Pagpangibabaw sang masa kag hangaway sa operasyong lockdown sang militar
Bisan madamo nga tuig na ang nakaligad halin sang ulihi nga mabalikan sang nga kaupod ang Nuevo sa Southern Tagalog (ST), indi ini nangin daku nga halambalanon sang mag-abot ang mga Pulang hangaway sa lugar sa tunga sang pandemya.
Indi na bag-o sa mga residente diri ang makig-angot kag makigbuligay sa hangaway sang banwa. Ginkalipay sang mga hangaway ang mainit nga pagbaton labi na halin na sila sa bag-o nga henerasyon sang hangaway, kag ang mga kaupod nga nakilala nila sa lugar namartir na o nadula na antes pa man ang dekada 1990.
Samtang ginapadalom kag ginatun-an ang pangkabilugan kag partikular nga mga halambalanon sa pangabuhian sang mga taga-Nuevo, upod sang masa ang mga hangaway sa produksyon sa mga kaingin. Nagaserbi sila nga mga abugado kag tagapatunga sa mga halambalanon nga indi malubad sang lokal nga barangay, titser sang mga bata nga indi mahangpan ang modyul sang eskwelahan kag frontliner sa pagpaathag sang Covid-19 kag importansya sang bakuna para sa tanan.
Sa gab-i, likom nga nagatipon ang mga grupo sang pamatan-on, mangunguma, mangingisda, kababainhan kag mga Pulang hangaway agud tukuron ang paghiliusa sang Nuevo para sa pagpauswag sang ila pangabuhian. Natukod ang mga rebolusyonaryo nga asosasyong masa kag natukod ang sanga sang Partido sa lokalidad.
Mataas ang suporta sang masa sa ila hangaway. Indi na kinahanglan pa nga maghambal ang mga Pulang hangaway kag awtomatiko sila nga ginadalhan sang pagkaon kag iban pang suporta.
Bisan pa man, indi malikawan nga sa malawig nga pagkadula sang presensya sang hangaway sang banwa sa Nuevo, nakatanom man sang pila ka aset o malain nga mga elemento ang AFP kag PNP diri.
Ang mga ini man ang may rekord sang pagpangawat, pagpanindikato kag pagpang-agaw sang duta sa lugar. Nagsanto ang yunit sang BHB sa kahimtangan nga ini.
Isa ka gab-i, lima ka Pulang hangaway ang nagkadto sa baryo para maghiwat sang pulong masa kag pagtuon. Masunod nga adlaw, duha ka kolum sang mga suldado kag pulis ang naglibot sa baryo. Gindeklarar ang lockdown bangud kuno sa isa ka kaso sang nalatnan sang Covid-19 nga wala sang hayag nga sintomas o asymptomatic. Una nga kaso ini sang Covid-19 sa baryo pero nahibal-an sang tanan nga paguwa lang ini agud hatagan-rason ang lockdown. Sang ulihi nabuyagyag man nga ara sa Maynila ang tawo nga ginatumod nga nalatnan. Ang Pulang hangaway ang tunay nga target sang lockdown sa baryo.
Nagtukod ang mga suldado sang mga tsekpoynt kag nagpalupad sang drone samtang nagaulualihid sa kabalayan.
Nagpamilit sila nga makasulod sa mga balay. Likom sa ila ihibalo, isa sa mga ini ginadayunan sang mga hangaway.
Nag-inisyatiba ang masa para itago ang mga kaupod kag malikawan ang depensiba. Madasig ang ila pasahay sang report. Nagbantay ang mga pamatan-on sa tagsa-tagsa nila ka tambayan kag balay. Ginhanda nila ang salakyan para makalikaw ang ila mga hangaway sa kaaway.
Naatrasar pa sang isa ka adlaw sa isa ka balay ang mga kaupod kag ginsulod na ini sang mga pulis kag suldado. Gintago sila sang tagabaryo sa likod kag nag-insister nga wala sila sang nahibal-an bahin sa presensya sang hangaway sang banwa sa lugar.
Nagbululigay ang mga taga-Nuevo para makaguwa ang mga kaupod sa baryo nga indi mamutikan sang mga suldado. Paisa-isa sila nga ginpalusot tubtob sa makabalik ang lima sa ila yunit.
Ang lockdown nga ini sa Nuevo isa lang sa mga pamatuod sa paggamit sang rehimeng Duterte sa pandemya nga Covid-19 para magserbe sa gera sini nga mapiguson. Ginahimuslan sini ang krisis sa ikaayong lawas para labi pa nga makasabwag sang teror sa kaumhan.
Bisan pa man, labi pa nga napamatud-an sa natabo nga ini nga kon hugot ang paghiliusa sang masa kag hangaway, malutos ang anuman nga tuso nga padihot sang militar kag pulis sa panahon sang pandemya. Sa indi na maisip nga kahigayunan, liwat sini nga ginpakita sang masa nga sila kag sila lamang ang tunay nga baganihan. Kon indi sa ila nga kaisog kag pagpalangga sa ila nga hangaway, indi mangibabaw kag magasulong ang armadong pagbato. (Koresponsal halin sa Southern Tagalog)