Gintiro kag ginpatay sang 7th IB sadtong Hunyo 9 sa Sityo Kiluding, Barangay Kiadsam, Sen. Ninoy Aquino, Sultan Kudarat ang 16-anyos nga estudyante nga si Eusibio Cranzo, nga kilala man nga Kuni Cuba. Papuli siya upod ang iya utod kag duha ka abyan sang nahitabo ang pagpamatay.

Base sa mga report, nasugata nila Cranzo ang naga-operasyon nga yunit sang 7th IB sang palukpan sila. Gilayon nga naigo si Cranzo, samtang nakadalagan sa katambi nga maisan ang tatlo niya ka upod. Ginpagwa sang mga suldado nga nakumpiskar sa biktima ang isa ka riple nga Garand kag ginapasibangdan siya nga miyembro sang Bagong Hukbong Bayan.

Samtang, nalista ang iban pa nga mga kaso sang paglapas sa tawhanon nga kinamatarung sa nagligad nga mga semana.

Pagpamomba. Ginabulubanta nga 2,700 ang apektado sang aerial bombing sang 54th IB sa idalom sang 503rd IBde sa Barangay Maling, Balbalan, Kalinga sadtong Hunyo 7. Duha ka helicopter ang naobserbaran sang mga residente nga nagalibut-libot kag naghulog sang mga bomba.

Sa Nueva Viscaya, walo ka beses nga ginbomba sang 7th ID ang Barangay Abuyo, Alfonso Castañeda sadtong Hunyo 20 sang kaagahon. Asud-asod man ang pagpalupok sang duha ka attack helicopter kag naggamit sang mga drone ang AFP diri.

Pag-aresto. Napulo ka adlaw nga ginpriso si Edison Yu pagkatapos arestuhon sang mga pulis sadtong Hunyo 8 malapit sa embahada sang Israel sa Bonifacio Global City sa Taguig City. Si Yu ang magatambong kuntani sa protesta kontra henosidyo sang Israel sang ginkuha.

Sa Kalinga, gin-aresto sang 54th IB ang isa ka nagahingalan nga Gap-idan Claver Bawit nga ginpasibangdan sini nga hangaway sang BHB sa Barangay Balantoy, Balbalan sadtong Hunyo 6.

Pagpang-ipit. Sa Bulacan, ginreyd sang 80th IB kag pulis ang balay sang lider-pesante nga si Ronnie Manalo sa Barangay San Roque, San Jose del Monte City sadtong Hunyo 18. Ginapagwa sang pulis nga nakuha sa balay ang mga armas, granada kag iban pa nga gamit bisan wala tawo diri. Sa pareho nga adlaw, ginkadtuan sang mga suldado ang balay sang lider-pesante nga si Cecilia Rapiz sa Barangay Paradise 3 sa amo nga syudad.

Sa Rizal, pasulit-sulit nga gin-ipit sang mga suldado ang 80-anyos nga lider-mangingisda nga si Romy Antazo. Sadtong Mayo, ginkuha siya sang apat ka suldado kag pilit nga gindala sa munisipyo para “estoryahon.”

Sa Negros Occidental, iligal nga ginsulod kag ginpang-ukay sang mga suldado sang 94th IB kag paramilitary ang pito ka balay sa Sityo Cabagal, Barangay Buenavista, Himamaylan City sadtong Hunyo 7. Gin-ipit man sang mga suldado si Evelyn Manait, myembro sang Ituman-Bukidnon, sa Barangay Amontay, Binalbagan sadtong Hunyo 13.

Sadtong una nga semana sang Hunyo, “ginbisita” sang mga pwersa sang estado sila ni Mafel Macalanda kag Linda Ladino, mga lider-tumandok sa Cagayan Valley, sa ila mga balay sa Baguio City kag Cagayan para paandaman sila nga paga-arestuhon.