawasan sa pagpamahayag.

Gidumdum usab sa mga tigbalita niadtong Mayo 5 ang usa ka tuig nga anibersaryo sukad nga gibalibaran sa rehimeng Duterte nga hatagan og prangkisa ang ABS-CBN aron padayon nga makabrodkas.