Nakatapos sang batayang Kurso ng Partido (BKP) ang mga Pulang hangaway sang Bagong Hukbong Bayan (BHB) kag katapo sang Partido Komunista ng Pilipinas sadtong una nga semana sang Mayo sa kabukiran sang Surigao del Sur. Ang pagtuon ang ginlunsar sa istagard nga pamaagi isip pagpahaum sa sitwasyon militar kag iban pa nga mga hilikuton sang hukbong bayan sa nasambit nga prubinsya.

Nagsugod ang pagtuon sa BKP sadtong Abril 10 kag upisyal nga natapos sadtong Mayo 3. Isa ka seremonya sang pagpatapos ang ginlunsar nila sadtong Mayo 6 nga may tema nga “Ang kadalag-an sang BHB, Kadalag-an sang Pumuluyo.”

Sa sulod sang duha ka oras nga programa, naghatag sang mga mensahe ang mga upisyal sang yunit sang BHB kag mga nakatapos. Madinuagon nga pasundayag man ang ginpakita sang mga hangaway sa programang pangkultura.

Sabat ang pagtuon sa gintahas sang Komite Sentral nga pagpatuman sa kahublagan panadlong. “Ginlunsar namon ang BKP para maarmasan sang teorya sang Marxismo-Leninismo-Maoismo ang amon pwersa ilabi na ang narekrut sa Partido nga wala gilayon nahatagan sang edukasyon tungod sa mabudlay nga kahimtangan nga ginpangatubang bunga sang internal nga mga kahuyangan,” pahayag sang yunit.

Sa seremonya sang pagpatapos, liwat sila nga nanumpa sa Pulang bandera sang Partido para pabakuron ang ila panindugan kag lab-ason ang ila nga mga panumpa.