Nagbulos-bulos man sang henerasyon sang masang mangunguma sa Samar, indi mahubas ang ila suporta sa Bagong Hukbong Bayan (BHB). Ini ang mensahe sang rebolusyonaryong masa sa prubinsya sang may yara sang higayon nga liwat makigsalamuha ang BHB matapos ang pila ka panahon nga pagka-utod sang angot.

“Ginpadako kami nga mag-ulutod sang amon mga ginikanan nga may mataas nga pagrespeto sa mga kaupod,” pahayag ni Ka Amboy sa isa ka simple pero mahinungdanon nga kahiwatan sa ika-55 nga anibersaryo sang BHB sadtong Marso 29. Bisan indi siya pamilyar sa kalabanan sa bag-o nga mga hangaway nga nag-abot sa ila, wala siya namag-uhan kag gilayon niya nga nahamut-an ang mga kaupod. “Nadumduman ko ang ginhambal sang akon nga amay, nga bisan diin kami makalab-ot kag makakita kami sang NPA, aton ina, tungod ang ila ginapakigbato ang para sa pareho naton nga mga imol.”

Masami nga ginapahanumduman ni Ka Amboy ang ila mga kabaryo nga naangkon nila ang mga kadalag-an sa palangabuhian kag ginagmay nga nga bugay halin sa gubyerno tungod sa rebolusyonaryong kahublagan. Lubos pagsalig nila nga madamo pa sa gihapon ang nagakilala, nagapalangga kag nagadampig sa BHB sa ila nga baryo tungod diri.

Nagapasalamat man ang isa pa ka mangunguma sa mga hangaway, nga kalabanan mga pamatan-on. “Ginapadayon ninyo ang paghimakas nga ginpanghimatyan sang akon utod,” pahayag ni Ka Ambon. Namartir sa isa ka inaway ang ila nga utod sadtong 1987. Gusto man kuntani niya nga magpultaym apang madamo siya sang gagmay nga mga kabataan sadto. “Subong, indi na ako makasarang tungod tigulang na ako kag may rayuma na,” saysay niya. “Nagapasalamat ako sa inyo tungod nagapadayon kamo. Indi man ko maka-upod sa inyo, bisan ano nga oras nga kinahanglan niyo ko, magabulig ako kag ang akon nga pamilya.” Bukas man siya nga suportahan kung mahitabo nga magpatapo sa hukbo sang banwa ang sin-o man sa iya mga apo.

Ginpalab-ot sang tagabaryo ang ila nga pagpasalamat sa pagbulig sang BHB sa ila mga ulumhan. “Bisan wala kami didto, bisan wala kami nakahibalo, padayon kamo nga nagabulig sa amon sa uma,” base naman kay Ka Huling. “Salamat gid nga madamo sa inyo. Sa matuod lang, diri ko sa inyo nabatyagan ang matuod nga kalipay sang pag-alagad. Amo nga matuod nga malipayon ako kung upod ko kamo. Palangga gid namon kamo.”

Pagbahin sang masa, dyutay lang sila napapati sang militar nga wala na sang hukbo sang banwa sa ila nga lugar tungod nga madugay-dugay na nga panahon nga wala sila nakadtuan sang yunit sang BHB. “Amo nga sang nakabalita kami nga may mga kaupod, nabuhian kami sang buot,” sandig kay Ka Bining, isa sa mga nagtambong sa pagtililipon. Apang panaysayon niya, naghalong man sila kag basi mga nagapakuno-kuno lang nga mga bag-uhan nga Pulang hangaway. Nahim-us man ang iya buot sang nakasalamuha niya ang mga hangaway.

“Husto ako nga indi kasan-o man pwede nga madula ang NPA basta wala pa kita nagdaog,” tuad niya.

Ginsaysay niya nga indi niya kasan-o man luiban ang mga kaupod. “Wala ako nagbag-o, bisan nagdugay diri ang kaaway, wala ako nagsungka,” hambal niya. “Ang nahibal-an ko, sa akon lang, tubtob subong napabilin ko ang mga sikreto.”

Magluwas sa maundanon nga mga tinaga, naghalad sang kanta kag iban nga pangkultura nga pasundayag ang masa, nga lubos nga ginkalingawan kag nakapagpataas sang moral sa mga kaupod. Nagpasalamat man ang mga kaupod sa maisog kag mainit nga pagdawat sa ila sang mga residente kag ang pagsikreto sa ila presensya kag hulag sa mata sang militar. Samtang nag-ululupod ang masa kag hukbo sa amo nga lugar, indi magnubo sa 40 ka kolum ang naga-operasyon nga militar sa mga barangay nga sakop sang mga banwa sang San Jose de Buan, Gandara, San Jorge, Catbalogan, Motiong, Jiabong kag Paranas sa Samar kag sa mga baryo sang Can-avid kag Dolores sa Eastern Samar. Yara sa 80 ka baryo ang napaidalom sa mga operasyon nga RCSP.

Sa amo nga pagtililipon, kolektibo nga ginpabakod sang mga Pulang kumander, hangaway kag rebolusyonaryong masa ang ila nga dedikasyon kag kabubut-on nga isulong ang rebolusyonaryo nga paghimakas. Armado sang mga leksyon sa nagliligad, determinado sila nga panginbabawan ang natumod nga mga kahuyangan kag himuon ang tanan nga pagtinguha para magsabat sa panawagan nga pakalayuhon ang armado nga paghimakas kag magsulong nga may tuman nga kusog.