PIPILA KA SEMANA ayha ang ika-7 ka tuig nga anibersaryo sa pagpamomba sa Armed Forces of the Philippines (AFP) sa Marawi City, nagpahigayon og lihok-protesta ang mga residente aron iduso ang hilabihang nadelatar nga hustisya. Niadtong Mayo 13, nagtapok sa Rizal Park sa syudad ang mga residente nga hangtud karon wala pa nakabalik sa ilang mga komunidad.

Gibatikos nila ang paggahin og mumho sa Marawi Compensation Board (MCB) sa angayang madawat nila nga kumpensasyon o bayad danyos aron subling tukuron ang naguba nilang mga balay ug katigayunan. Imbes nga ihatag kanila ang igong pondo, nagpagula og bag-ong “pamaagi” sa pagkwenta sa kadaut ang MCB kung asa gikibhang ang “depreciation cost” (pag-ubos sa bili tungod sa paglabay sa panahon o pagkaguba) sa katigayunan. Mas karaang istruktura, mas daku ang kibhang ug sa ingon mas gamay ang kumpensasyon. Ilalum niini, awtomatikong kibhangan og 60% hangtud 85% ang gitakdang kumpensasyon sa usa ka claimant kung minimum nga 10 ka tuig na kining nakabarog ayha gibomba sa AFP.

Sukwahi kini sa unang gitakdang proseso sa Implementing Rules and Regulations (IRR) sa Marawi Siege Victims Compensation Act. Gitakda sa maong balaod ang kumpensasyon subay sa “fair market value” (o presyo sa merkado) nga resulta sa mga konsultasyon sa mga claimant, o sa “replacement cost” o “repair cost” sa mga hingpit nga naguba o adunay bahin nga nagubang mga balay o kultural ug komersyal nga mga bilding. Walay awtoridad ang MCB nga bag-ohon ang mga istandard sa pagkwenta nga nakasulat na sa balaod, matud sa mga nagprotesta.

Gibanabana nga kinahanglang maggahin ang gubyerno sa dili moubos sa ₱5 bilyon kada tuig aron mabayran ang tanang giguba sa AFP. Lima ka tuig lamang magatunhay ang MCB, ug pagkahuman niini wala nay madawat ang mga biktima.