Kadagiti komunidad iti lawlaw dagiti base militar ti US, wenno tinudingan nga “EDCA site” ken kadagiti nagirussuatan iti Balikatan 2024 ket nasaknap iti panangbaybay-a, disimpormasyon ken pananglipit iti reaksyunaryo a gobyerno ken militar iti US. Daytoy ti kongklusyon iti maysa a fact-finding mission nga inrussuat ti Bayan-USA ken PINAS Peace Mission idiay Central Luzon, Ilocos Norte ken Marawi City. Inpablaak da iti publiko iti resulta ti 3-lawas nga imbestigasyon idi Hunyo 12.

Karaman kadagiti natakuatan ti delegasyon ti panangigabsuon ti US iti mapatta-patta a ramit-militar iti ruar dagiti naikeddeng nga “EDCA site” ken pananggundaway dagiti soldado nga Amerikano kadagiti rekurso iti masa a Cagayano; kinnumplot dagiti pribado a kompanya ken militar; kinaawan panangipakaammo kadagiti komunidad idiay Ilocos ken Cagayan nu sadinno a naiyaramid ti Balikatan a nagresulta iti troma ken riribuk kadagiti sibilyan a populasyon; ken militarisasyon, pananglipit ken Red-tagging kadagiti komunidad a mangsalsalaknib laeng iti pagbiagan da. Idiay Marawi City, inbingay dagiti lokal nga opisyal ti disimpormasyon kanaig iti maitaktakder a base militar ken “economic zone” nga asideg iti “ground zero” usar ti pondo ti EDCA.

Kuna ti delegasyon, amin dagitoy ket pangta iti wayawaya dagiti Pilipino, ken rumbeng a pasungbaten ti rehimen Marcos, kasta met ti gobyerno ti US iti sidong ni Joseph Biden, iti dangran nga intunda iti militarismo na kadagiti karirigatan a sektor.