Subling mitataw ang isyu sa diborsyo dihang giaprubahan sa ubos nga katiguman sa Kongreso ang pagbalaod niini sa Pilipinas. Lahi sa annulment ug ligal nga pagbulag, ang ligal nga opsyon sa diborsyo mao ang paglusaw sa kasal, pagbalik sa istatus nga “single” sa magtiayon ug pagtugot kanila nga magpakasal sa uban.

Nahimo nang balaod sa tanang nasud sa tibuok kalibutan ang diborsyo, gawas sa Pilipinas ug Vatican City. Lapad nga naila ang diborsyo isip katungod sa kababayen-an aron makabaton og hustisya, ilabina sa mga kaso sa kabangis sulod panimalay, kasal sa bata ug pinansyal nga pagpangulipon. Ginahatagan niini ang kababayen-an og ligal nga opsyon aron mobiya sa madaugdaugon ug malupigong mga kaminyoan, pagbaton og independensyang pinansyal ug hagiton ang patriyarkal nga kahimtang kung asa ginatrato silang pagpanag-iya sa ilang mga bana.

Bisan wala nakasulat sa balaod, ang pagbulag sa Pilipinas usa ka kasagarang reyalidad o obhetibong kahimtang sa han-ay sa katawhan. Kini tungod nagatunhay ang kadunot sa katilingban nga nagamugna sa mga kundisyon sa pagbulag sa magtiayon.

Hingpit nga huyang, kundili man kataw-anan, ang mga argumento batok sa diborsyo. Dili babag sa daghang nasud ang relihiyon aron ilhon ang panginahanglan sa pagbalaod dinhi aron giyahan ang mga panagbulag ug siguruhon ang mga katungod ug kaayuhan sa tanang nalambigit.

Sulod sa rebolusyonayong kalihukan, giila ang diborsyo isip katungod ilalum sa mga lagda sa kasal. Langkub sa maong mga lagda ang mga relasyong lalaki ug babae, ug sa tali sa mga indibidwal nga adunay parehong-kasarian. Kini naggikan sa pag-ila sa diyalektikal nga materyalistang panglantaw nga nagabag-o ang mga butang, lakip ang relasyon sulod sa usa ka kasal. Pag-ila usab kini sa nagatunhay nga kamatuuran nga adunay madaugdaugon, dili patas ug abusadong mga kamiyoan, ingonman ang posibilidad nga mahanaw ang gugma ug pagsalig tali sa magtiayon.

Ginapabarog ug ginapalambo sa mga rebolusyonaryo ang relasyong manag-uyab ug magtiayon sa pundasyon sa class love (gugma sa hut-ong) ug sex love (gugma sa indibidwal). Ayha mosulod sa kasal, ginahangyo sa matag kauban nga hunahunaon ug seryosong pangandaman ang kinabuhi sa magtiayon ug rebolusyonayong pamilya. Kung mosangpot sa diborsyo, ginapaagi kini sa proseso kung asa ginapresenta ngadto sa mga yunit ang petisyon aron lusawon ang kasal, ug kolektibo kining ginatuki ug ginadesisyonan.

Ginauyunan ang diborsyo sa mga kasong adunay pagluib o pagka lunud-patay nga kontra-rebolusyonaryo sa usa sa magtiayon; pagtraydor, bigamiya, o pagpangdagmal o paghulga sa kinabuhi sa kaparis; Kapakyasang ipatuman ang mga responsibilidad isip asawa o bana sulod sa lima ka tuig tungod sa pagkadakop sa kaaway o permanenteng pisikal nga kabilinggan (kung pagauyunan sa magtiayon); kung usa sa magtiayon ang kabubut-ong mihawa sa iyang katungdanan sulod sa duha ka tuig o nawala sa linya og lima ka tuig; kung ang magtiayon adunay personal nga di pagkasinabtanay nga nagbunga sa pagkaguba sa relasyon, ug ang relasyon nahimong pabug-at na sa magtiayon ug sa gimbuhaton nila sa Partido.

Sa mga kaso sa bug-at nga kalapasan, sama sa grabeng pagluib sa asawa, pag-minyo og duha, kabangis o paghulga sa kinabuhi sa kaparis, ginapahamtang sa Partido ang bug-at nga silot, lakip ang pagpalagpot sa sad-an sa organisasyon.

Ginasiguro sa mga kolektiba sa magtiayong nagdiborsyo nga mahatagan ang ilang mga anak og suportang moral, emosyunal, sikolohikal ug pinansyal—sigon sa nagatunhay nga mga palisiya.

Isip mga rebolusyonaryo, ginahuptan sa mga magtiayong nagbulag ang gugma sa hut-ong bisan lusaw na ang gugma tali nila. Nagabarog silang mga modelo samtang nagpadayon sa paglihok ug paghupot sa ilang mga tahas sa Partido ug rebolusyon. Ang mga nakapailalum sa aksyong pangdisiplina ginagiyahan sa Partido aron manglimbasog nga magtul-id ug magremolda sa kaugalingon.