Koresponsal Inton kaanoman, saan a maatianan ti suporta ti masa iti rebolusyon idiay Samar
![](https://philippinerevolution.nu/wp-content/themes/prwc/images/ablogo.png)
![]( https://philippinerevolution.nu/wp-content/uploads/2024/06/20240621.samar-masses-support-npa-1024x1024.jpg )
Agsisinnukat man ti henerasyon iti masa a mannalon idiay Samar, saan a maatianan ti suporta da iti New People’s Army (NPA). Daytoy ti mensahe ti rebolusyonaryo a masa iti probinsya idi maaddaan ti gundaway a makapulapol da manen ti NPA kalpasan ti mano a panawen a pannakaputed ti silpo kadakuada.
“Pinadakkel dakami dagiti nagannak mi a nangato ti panagrespeto mi kadagiti kakadua,” inyebkas ni Ka Amboy iti maysa a simple ngem napnuan-kaipapanan a panagrambak iti maika-55 anibersaryo iti NPA idi Marso 29. Numanpay saan isuna a pamilyar kadagiti barbaro a mannakigubat a simmangpet idiay ayan da, saan isuna a naikawa ken dagus a naipasig ti rikna na kadagiti kakadua. “Malagip ko ti inbaga ni tatang ko, nga uray sadinno ti papanan mi ken makakita kami ti NPA, kadua tayo dagita, gapu ta ti ilablaban da ket para iti kas kadatayo a marigrigat.”
Kanayon a palpalagipan ni Ka Amboy dagiti kalugaran na a magun-od da laeng ti balligi iti pagbiagan ken sangkabassit a parabur manipud iti gobyerno gapu iti rebolusyonaryo a tignay. Sitatalek da nga ibagbaga nga adu pay latta ti mangayat, mangipatpateg ken kumankanunong iti NPA iti baryo da gapu iti dayta.
Nagyaman met ti maysa pay a mannalon kadagiti mannakigubat, a kaadduan ket kabataan. “Itultuloy yo ti pannakidangadang a nakátayan iti kabsat ko,” rakurak ni Ka Ambon. Nagmartir ti kabsat na iti maysa a labanan idi 1987. Kayat na koma met laeng idi nga agpultaym ngem adu ti annak na idi. “Itatta, saan ko metten a kabaelan gapu ta nataenganakon ken adda rayuma kon,” kunana. “Agyamyamanak kadakayo gapu ta nagtultuloy kayo. Saanak man makasurot kadakayo, uray ania nga oras a kasapulan dak ket tumulongak ken ti pamilyak.” Sisasagana met laeng isuna a suportaran ti uray asinno kadagiti appoko na nu kas pangarigan sumampa da iti hukbong bayan.
Ipadpadanon ti bumaryo ti panagyaman da iti tulong ti NPA kadakuada kadagiti uma da. “Uray awan kami idiay, uray di mi ammo, agtultuloy kay’ latta a tumultulong kadakami idiay uma,” kuna met ni Ka Huling. “Agyaman kami a talaga kadakayo. Kinapudno na, kadakayo a nariknak ti pudno a ragsak ti panagserbi. Isu a naragsakak unay nu kadua dakayo. Ay-ayaten dakayo la unay.”
Panangibingay ti masa, gistayan da idin a namati iti militar nga awanen ti hukbong bayan iti lugar da gapu ta nakabaybayag a panawen a saan ida a napanan ti yunit ti NPA. “Isu nga idi nadamag mi nga adda dagiti kakadua, naungar ti pakinakem mi,” kuna ni Ka Bining, maysa kadagiti dimmar-ay iti taripnong. Ngem istorya na, nagannad da met laeng ta amangan nu agpampammarang laeng dagiti barbaro a dumap-aw a Nalabbaga a mannakigubat. Nalag-an met ti rikna na idi nakalangen na dagiti mannakigubat.
“Usto tay kunak nga intun kaanoman ket saan a mabalin a mapukaw ti NPA inggana saan tayo pay nga agballigi,” kunana.
Inistorya na a saan na pulos nga insagmak dagiti kakadua. “Saanak a nagbaliw, uray nagbayag ditoy ti kabusor, saanak a nagsurender,” kunana. “Ti ammok, nu siak laeng, inggana ita ket napagtalinaed ko dagiti sikreto.”
Malaksid kadagiti naimpusoan a sarsarita, nangidaton ti masa ti kansion ken dadduma pay a pangkultura a presentasyon, a kaay-ayo ken nakapagpangato iti moral dagiti kakadua. Agyamyaman met laeng dagiti kakadua iti natured ken nabara a panagpasangbay kadakuada dagiti residente, ken panaglimed da iti presensya ken garaw iti mata ti militar. Bayat nga agkukuyog dagiti masa ken hukbo iti dayta a lugar, saan a bumaba iti 40 kolum ti agop-operasyon a militar kadagiti barangay a sakop dagiti ili ti San Jose de Buan, Gandara, San Jorge, Catbalogan, Motiong, Jiabong ken Paranas iti Samar, ken dagiti baryo iti Can-avid ken Dolores iti Eastern Samar. Nakapauneg iti RCSP ti 80 baryo.
Iti dayta a panagtatabuno, kolektibo a pinatibker dagiti Nalabbaga a kumander, mannakigubat ken rebolusyonaryo a masa ti dedikasyon da ken pangngeddeng nga idur-as ti rebolusyonaryo a pannakidangadang. Naarmasan kadagiti adal iti napalabas, determinado da a rimbawan dagiti naitudo a kakapuyan ken aramiden ti amin tapno gun-oden ti panawagan a pagapoyen ti armado a pannakidangadang ken napigpigsa nga umabante.