Sa milabayng mga semana, walay-puas ang terorismo sa estado ilalum sa rehimeng Marcos. Nataho ang mga kaso sa pagpamomba, iligal nga pagpangaresto ug pagpamig-ot pinaagi sa pagkaso sa “terrorism financing” batok sa mga demokratikong organisasyon ug sektor.

Pagpamomba. Naghulog og 10 ka bomba ang mga jet fighter sa Philippine Air Force sa mga barangay sa Peñablanca, Cagayan niadtong Mayo 10 sa alas-2 sa kaadlawon. Gihulog kini sa Sityo Ebi, Lapi ug kasikbit nga mga barangay. Nadungog ang alingogngog nga mga pagbusikad, istraping ug paglupad sa jet fighter hangtud sa mga lungsod sa Baggao, Enrile, Amulung ug sa Tuguegarao City. Dili moubos sa 690 pamilya ang napugos nga mibakwit tungod sa teroristang pag-atake sa militar sa mga komunidad.

Pag-aresto. Giaresto niadtong Abril 21 sa mga sundalo ang 4-ka-bulang mabdos nga Dumagat-Remontado nga si Manilyn dela Cruz. Giakusahan siyang myembro sa Bagong Hukbong Bayan (BHB), ug gipasakahan og patung-patong nga kasong kriminal. Sa wala pa gidakop, nakahiagum siya og igo pinusilan gikan sa paturagas nga pagpamusil sa mga sundalo sa payag nga iyang gipuy-an uban ang pamilya sa Sityo Pinamaypayan, Barangay Umiray, Dingalan, Aurora.

Sa Taguig City, gihukman ug gipriso niadtong Mayo 16 sa kasong rebelyon ang NGO worker nga si Maria Salome Crisostomo-Ujano, edad 67. Gilambigit si Ujano sa usa ka engkwentro sa BHB ug mga sundalo sa Quezon nga nahitabo niadtong Nobyembre 2005.

Sa Cebu City, gipaaresto niadtong Mayo 13 ang 26 ka kasamtangan ug kanhing ginsakpan sa Community Empowerment Resource Network (Cernet) Inc (lakip ang tulo ka patay na) ug usa ka lider-mamumuo sa kasong “terrorism financing.” Ginaakusahan ang organisasyon sa paghatag og pondo sa BHB-South East Negros. Nagpyansa ang mga biktima aron temporaryong makagawas.

Pagpaulan og bala. Nagpaulan og bala ang 94th IB sa Barangay Carol-an, Kabankalan City, Negros Occidental niadtong Mayo 6 nga gipagawas niining usa ka engkwentro. Tungod sa pagpamusil, nagbakwit ang kapin 480 ka residente sa Sityo Tagoc, Bobon, ug Matampa sa Barangay Carol-an. Lakip sa napugos mobakwit ang 146 ka bata ug 14 ka tigulang.

Kalapasan sa kababaye-an. Gipahubo ang mga asawa sa mga detenidong pulitikal nga mibisita sa National Bilibid Prison niadtong Abril 21. Usa kanila ang 10 ka beses nga gipapuk-ong sa usa ka upisyal sa prisohan. Sa rason nga mangita og iligal nga droga, sagad nga ginapatuwad ug ginasil-ipan ang pribadong bahin sa mga babayeng nagabisita sa prisohan.

Pagpamig-ot. Gihadlok ug gipig-ot sa mga ahente sa 10th ID si Ricardo Baron, 71, organisador sa Transmision-Piston niadtong Mayo 9 sa Agdao, Davao City. Duha ka oras siyang “giistorya” ug “ginapasurender.”

Sa Ilocos Norte, arbitraryong gikumpiska sa lokal nga pulis ang mga questionnaire sa Alyansa ng mga Magsasaka sa Ilocos Norte (AMIN) nga nagatuki sa kahimtang sa komunidad atol sa El Niño sa Barangay Puzol, Pinili niadtong Mayo 10. Matud sa AMIN, miadto ang mga upisyal sa pulis sa balay sa usa ka residente sa barangay kung asa gikumpiska ang mga dokumento.