Mga protesta
![](https://philippinerevolution.nu/wp-content/themes/prwc/images/ablogo.png)
![]( https://philippinerevolution.nu/wp-content/uploads/2021/11/protest-icon-1024x745.png )
Protesta kontra-henosidyo sa mga Palestino. Nagprotesta sadtong Hunyo 8 ang nagkalain-lain nga grupo kag sektor sa embahada sang Israel sa Taguig City para sawayon ang Zionistang estado sini sa nagapadayon nga henosiyo sa mga Palestino. Gindumdom nila ang ika-8 ka bulan, halin Oktobre 7, 2023, sang pag-atake kag pagpamomba sang Israel, sa suporta sang US, sa Gaza. Sa lista sadtong Hunyo 17, naglab-ot sa 37,347 ang ginpatay sang Israel sa Gaza.
“Trespass rule” sang China sa WPS, ginsaway. Nagprotesta sa atubang sang konsulado sang China sa Makati City ang mga mangingisda kag iban pa nga demokratiko nga organisasyon sadtong Hunyo 14 para ipanawagan ang pagpakakas sa “trespass rule” ukon paandam sa pagdakop sang China sa mga “dumuluong” nga magasulod sa “teritoryo” sini sa South China Sea. Ginpatuman ini sang Chinese Coast Guard sugod sang Hunyo 15. Base sa kasuguan, igadetine sang China ang mga maaresto halin 30 tubtob 60 ka adlaw.
Karaban kontra dalagko nga mina sa Benguet. Ginatos ka mga residente sang Itogon, Benguet ang naglunsar sang karaban sadtong Hunyo 13 padulong sa Benguet Provincial Capitol para iduso ang pagpauntat sa pagpalapad sang dalagko nga kumpanya sa mina nga Itogon-Suyoc Resources, Inc. kag Benguet Corporation, Inc.
Protesta kontra-demolisyon sa Quezon City kag Mandaue City. Naglunsar sang protesta ang mga residente sang King Christian St sa Barangay Bagbag, Novaliches, Quezon City sadtong Hunyo 15 para pamatukan ang demolisyon sa ila nga komunidad. Nagprotesta man sadtong Hunyo 14 ang mga imol nga residente sa sulod sang Cebu International Convention Center batuk sa nagahana nga demolisyon sa ila nga kabalayan sa Mandaue City, Cebu.
Jeepney phaseout, paantus. Liwat nga nagprotesta ang mga drayber kag opereytor sang dyip sadtong Hunyo 10, kadungan sang pagpamahog sang LTFRB kag LTO nga pasingkion sini ang pagpangdakop sa nagabyahe nga mga dyip nga wala nagpasakop sa sapilitan nga konsolidasyon. Nagtigayon sang mga protesta sa Metro Manila kag Iloilo City ang ginatos ka mga drayber. Samtang, naglunsar naman sang tatlo ka adlaw nga untat-byahe ang Manibela sadtong Hunyo 10 tubtob 12. Nagmartsa sadtong Hunyo 7 padulong Mendiola ang mga miyembro sang Piston isip kahiwatan sa ika-43 nga anibersaryo sang pederasyon . Ginduso nila sa rehimen Marcos nga ibasura ang PUVMP nga nagapatay sa ila nga palangabuhian.