Duguon ang kamot sang reaksyunaryong estado sang India sa mas ginpabaskog nga gyera sang pagpanumpo batuk sa pumuluyo sini. Sugod Enero, ginapatuman sini ang Operation Kagaar, kabahin sang ginpalapnag nga pagpatuman sa kontra-insurhensya nga kampanya nga Operation SAMADHAN-Prahar. Indi magnubo sa 130 ka sibilyan kag mga rebolusyonaryo na ang napatay sa mahigko kag brutal nga operasyon nga ini sa nagligad nga lima ka bulan.

Sa direkta nga paglubad, nagakahulugan ang tinaga nga kagaar sang “katapusan.” Base sa estado sang India, katuyuan sang nasambit nga operayon nga lubos na nga tapuson ang armado nga rebolusyonaryong kahublagan sang pumuluyong Indian, nga ginapamunuan sang Communist Party of India (Maoist), nga subong yara sa “bibi” na sang pagkaperdi.

Nagapanguna nga ginapatuman ang operasyon sa Abujhmaad (ukon Maad), isa ka bukiron kag lasangon nga rehiyon sa sur sang estado sang Chhattisgarh. Katuyuan sini nga “hilwayon ang Maad” nga ginahambal nagapanguna nga kuta sang mga Maoista. Sa subong, ginapatuman na ini sa mas dako nga bahin sang rehiyon sang Dandakaranya nga yara sa sakop sang mga estado sang Chhattisgarh, Odisha, Telangana, kag Andhra Pradesh sa Central India.

Ginbansagan ang operasyon isip “opensiba militar” batuk sa mga Maoista, pero ang matuod, ginatarget sini ang tanan nga Partido, organisasyon kag indibidwal nga nagatuad batuk sa estado.

Pagtapak sa internasyunal nga makitawhanon nga laye

Lantaran nga ginalapas sang Operation Kagaar ang internasyunal nga makitawhanon nga laye, mga pagsulundan sa inaway kag mga ispesyal nga proteksyon sang mga bulnerable nga sektor sa panahon sang armado nga kinagamo. Pinakamadako nga biktima sang pasismo nga Brahmanic Hindutva (pasismo sang estado nga Indian batuk sa mga minorya nga relihiyon kag manubo nga grupo pangkatilingban) ang mga Adivasi ukon mga tumandok.

Sa sulod lang sang duha ka semana sadtong Mayo, 22nga mga Adivasi, kabahin ang duha ka bata, ang ginpatay sang mga pwersa militar sa Chhattisgarh.

Ginmasaker sang paramilitary sa Bijabur ang 12 Adivasi sadtong Mayo 11. Nagakuha sang mga dahon sang tendu (ginagamit nga pangputos sang sigarilyo) ang mga biktima sang gin-abdak kag patyon. Ginbilanggo pa sang estado ang 30 ka mga aktibista, mga balo sang biktima, kag pamilya nga makuha kuntani sa mga bangkay sang ginmasaker.

Pagkasunod adlaw, duha ka bata ang napatay kag madamo ang napilasan sa paglupok sang isa ka nasalapay nga bala sang mortar nga ginbilin sang mga paramilitar sa Odspara, Bijapur. Ang mortar ang kabahin sa madamo nga bala sang kanyon nga wala naglupok sang nanganyon ang mga pwersa militar sa kalasangan sang nasambit nga lugar.

Sadtong Mayo 24, walo ka mangunguma nga Adivasi ang gin-aresto kag ginpatay sa pagpaniro sang pwersa militar sang India sa Rekavaya, yara sa dulunan sang Bijapur kag Narayanpur. Isa pa ka mangunguma ang napilasan diri.

Samtang, sadtong Abril 16 sa kalasangan sang Aapatola-Kalpar, distrito sang Kanker, brutal nga gintortyur bag-o hungod nga ginpatay sang pwersa militar sang India ang 11 ka indi armado nga mga rebolusyonaryo kag anom ka iban pa nga napilasan sa una nga hugna sang pag-atake. Namartir sa una nga pag-atake ang 12 ka hangaway sang People’s Liberation Guerilla Army.

Hungod nga ginpatay man pagkatapos maaresto sa Kakur-Tekametta sa dulunan sang estado sang Chhattisgarh kag Maharashtra sadtong Abril 30 ang 66-anyos nga si Cheemala Narasayya (Ka Joganna), katapo sang panrehiyon nga komite sang CPI (Maoist). Sa amo nga adlaw, apat nga Adivasi ang ginpatay sa pagpaniro sa amo nga lugar.

Masami nga ginapagwa sang pwersa militar sang India nga napatay ang mga biktima sa mga “engkwentro” sini sa mga Maoista. Magluwas pa, asud-asod ang pagtukod sang mga kampo-militar sa mga komunidad sa sakop sang Maad.

Updanay ang Operation Kagaar kag katimbang sini nga militarisasyon sa korporatisasyon kag pagsulod sang dalagko nga mga kumpanya sa manggaran nga lasang sang India. Sa tabon sang pagbato sa mga Maoista, nagaserbe ang mga operasyon nga ini sa pagpabaskog sang pagpangawat sang mga dumuluong nga dalagko nga korporasyon sa dunang manggad sang pungsod.