Nagturpos ti basaran a Kurso ti Partido dagiti Nalabbaga a mannakigubat ti New People’s Army (NPA) ken kameng ti Partido Komunista ng Pilipinas idi umuna a lawas ti Mayo idiay kabambantayan ti Surigao del Sur. Ti panagadal ket inrussuat iti istagard a wagas kas panang-annatop iti kasasaad a militar ken dadduma pay nga ubra ti armada ti umili iti nasao a probinsya.

Ti panagadal ti BKP ket nangrugi idi Abril 10 ken opisyal a naglippas idi Mayo 3. Maysa a seremonya ti panagturpos ti inrussuat da idi Mayo 6 nga addaan ti tema a ” Ti balligi ti NPA, balligi ti Umili”.

Iti dua nga oras a programa, nangipaay kadagiti mensahe dagiti opisyal ti yunit ti NPA ken dagiti nagturpos. Agkakapintas met a pabuya ti inparang dagiti mannakigubat iti programa a pangkultura.

Sungbat ti panagadal iti atas ti Komite Sentral a panangipatungpal iti tignay a panagilinteg. “Inrussuat mi ti BKP tapno maarmasan ti teorya ti Marxismo-Leninismo-Maoismo ti puersami nangruna dagiti narekrut iti Partido a saan a dagus a naikkan ti edukasyon gapo iti narigat a kasasaad a sinango nga inbunga dagiti internal a kakapuyan,” kuna ti yunit.

Iti seremonya ti panagturpos, nagsapata da manen iti Nalabaga a bandera ti Partido tapno mapatalgedan ti takder da ken lagipen ti sapata da.