Taliwala sa walay hunong nga terorismo ug pasistang pagpanumpo sa Negros, pursigidong ginapatuman sa mga kadre ug myembro sa Partido sa isla ang panawagan sa Komite Sentral niadtong Disyembre 2023 nga iasdang ang kalihukang pagtul-id.

Gigamit niining praktikal nga reperensya ang Rebolusyon, teoretikanhong mantalaan sa Partido Komunista ng Pilipinas, ug ang mga sinulat ni Jose Maria Sison sa mga panagtapok, tigum, asesment, pagtuki ug pagsumada sa mga magkalambigit nga rebolusyonaryong gimbuhaton sa tanang mga gerilyang nataran sa isla. Nahimong positibo ang resulta niini sa tibuok rebolusyonaryong kalihukan sa Negros. Napapaspas ang paghiusa sa pag-ila sa mga kahuyangan gikan sa kolektibong pagtuki sa praktikal nga mga hisgutanan ug rebolusyonaryong gimbuhaton, ilabina sa mga kahuyangan sa armadong pakigbisog nga nagresulta og negatibong epekto sa pangkinatibuk-ang pag-abante.

Sa unang kwarto sa 2024, gitun-an balik sa Partido sa Negros ang 22 ka tuig nga kumprehensibong pagsumada sa rebolusyonaryong kasinatian sa rehiyon sukad sa Ikaduhang Bantugang Kalihukang Pagtul-id hangtud 2016. Nahimong sumbanan kini alang sa kumprehensibong pagsumada sa Partido sa isla sa gimbuhatong ideolohiya, pulitika ug organisasyon sa tuig 2017-2022, ug aron ilhon ug tul-iron ang lain-laing porma sa kasaypanan ug kahuyangan.

Sa pagpatuman sa kalihukang pagtul-id, nagtudlo og mga responsableng kadre sa Partido aron ibwelo ang kalihukang pagtuon. Bisan atubangan sa grabeng atake sa kaaway sa mga baseng gerilya, padayon ang paglunsad og kolektibong pagtuon sa mga dokumento sa Partido sa una ug ikaduhang kalihukang pagtul-id. Labaw nga nahimong lagsik ang mga pagtuon sulod sa mga yunit sa Bagong Hukbong Bayan hangtud sa lokal nga mga yunit sa Partido tungod sa aktibong partisipasyon sa mga magtutuon gikan sa batan-on ug tiguwang nga kadre ug myembro. Kolektibo nilang gitun-an ang pamahayag sa Komite Sentral ug Rehiyunal nga Komite sa Partido sa Isla sa Negros sa ika-55 nga anibersaryo sa Partido.

Gilunsad usab ang konsentradong pagtuon sa mga aktibista ug bag-ong rekrut sa BHB sa Batakang Kurso sa Partido. Sa pagtuon sa Imperyalismo, gihatagag duso ang kasamtangan krisis nga nagbunga sa kaylap nga gyera gikan sa pagpanulsol sa imperyalistang US sa mga kaalyadong nasud niini ilabina sa grabeng bangi sa US-China ug ang kongkretong epekto niini sa katawhang Pilipino. Gawas dinhi, gilunsad ang pag-ases sa usa ka tuig nga programa sa Partido sa matag natarang gerilya ug mga pagsaway ug pagsaway sa kaugalingon, samtang ginalunsad ang indibidwal nga pag-ases sulod sa BHB.

Matud ni Ka Marga, “sa pagrebolusyon, kinahanglang ang walay pagduhaduha sa pagtuon sa mga batakang prinsipyo ug walay kapuul nga pagtuki sa obhetibong kahimtang ug labaw sa tanan ang pagbrektru sa pagpakusog sa taktikal nga opensiba aron kumpiskahon ang mga armas gikan sa kaaway.”

Matud ni Ka Dayan, usa sa mga instruktor sa mga pagtuon, napatin-aw pa ang iyang kahibalo sa mga batakang prinsipyo sa Partido samtang naghatag og pagtuon. Samtang wala gidahum ni Ka Victor, usa sa mga edarang kadre sa Partido gikan sa IDKP, nga daw nagbalik-lantaw siya sa mga nahitabo sa kasaysayan sa Partido ug rebolusyon.

“Gihagit kita sa grabeng panahon ug kontradiksyon. Dili mahadlok. Ang tinuod nga kagawasan dili lang damgo kundili makab-ot kini sa pagpukaw, pag-organisa ug pagpalihok sa masa aron magrebolusyon!” matud ni Ka Yan, usa sa mga batan-ong kadreng magtutuon.

Gimandoan sa Partido sa isla ang tanang yunit sa BHB nga magpursige sa gimbuhatong rekoberi, konsolidasyon ug pagpalapad. Kinahanglang abton ang mga lugar nga dugay nang wala nabalikan, ilabina na ang mga lugar nga wala pa naabot. Gimandoan usab ang mga komite sa Partido nga giyahan ang madasigong pag-asdang sa masa sa mga kontra-pyudal ug kontra-pasistang kampanya sa kabanikanhan ug isumpay ug ito ipatas sa ang-ang sa kontra-imperyalista ug kontra-pasistang kampanya sa kasyudaran aron kab-uton ang ilang mga demokratikong interes.

Labaw sa tanan, kinahanglang maglunsad og malampusong mga taktikal nga opensiba ug makakumpiska og mga armas sa pasistang kaaway gamit ang hustong taktika, teknika ug pamaagi sa gerilya pakiggubat.