UPISYAL NANG GIILA sa reaksyunaryong gubyerno ang pagpanag-iya sa 90 ka mag-uumang myembro sa Malayang Kilusang Samahan ng mga Magsasaka ng Tinang (Makisama-Tinang) sa 68 ektaryang yuta sa Hacienda Tinang sa Concepcion, Tarlac niadtong Mayo 8. Bunga kini sa tulo ka dekada nga pakigbisog alang sa yuta ug sa subli nilang paglunsad og kampanyang pagbawi sa yuta sa porma sa bungkalan niadtong Hunyo 2022.

Gitanyag sa Department of Agrarian Reform ang Certificate of Land Ownership Award sa mga taga-Tinang human pipila ka beses kining giatras atubangan sa daghan kaayong serye sa mga protesta, dayalogo ug kampuhan.

“Nagmalampuson kami tungod sa among hiniusang paglihok nga kab-uton ang among katungod ug hustisya. Kung wala mi nagkahiusa ug mibarog, bisan og anaa kanamo kahusto, dili gyud kabubut-ong ihatag ang among katungod. Kinahanglan gyud kining ipakigbisog,” matud kang Alvin Dimarucut, lider sa Makisama-Tinang.

Dungan sa hingpit nga paghatag sa titulo sa yuta, giduso usab sa mga mag-uuma ang pagbasura sa tanang mga kasong gipasaka batok sa Tinang 83 sama sa obstruction of justice, usurpation of property rights, human trafficking, ug child exploitation. Ang Tinang 83 gilangkuban sa mga mag-uuma ug ilang tigsuporta nga giaresto samtang naglunsad og bungkalan niadtong Hunyo 2022.