Gipusil patay sa 7th IB niadtong Hunyo 9 sa Sityo Kiluding, Barangay Kiadsam, Sen. Ninoy Aquino, Sultan Kudarat ang 16-anyos nga estudyante nga si Eusibio Cranzo, naila usab isip Kuni Cuba. Pauli siya kauban ang iyang igsuon ug duha ka higala dihang mahitabo ang pagpatay.

Matud sa mga taho, nasugatan nilang Cranzo ang nag-operasyong yunit sa 7th IB dihang rakrakan sila. Dihadiha nga naigo si Cranzo, samtang nakadagan sa duul nga maisan ang tulo niyang kauban. Ginapagawas sa mga sundalo nga nakumpiska sa biktima ang usa ka ripleng Garand ug giakusahan siyang myembro sa Bagong Hukbong Bayan.

Samtang, nataho ang uban pang mga kaso sa paglapas sa tawhanong katungod sa milabayng mga semana.

Pagpamomba. Gibanabanang 2,700 ang apektado sa aerial bombing sa 54th IB ilalum sa 503rd IBde sa Barangay Maling, Balbalan, Kalinga niadtong Hunyo 7. Duha ka helikopter ang naobserbahan sa mga residente nga nag-alirong ug nanghulog og mga bomba.

Sa Nueva Vizcaya, walo ka beses nga gibomba sa 7th ID ang Barangay Abuyo, Alfonso Castañeda niadtong Hunyo 20 sa kaadlawon. Sunud-sunod usab ang pagpang-istraping sa AFP gamit ang duha ka attack helicopter inubanan sa mga drone.

Pag-aresto. Napulo ka adlaw nga gipriso si Edison Yu human giaresto sa mga pulis niadtong Hunyo 8 duul sa embahada sa Israel sa Bonifacio Global City sa Taguig City. Mosalmot unta si Yu sa protesta kontra henosidyo sa Israel dihang gidakop.

Sa Kalinga, giaresto sa 54th IB ang usa ka ginganlang Gap-idan Claver Bawit nga giakusahan niining manggugubat sa BHB sa Barangay Balantoy, Balbalan niadtong Hunyo 6.

Pagpamig-ot. Sa Bulacan, gireyd sa 80th IB ug pulis ang balay sa lider-pesante nga si Ronnie Manalo sa Barangay San Roque San Jose del Monte City niadtong Hunyo 18. Ginapagawas sa mga pulis nga nakuha sa balay ang mga armas, granada ug uban pang gamit bisan walay tawo dinhi. Sa parehong adlaw, giadtuan sa mga sundalo ang balay sa lider-pesanteng si Cecilia Rapiz sa Barangay Paradise 3 sa parehong syudad.

Sa Rizal, balik-balik nga gipig-ot sa mga sundalo ang 80-anyos nga lider-mangingisda nga si Romy Antazo. Niadtong Mayo, gikuha siya sa upat ka sundalo ug pugos nga gidala sa munisipyo aron “pasurenderon.”

Sa Negros Occidental, iligal nga gisulod ug giutingkay sa mga sundalo sa 94th IB ug paramilitar ang pito ka balay sa Sityo Cabagal, Barangay Buenavista, Himamaylan City niadtong Hunyo 7. Gipig-ot usab sa mga sundalo si Evelyn Manait, myembro sa Ituman-Bukidnon, sa Barangay Amontay, Binalbagan niadtong Hunyo 13.

Niadtong unang semana sa Hunyo, “gibisita” sa mga pwersa sa estado silang Mafel Macalanda ug Lina Ladino, mga lider-katutubo sa Cagayan Valley, sa ilang mga balay sa Baguio City ug Cagayan aron hulgaon sila nga arestuhon.