Protesta kontra-henosidyo kadagiti Palestino. Nagprotesta idi Hunyo 8 ti naduma-duma a grupo ken sektor iti embahada ti Israel idiay Taguig City tapno tubngaren ti Zionista nga estado na iti agtultuloy nga henosidyo kadagiti Palestino. Linagip da ti maika-8 bulan, manipud Oktubre 7, 2023, iti panangraut ken panangbomba ti Israel iti suporta ti US, idiay Gaza. Iti rekord idi Hunyo 17, dimmanonen iti 37,347 ti pinapatay ti Israel idiay Gaza.

“Trespass rule” ti China idiay WPS, natubngar. Nagprotesta iti sango ti konsulado ti China idiay Makati City dagiti mangngalap ken dadduma pay a demokratiko nga organisasyon idi Hunyo 14 tapno ipanawagan ti panangikkat iti “trespass rule” wenno pangta a panangtiliw ti China kadagiti “gangannaet” a sumrek iti “teritoryo” na idiay South China Sea. Inpatungpal daytoy iti Chinese Coast Guard manipud Hunyo 15. Segun iti mandar, ipabalud ti China dagiti matiliw da manipud 30 inggana 60 aldaw.

Karaban kontra dadakkel a minas idiay Benguet. Ginasut a residente iti Itogon, Benguet ti nangirussuat iti karaban idi Hunyo 13 agturong idiay Benguet Provincial Capitol tapno irupir ti panangpasardeng iti panagpalawa dagiti dadakkel a kompanya iti minas nga Itogon-Suyoc Resources, Inc. ken Benguet Corporation, Inc.

Protesta kontra-demolisyon idiay Quezon City ken Mandaue City. Nangirussuat iti protesta dagiti residente iti King Christian St idiay Barangay Bagbag, Novaliches, Quezon City idi Hunyo 15 tapno supiaten ti demolisyon iti komunidad da. Nagprotesta met laeng idi Hunyo 14 dagiti marigrigat a residente iti uneg ti Cebu International Convention Center laban iti plano a demolisyon kadagiti balbalay da idiay Mandaue City, Cebu.

Jeepney phaseout, parigat. Nagprotesta manen dagiti drayber ken opereytor ti dyip idi Hunyo 10, kagiddan ti pangta ti LTFRB ken LTO a pairtingen da ti panangtiliw kadagiti agbibyahe a dyip a saan a pimmauneg iti inkapilitan a konsolidasyon. Nagprotesta met ti ginasut a drayber idiay Metro Manila ken Iloilo City. Kabayatan na, nangirussuat met ti Manibela ti tallo aldaw a sardeng-pasada idi Hunyo 10 inggana Hunyo 12. Nagmartsa idi Hunyo 7 agturong Mendiola dagiti kameng iti Piston kas panagrambak iti maika-43 anibersaryo ti pederasyon. Iruprupir da iti rehimen Marcos nga ibasura ti PUVMP a mangpatpatay iti pagbiagan da.