Padayon nga nagkakusog ang inter-imperyalistang panagbangi luyo sa panghulhog sa US sa China. Samtang nagkagrabe, nahigop samot ang Pilipinas sa alimpulos niining panagbangi. Ginaatubang sa katawhang Pilipino ang nagkadakong posibilidad nga ang Pilipinas mahimo na usab nga panggubatan sa mga imperyalistang gahum, sama sa nahitabo sa kasaysayan dihang miulbo ang Ikaduhang Gubat Pangkalibutan, ug gipanggubatan sa US ug Japan ang nasud.

Ang maong posibilidad gibunga sa pagluib sa rehimeng Marcos sa kagawasan sa nasud luyo sa nagkakusog ug agresibong panghilabot-militar sa mga imperyalista aron gamitong kuta ang Pilipinas sa ilang panag-away. Ginapugos ni Marcos ang palisiyang “walay kaaway” aron hataga’g rason ang iyang pagka-itoy sa plano sa US nga magtukod ug dugang pang mga base militar sulod sa nasud, ug ang pagpaulipon sa China atubangan sa pagpalapad niini og gahum pang-ekonomiya ug pangmilitar sa mga dagat sulod sa teritoryo sa nasud sa West Philippine Sea.

Nagdali karon ang gobyerno sa US nga magtukod og hangtod lima ka dugang nga base militar ug pasilidad sulod sa mga kampo sa Armed Forces of the Philippines (AFP). Para kuno kini sa paghatod sa hinabang kung adunay kalamidad, apan klaro nga kabahin kini sa pagpangandam sa US alang sa usa ka “teatro sa gubat” nga ang tumong patas-on ang armadong tensyon sa China. Ang plano nga maglunsad og hiniusang “mga ehersisyo sa gubat,” lakip ang plano sa pagdeploy ug labing menos 12,000 ka tropang Amerikano para sa Balikatan sa Abril, giingon nga usa ka hagit, sa ngalan sa “depensa sa kapuluan.”

Gawas sa Pilipinas, gipadako usab sa US ang presensya militar niini sa Japan, Korea ug uban pang nasud palibot sa China. Ang mga higanteng aircraft carrier o mga barkong iggugubat niini kay kanunay’ng nakapwesto sa kadagatan sa Sidlakan ug Kasadpan sa Pilipinas, sa dagat sa Japan ug duol sa Taiwan Strait. Gibaligya niini sa Australia ug duha ka submarinong de-nukleyar aron labaw pang mapalig-on ang presensyang militar sa US ug mga kaalyadong militar niini sa South China Sea.

Ginapagawas sa US nga kining tanan kabahin sa “military deterrence” o estratehiya sa pagpildi sa China, apan sa pagkatinuod usa kini ka opensibang aksyon aron itukmod ang China nga mabalos og aksyong militar. Walay hunong nga giduso sa US ang pagbulag sa Taiwan sa China, supak sa dugay nang One China Policy o pag-ila nga ang Taiwan kabahin sa China. Ginadahom sa US ang China nga “unang mobunot og pusil” ug gamitong rason ang “pagdepensa sa Taiwan” aron maglunsad og armadong interbensyon, sama sa paggamit niini sa Ukraine para hagiton ang Russia.

Bag-o lang mihulga ang embahada sa China sa Pilipinas nga ang plano sa pagtukod og dugang nga mga base militar sa US sa Luzon “(makadaot) sa nasudnong interes sa Pilipinas ug magabutang sa peligro ang kalinaw ug kalig-on sa rehiyon.” Gipasamot lang sa maong pahayag ang kainit sa panagbangi. Dayag niining giinsulto ang dignidad sa mga Pilipino sa pag-ingon kung unsa ang makaayo sa Pilipinas, atubangan nga kini mismo ang nagtukod og mga dagkong pasilidad militar sa South China Sea nga maoy gapang-ilog sa teritoryong kadatan sa Pilipinas ug gapanghikaw sa mga Pilipinong mananagat sa ilang panginabuhi.

Naa sa tunga karon ang Pilipinas sa krusyal nga yugto sa kasaysayan, sa atubangan sa nagkadakong posibilidad nga musilaab ang inter-imperyalistang armadong kaparutan. Karon ang panahon nga palig-unon usab sa katawhang Pilipino ang paghigugma sa nasud ug palig-unon ang pagbarog sa kagawasan sa nasud. Walay pinig nga gitamastamasan ang kagawasan ug dungog sa nasud karon sa mga imperyalistang gahum sa ilang paggamit sa Pilipinas isip natad aron magpasikat, magmaniobra sa militar, ug mangandam sa gubat.

Kinahanglan maghiusa ang tanang Pilipino naghigugma sa kagawasan ug kalinaw. Sa tunga sa nagkagrabeng inter-imperyalista panagbangi, dapat batukan sa katawhang Pilipino ang US ug China sa ilang indigay sa kusog militar, sawayon ang ilang pagpangandam sa gyera nga pandamay sa teritoryo sa Pilipinas, panalipdan ang soberanya sa Pilipinas ug makigbisog para sa tinuod nga nasudnong kagawasan nga walay pagdapig sa indigay tali sa mga imperyalistang gahum.

Dapat batukan sa katawhang Pilipino ang pagtukod og dugang pang mga base militar ug pasilidad sa US sa Pilipinas. Dapat palayason ang tanang tropang Amerikano, kahimanan ug hinagibang militar sa US sa Pilipinas. Sa samang panahon, dapat palayason ang tanang barkong panggyera sa China nga milapas sa teritoryong pandagat sa Pilipinas ug mihikaw sa panginabuhian sa mga Pilipinong mananagat. Dapat suklan ang mahagitong ehersisyong panggyera ug iduso ang pagtangtang sa tanang langyawng base militar sa Pilipinas, sa US man kini o sa China.

Dapat padayon nga pahugtan sa katawhang Pilipino ang pakiglambigit ug pakighiusa sa ubang katawhan sa Asia ug uban pang dapit sa kalibutan nga mibatok sa imperyalistang interbensyong militar sa ilang nasud. Tukuron ug palapdon ang nagkahiusang prente para suklan ang inter-imperyalistang pagpangandam sa gyera aron mapiog ang pagdilaab niini.

Ang nagkataas nga armadong tensyon tali sa US ug China nagapakita sa paspas nga pag-usbaw sa panagbangi sa mga imperyalista taliwala sa hait nga pangkalibutang krisis sa kapitalismo, nga giubanan sa krisis sa sobrang produksyon ug pag-us-os sa tantos sa kita. Nahigot ang mga nag-unang kapitalistang gahum karon sa pagpanalipod sa kaugalingon nilang ekonomya samtang ginapalapad ang ilang neoliberal nga impluwensya ug pamuhunan. Sama sa nangagi, misangko kini sa mga gyera aron usabon ang pagkabahin sa kalibutan tali sa mga imperyalistang gahum.

Supak ang rebolusyonaryong kalihukan sa mga imperyalistang gubat, direkta man o gamit ang mga nasud isip mga pyesa sa chess. Silang tanan nag-alagad sa interes sa monopolyo kapitalista ug nagpig-ot sa interes ug kaayohan sa mga nasud ug naghagong masa. Kinahanglang tukuron ang pinakalapad nga panaghiusa batok sa inter-imperyalistang gubat. Ug kung kini mobuto, kinahanglan kining usbon ngadto sa rebolusyonaryong gubat o pakusgon ang gubat sa katawhan aron tapuson ang imperyalistang paghari ug ipasiugda ang sosyalismo aron makamugna og bag-ong sistema nga motapos sa tanang gubat sa kalibutan.