Daradara ti ima ti reaksyonaryo nga estado ti India iti pinakaro a gerra ti panangparmek iti umili na. Agsipod Enero, ipatpatungpal na ti Operation Kagaar, paset ti nalawlawa a panangipatungpal iti kontra-insurhensya a kampanya nga Operation SAMADHAN-Prahar. Saan a kumurang iti 130 a sibilyan ken dagiti rebolusyonaryo ti napapatay kadaytoy narugit ken naranggas nga operasyon iti napalabas a lima bulan.

Iti literal a patarus, kaipapanan ti sao a kagaar ti “gibus nan.” Segun iti estado ti India, panggep ti nasao nga operasyon a naan-anay a gibusanen ti armado a rebolusyonaryo a tignay ti umili nga Indian, nga idadauloan ti Communist Party of India (Maoist), nga itatta ket “agngangabit” a maatiwen.

Kangrunaan a maipatpatungpal ti operasyon idiay Abujhmaad (wenno Maad), maysa a kabanbantayan ken kabakiran a rehiyon iti abagatan ti estado ti Chhattisgarh. Panggep na a “wayawayaan ti Maad” a makunkuna a kangrunaan a kampo dagiti Maoista. Iti agdama, maipatpatungpalen daytoy iti dakdakkel a paset ti rehiyon a Dandakaranya nga adda iti sakop dagiti estado ti Chhattisgarh, Odisha, Telangana, ken Andra Pradesh idiay Central India.

Naawagan ti operasyon kas “opensiba a militar” maibusor kadagiti Maoista, ngem ti agpayso, pinuntirya na ti amin a partido, organisasyon ken indibidwal nga agsasao laban iti estado.

Panangsalungasing iti internasyunal a makatao a linteg

Nalawag a lablabsingen ti Operation Kagaar ti internasyunal a makatao a linteg, dagiti annuruten iti gubat ken dagiti naisangsangayan a proteksyon dagiti bulnerable a sektor iti panawen ti armado a risiris. Kadakkelan a biktima ti pasismo a Brahmanic Hindutva (pasismo ti estado nga Indian maibusor kadagiti minorya a relihiyon ken nababa a grupo ti kagimongan) dagiti Adivasi wenno dagiti katutubo.

Iti las-ud laeng ti dua a lawas idi Mayo, 22 nga Adivasi, karaman ti dua nga ubbing, ti pinatay dagiti pwersa a militar idiay Chhattisgarh.

Minasaker ti paramilitar idiay Bijabur ti 12 Adivasi idi Mayo 11. Mangal-ala kadagiti bulong ti tendu (maus-usar a pangbungon ti sigarilyo) dagiti biktima idi pinidut ken papatayen ida. Inpupok pay ti estado dagiti 30 nga aktibista, dagiti balo ti biktima, ken pamilya a mangala kuma kadagiti bangkay ti namasaker.

Kabigatan na, dua nga ubbing ti natay ken ado ti nasugatan iti panagbettak ti maysa a nakuti a bala ti mortar nga inbati dagiti paramilitar idiay Odspara, Bijapur. Ti mortar ket karaman iti ado a bala ti kanyon a saan a pimmutok idi nagkanyon dagiti pwersa a militar iti kabakiran ti nasao a lugar.

Idi Mayo 24, walo a mannalon nga Adivasi ti inaresto ken pinatay iti panangpaltog ti pwersa a militar ti India idiay Rekavaya, iti nagbeddengan ti Bijapur ken Narayanpur. Maysa pay a mannalon ti nasugatan ditoy.

Kabayatan na, idi Abril 16 idiay kabakiran ti Aapatola-Kalpar, distrito ti Kanker, naranggas a tinortyur sakbay nga inggagara a pinatay ti pwersa a militar ti India dagiti 11 a di armado a rebolusyonaryo ken innem a dadduma pay ti nasugatan iti umuna nga panagraut. Nagmartir iti umuna a panagraut ti 12 a mannakigubat ti People’s Liberation Guerilla Army.

Naigagara met a pinatay da kalpasan a maaresto idiay Kakur-Tekametta iti nagbeddengan ti estado ti Chhattisgarh ken Maharashtra idi Abril 30 ti agtawen 66 a ni Cheemala Narasayya (Ka Joganna), kameng ti pangrehiyon a komite ti CPI (Maoist). Kadaydiay nga aldaw, uppat nga Adivasi ti pinatay da iti panangpaltog kadaydiay a lugar.

Masansan nga ipalgak ti pwersa a militar ti India a matmatay dagiti biktima kadagiti “engkwentro” na kadagiti Maoista, Laksid pay, agsasaruno ti panangipasdek da kadagiti kampo-militar kadagiti komunidad idiay sakop ti Maad.

Ti Operation Kagaar ken ti militarisasyon ket kakuyog ti korporatisasyon ken panagserrek dagiti dadakkel a kumpanya iti nabaknang a kabakiran ti India. Iti linged ti pananglaban kadagiti Maoista, agserserbi dagitoy nga operasyon iti panangpakaro ti panangtakaw dagiti ganggannaet a dadakkel a korporasyon iti natural a kinabaknang ti pagilian.