Ibalik ang 5-ka-tuig nga prangkisa! Nagprotesta ang gatusan ka drayber ug opereytor sa dyip niadtong Mayo 16 atubangan sa LTFRB sa Quezon City aron kundenahon ang kamanduan nga dakpon ang mga wala nagpailalum sa pugos nga konsolidasyon sa mga prangkisa. Giduso sa mga drayber ug opereytor nga ibalik ang ilang 5-ka-tuig nga indibidwal nga prangkisa alang sa ilang panginabuhian. Niadtong Mayo 14, nagprotesta usab sila atubangan sa Korte Suprema aron iduso ang korte nga magpagula na og tubag sa ilang petisyon aron ipahunong ang pugos nga konsolidasyon ug implementasyon sa PUVMP.

Lider-mamumuo sa KMU-SMR, gipangita sa kampo-militar. Naglunsad og search mission ang mga paryente ni William Lariosa, gidagit nga lider-mamumuo sa Southern Mindanao, niadtong Mayo 14. Miadto sila sa kampo sa 1003rd IBde sa Davao City human madawat ang usa ka tip nga didto gitago si Lariosa. Miadto usab sila sa rehiyunal nga upisina sa CHR ug DOLE sa Davao City aron idangop ang kaso sa gidagit nga lider.

Adlaw sa Mamumuong Panglawas, gidumdum. Nagmartsa ang mga mamumuong panglawas niadtong Mayo 7 sa Maynila ug Baguio City. Panawagan nila ang makabuhi nga sweldo, seguridad sa trabaho, dugang nga mga personel sa ospital, mga katungod sa pamuo ug katungod sa katawhang Pilipino sa kahimsog. Gilunsad usab nila ang mga protesta ug uban pang aktibidad sa mga syudad sa Iloilo, Bacolod, ug Cebu, sa Camarines Norte, ug mga rehiyon sa Soccsksargen ug BARMM. Gipasiugdahan kini ng Health Workers United for Wage Increase ug Alliance of Health Workers.

Mga mamumuo sa PLDT, magwelga. Mibotar ang 3,390 sa kinatibuk-ang 4,041 ka unyonisadong mamumuo sa PLDT pabor sa pagwelga atubangan sa dili pagtubag sa maneydsment sa panawagang ablihan ang negosasyon sa CBA para sa 2024-2027. Gilunsad nila ang strike vote o pagbotar nga magwelga niadtong Mayo 14-15 sa tanang sangay ug upisina sa PLDT sa nasud. Tulo ka bulan na dihang gisumite sa unyon ang pahibalo para sa negosasyon apan walay tubag ug tinuyo nga ginalangan sa kumpanya ang pagsugod niini. Nagprotesta usab sila sa DOLE sa Intramuros, Manila niadtong Mayo 13.

73-ektaryang yuta sa Angeles City, pakigbisugan. Nagpiket ang mga mag-uuma ug residente gikan sa Barangay Anunas, Angeles City, Pampanga sa DAR ug Kongreso niadtong Mayo 13 ug 14. Gipanawagan nila ang pagbawi sa 73-ektaryang yuta sa Sityo Balubad nga giilog sa Clark Hills Properties Corporation. Nagpasaka og resolusyon sa Kongreso aron imbestigahan ang pagpangilog sa yuta.