NAGBARIKADA ANG MGA minero sa Dontog-Manganese Pocket Miners Association (DOMAPMA) batok sa dagkung kumpanya sa mina nga Benguet Corporation, Inc. (BCI) sa Sityo Dalicno, Barangay Ampucao, Itogon, Benguet niadtong Mayo 13. Ang barikada kabahin sa ilang pakigbisog aron panalipdan ang ilang katungod sa yuta ug panginabuhian batok sa pugos nga pagpangilog sa BCI sa mga pocket mine sa DOMAPMA ug dili makatarunganong pagsaka sa abang sa mga himan pangmina.

Sa mando sa BCI, gibawalan sa lokal nga mga ahensya sa gubyerno ang ginagmay nga operasyong mina sa DOMAPMA tungod sa hisgutanan sa “regulasyon” ug “isyung pangkinaiyahan” nga tungod kuno sa operasyon. Nagtoo ang mga minero nga rason lamang kini aron manginlabot ang BCI sa lugar.

Anaa sa 500 hangtud 1,000 ka mamumuo ang mawad-an og trabaho sa iligal nga pagpahunong sa ilang panginabuhian. Apektado usab ang pagtrabaho sa mga minorya sa komunidad ug mga kasikbit nga barangay, ug bisan sa ubang prubinsya sa Cordillera ug Cagayan Valley nga dinhi nagatrabaho.

Sa wala pa gipaundang ang operasyon sa ginagmay nga pagmina, gisulayan na sa BCI nga ilusot ang ilang operasyon sa erya sa DOMAPMA uban ang pipila ka bahin sa mga barangay sa Ampucao ug Virac. Gikunsanbo sa kumpanya ang National Commission on Indigenous Peoples aron iratsada ug manipulahon ang mga dokumento alang sa espesyal nga permit. Laraw nilang likayan ang proseso sa pagkuha sa Free, Prior, and Informed Consent gikan sa mga nasudnong minorya sa lugar.

Ayha niini, naghimo na og barikada batok sa abusado ug makawkawong BCI ang uban pang mga residente sa Barangay Ampucao niadtong Abril. Duso nilang himuong mas barato ang presyo sa mga himang pangmina nga ginapaabang kanila.