Limmatak manen itay nabiit ti usapin kanaig iti diborsyo idi inaprobaran iti nababbaba a kapulungan iti Kongreso ti gakat a pagbalinen daytoy a linteg iti Pilipinas. Maiduma iti annulment (panangpukaw ti bileg ti kasar) ken ligal a panagsina, ti ligal a pagpilian iti diborsyo ket panangwaswas iti kasar, panangisubli iti saad a “single” ti agassawa ken panangipalubos kadakuada nga agpakasar iti sabali.

Addan ti linteg iti amin a pagilian iti intero a lubong, malaksid iti Pilipinas ken Vatican City. Iti kabuklan, mabigbigbig ti diborsyo kas karbengan dagiti babbai tapno gun-oden ti hustisya, nangruna kadagiti kaso iti kinaranggas iti uneg ti pagtaengan, kasar iti ubing, ken pinansyal a panangadipen. Ik-ikkan na daytoy dagiti babbai iti ligal a pagpilian tapno panawan ti manangidadanes ken makabekkel a panagdenna, maaddaan ti independensya iti pinansya ken kariten ti patriyarkal nga urnos nu sadinno ket maibilbilang isuda a sanikua dagiti assawa da.

Uray saan a nakailanad iti linteg, ti panagsina ket gagangay a kinapudno wenno obhetibo a kasasaad iti intar ti umili iti Pilipinas. Gapu daytoy iti agraraira a malunglungsot a gimong nga agparparnuay kadagiti kondisyon iti panagsina dagiti agassawa.

Talaga a nakapsut, nu saan a nakakatkatawa, dagiti argumento laban iti diborsyo. Saan a lapped ti relihiyon kadagiti adu a pagilian tapno bigbigen ti pagkasapulan a pagbalinen daytoy a linteg tapno tarabayan dagiti panagsisina ken siguradoen dagiti karbengan ken pagimbagan ti amin a maseknan.

Iti uneg ti rebolusyonaryo a tignay, mabigbig iti diborsyo kas karbengan babaen kadagiti alagaden iti kasar. Sakop dagitoy nga alagaden dagiti relasyon ti lallaki ken babbai, ken iti nagbaetan dagiti indibidwal nga agpada iti kasarian. Daytoy a panangbigbig ket tumataud iti dialektikal a materyalista a pannirigan nga agbalbaliw ti banbanag, karaman ti relasyon iti uneg ti maysa a kasar. Panangbigbig met laeng daytoy iti agraraira a kinapudno nga adda ti manangidadanes, saan a patas, ken manangabuso a panagdenna, kasta met ti posibilidad a mapukaw ti panagayat ken talek iti nagbaetan ti agassawa.

Ibangbangon ken padpadur-asen dagiti rebolusyonaryo ti relasyon dagiti agnobyo ken agnobya, ken agassawa, iti pundasyon ti class love (panagayat iti kadasig) ken sex love (panagayat iti indibidwal). Sakbay a sumrek iti kasar, kidkiddawen iti tunggal kadua a pagpanunotan ken seryoso a pagsaganaan ti biag ti agassawa ken rebolusyonaryo a panagpamilya. Nu dumanon iti diborsyo, idaldalan daytoy iti proseso nu sadinno ket idatdatag kadagiti yunit ti petisyon tapno waswasen ti kasar ken kolektibo daytoy nga am-amirisen ken pagdesdesiyunan.

Palpalubosan iti diborsyo kadagiti kaso nga adda panagtraydor wenno napeklan a kontra-rebolusyonaryo iti maysa iti agassawa; pannakikamalala, bigamiya, kinaulpit wenno panagpangta iti biag ti asawa; pannakapaay nga ipatungpal dagiti rebbengen kas asawa iti uneg ti lima tawen gapu iti pannakatiliw iti kabusor wenno permanente a pisikal a rangkap (nu pagnumoan ti agassawa); nu iti maysa iti agassawa ket pimmanaw iti pagrebbengan na iti uneg ti dua tawen wenno naawanan iti silpo iti lima tawen; nu iti agassawa ket addaan iti personal a saan a pagkinnaawatan a nagresulta iti pannakadadael ti relasyon, ken nu ti relasyon ket nagbalinen a padagsen iti agassawa ken iti trabaho da iti Partido.

Kadagiti kaso iti nakaro a panaglabsing, kas iti napalalo a pannakikamalala, panangasawa ti dua, kinaulpit wenno panangpangta iti biag ti asawa, itentennag ti Partido ti nadagsen a pannusa, karaman ti panagpadisi iti nagbasul iti organisasyon.

Sigsiguradoen dagiti kolektiba ti agassawa nga agdibdiborsyo a maikkan dagiti annak da ti moral, emosyonal, sikolohikal ken pinansyal a suporta—basar kadagiti agraraira a patakaran.

Kas rebolusyonaryo, pangig-iggeman dagiti agassawa a nagsina ti panagayat iti dasig uray nawaswasen ti ayat iti nagbaetan da. Tumaktakder da kas modelo bayat nga agtultuloy iti panagtignay ken panagpetpet kadagiti rebbengen da iti Partido ken rebolusyon. Dagiti nauuneg nga aksyon a pangdisiplina ket tartarabayan ti Partido tapno naan-anay a makapaglinteg ken makapagmuli-iti-bagi.