Upisyal nang natapos ang Balikatan 39-24 niadtong Mayo 10, apan ania pa gihapon sa Pilipinas ang liboan ka sundalong Amerikano alang sa ikaduhang serye sa Salaknib-24 nga unang gilunsad niadtong Abril. Daghan pang mosunuray nga mga war games ang “hilum” nga ipahigayon sa US sa nasud. Ania pa gihapon sa nasud ang mga sundalong Australian para sa Kasangga exercise.

Niadtong Mayo 11, gilunsad ang Salaknib sa lungsod sa Basco, Batanes. Sa takuban sa “port improvement project” gisugdan sa US Army ug Philippine Army ang paghakot og bato gikan sa Basco Port. Ginasulting “civilian port” ang nahisgutang pantalan apan sa pagkatinuud kini magsilbing dungguanan sa mga barkong iggugubat sa US. Dugang ang dungguanan sa uban pang pasilidad nga gitukod sa US sa Chadpidan, Basco ug sa San Rafael, Itbayat ug Mavulis Island.

Dungan niini, gisugdan ang Kasangga war games tali sa Philippine Army ug Australian Defense Force (ADF) nga gisalmutan sa 100 ka tropang Pilipino ug 50 ka sundalong Australian niadtong Mayo 13 sa hedkwarters sa 5th ID sa Gamu, Isabela, nga molungtad hangtud Hunyo 21.

Kabahin sa maong war games ang pagbuhi og mga mortar ug drone operations nga nagbunga og kalisang sa mga komunidad, ug “pagbatok sa terorismo” nga nag-unang nakapunting sa pagpanghasi sa mga mag-uuma ug aktibista.

Samtang, pagalunsaron sa US ang RimPac war games sa lain-laing bahin sa Asia ug US gikan Hunyo 29 hangtud Agosto 4. Gitawag nga “pinakadakung naval war games” sa tibuok kalibutan ang RimPac (Rim of the Pacific). Mosalmot dinhi ang Pilipinas.

Kontra-Balikatan 39-24

Sa pagtapos sa Balikatan niadtong Mayo 10, nagsunog og bandera sa imperyalistang US ang lain-laing grupo atubangan sa hedkwarters sa AFP sa Camp Aguinaldo, Quezon City. Gibatikos nila ang pagyatak sa US sa soberanya sa Pilipinas, mga paglapas niini sa tawhanong katungod, ug pagguyod sa Pilipinas sa pagpanghagit niini og gyera sa kaaway nga imperyalistang China. Nagsab-it usab og mga balatengga ang mga grupo sa Ilocos Norte niadtong Mayo 6.

Samtang, gilunsad sa Kabataang Makabayan (KM) sa Australia ug Katipunan ng mga Gurong Makabayan (Kaguma) ang mga aktibidad aron kundenahon ang Balikatan. Gipintalan sa KM ang konsulado sa US sa Melbourne niadtong unang semana sa Mayo.

Samtang, nagsab-it og dakung balatengga ang mga myembro sa Kaguma sa usa ka tulay sa Malibay, Pasay niadtong Mayo 10. Nakasulat dinhi ang “Batukan ang imperyalistang gubat! Iasdang ang demokratikong rebolusyon sa katawhan!”