Protesta kontra-henosidyo sa mga Palestino. Nagprotesta niadtong Hunyo 8 ang lain-laing grupo ug sektor sa embahada sa Israel sa Taguig City aron makmakon ang Zionistang estado sa nagpadayong henosidyo niini sa mga Palestino. Gidumdum nila ang ika-8 ka bulan, gikan Oktubre 7, 2023, sa pag-atake ug pagpamomba sa Israel, sa suporta sa US, sa Gaza. Sa rekord niadtong Hunyo 17, miabot na sa 37,347 ang gipatay sa Israel sa Gaza.

“Trespass rule” sa China sa WPS, gimakmak. Nagprotesta atubangan sa konsulado sa China sa Makati City ang mga mangingisda ug uban pang demokratikong organisasyon niadtong Hunyo 14 aron ipanawagan ang pagtangtang sa “tresspass rule” o hulgang pagdakop sa China sa mga “langyawng” mosulod sa “teritoryo” niini sa South China Sea. Gipahamtang kini sa Chinese Coast Guard gikan Hunyo 15. Matud sa mando, idetine sa China ang mga maaresto gikan 30 hangtud 60 ka adlaw.

Karaban batok sa dagkung mina sa Benguet. Gatusan ka mga residente sa Itogon, Benguet ang nagkaraban niadtong Hunyo 13 padulong sa Benguet Provincial Capitol aron iduso ang pagpahunong sa pagpalapad sa dagkung kumpanya sa mina nga Itogon-Suyoc Resources, Inc. ug Benguet Corporation, Inc.

Protesta kontra-demolisyon sa Quezon City ug Mandaue City. Naglunsad og protesta ang mga residente sa King Christian St sa Barangay Bagbag, Novaliches, Quezon City niadtong Hunyo 15 aron babagan ang demolisyon sa ilang komunidad. Nagprotesta usab niadtong Hunyo 14 ang mga kabus nga residente sulod sa Cebu International Convention Center batok sa planong demolisyon sa ilang kabalayan sa Mandaue City, Cebu.

Jeepney phaseout, paantus. Subling nagprotesta ang mga drayber ug opereytor sa dyip niadtong Hunyo 10, kadungan sa hulga sa LTFRB ug LTO nga pakusgon niini ang pagpangdakop sa mibyaheng mga dyip nga wala nagpahisakop sa pugos nga konsolidasyon. Nagprotesta sa Metro Manila ug Iloilo City ang gatusan ka mga drayber. Samtang, naglunsad og tulo ka adlaw nga hunong-pasada ang Manibela niadtong Hunyo 10 hangtud Hunyo 12. Nagmartsa niadtong Hunyo 7 padulong sa Mendiola ang mga myembro sa Piston isip pagsaulog sa ika-43 anibersaryo sa pederasyon. Giduso nila sa rehimeng Marcos nga ibasura ang PUVMP nga mipatay sa ilang panginabuhian.