Koresponsal Kahublagan panadlong sa Negros sa tunga sang grabe nga operasyon militar
![](https://philippinerevolution.nu/wp-content/themes/prwc/images/ablogo.png)
![]( https://philippinerevolution.nu/wp-content/uploads/2024/06/20240621.negros-kilusang-pagwawasto-1024x738.jpg )
Sa tunga sang padayon nga terorismo kag pasista nga pagpanumpo sa Negros, pursigido nga ginpatuman sang mga kadre kag katapo sang Partido sa isla ang panawagan sang Komite Sentral sadtong Disyembre 2023 nga isulong ang kahublagan panadlong.
Gingamit sini nga praktikal nga sulundan ang Rebolusyon, pamantalaan nga teoritikal sang Partido Komunista ng Pilipinas, kag ang mga sinulat ni Jose Maria Sison sang pagtililipon, sinapol, pagtasa, pagtuki kag pagsumada sang mga kaangot nga rebolusyonaryong hilikuton sa tanan nga mga larangan gerilya sa isla. Nangin positibo ang resulta sini sa bug-os nga rebolusyonaryong kahublagan sa Negros. Napadasig ang paghiliusa sa pagtumod sa mga kahuyangan halin sa kolektibo nga pagtuki sa praktikal nga mga hambalanon kag rebolusyonaryong hilikuton, ilabi na sa mga kahuyangan sa armado nga paghimakas nga nagtuga sang negatibo nga epekto sa pangkabilogan nga pagsulong.
Sa una nga kwarto sang 2024, ginrepaso sang Partido sa Negros ang 22 ka tuig nga komprehensibo nga pagsumada sang rebolusyonaryong inagihan sa rehiyon halin sang Ikaduhang Dungganon nga Kahublagan Panadlong tubtob tuig 2016. Nangin basehan ini para sa komprehensibo nga pagsumada sang Partido sa isla sa hilikuton ideolohiya, pulitika kag organisasyon sa tuig2017-2022, kag para tumuron kag tadlungon ang nagkalain-lain nga porma sang sayop kag kahuyangan.
Sa pagpatuman sang kahublagan panadlong, nagtalana sang mga responsable nga kadre sang Partido agud ibuylo ang kahublagan pagtuon. Bisan sa atubang sang grabe nga atake sang kaaway sa mga baseng gerilya, padayon ang paglunsar sang kolektibo nga pagtuon sang mga dokumento sang Partido sa una kag ikaduha nga kahublagan panadlong. Ilabi nga nangin pagsik ang mga pagtuon sa sulod sang mga yunit sang Bagong Hukbong Bayan tubtob sa lokal nga mga yunit sang Partido tungod sa aktibo nga partisipasyon sang mga tumuluon halin sa lamharon kag mas magulang nga kadre kag katapuan. Kolektibo nila nga gintun-an ang pahayag sang Komite Sentral kag Komiteng Panrehiyon sang Partido sa Isla sang Negros sa ika-55 ka tuig nga anibersaryo sang Partido.
Ginlunsar man ang konsentrado nga pagtuon sang mga aktibista kag bag-ong rekrut sa BHB sa Batayang Kurso ng Partido. Pagtuon sang Imperyalismo, ginhatagan tum-ok ang nagaluntad subong nga krisis nga nagbunga sa lapnagon nga gyera halin sa pagpanulsol sang imperyalistang US sa mga kaalyado sini nga pungsod ilabi na sa grabe nga bangigay sang US-China kag ang kongkreto nga epekto sini sa pumuluyong Pilipino. Magluwas diri, ginlunsar ang pagtasa sa isa ka tuig nga programa sang Partido sa tagsa ka larangan gerilya kag mga pagsaway kag pagsaway sa kaugalingon, samtang ginalunsar ang indibidwal nga pagtasa sa sulod sang BHB.
Base kay Ka Marga, “Sa pagrebolusyon, kinahanglan ang wala pagpang-alang-alang sa pagtuon sang mga sandigan nga prinsipyo kag wala kakapoy nga pagtuki sa obhetibo nga kahimtangan kag labaw sa tanan ang pagbrektru sa pagpabaskog sang taktikal nga opensiba para kuhaon ang mga armas halin sa kaaway.”
Base kay Ka Dayan, isa sa mga instruktor sa pagtuon , napasanag pa ang kinaalam niya sa mga sandigan nga prinsipyo sang Partido samtang nagahatag sang pagtuon. Samtang wala ginlauman ni Ka Victor, isa sa mga magulang nga kadre sang Partido halin sa IDKP, nga daw nagbalik tan-aw siya sa mga panghitabo sa kasaysayan sang Partido kag rebolusyon.
“Ginahangkat kita sang tuman kabaskog nga panahon kag kontradiksyon. Indi mahadlok. Ang matuod nga kahilwayan ang indi imahinasyon lang kundi maangkon ini sa pagpukaw, pag-organisa kag pagpahulag sa masa agud maghimakas!” tuad ni Ka Yan, isa sa lamharon nga kadre nga tumuluon.
Gintahasan sang Partido sa isla ang tanan nga yunit sang BHB nga magpursige sa hilikuton rekoberi, konsolidasyon kag pagpalapad. Kinahanglan lab-uton ang mga lugar nga madugay na nga wala nabalikan, ilabi na ang mga lugar nga wala pa nalab-ot. Gintahasan man ang mga komite sang Partido nga giyahan ang maukod nga pagsulong sang masa sa mga kontra-pyudal kag kontra-pasista nga kampanya sa kabukiran kag isugpon kag alsahon ini sa lebel sang kontra-imperyalista kag kontra-pasista nga kampanya sa kasyudaran agud lab-uton ang ila mga demokratiko nga interes.
Labaw sa tanan, dapat maglunsar sang madinalag-on nga taktikal nga opensiba kg makakuha sang mga armas sang pasista nga kaaway gamit ang husto nga taktika, teknika kag pamaagi sang inaway gerilya.