Koresponsal Tignay panagilinteg idiay Negros iti tengnga ti nairteng nga operasyon militar
![](https://philippinerevolution.nu/wp-content/themes/prwc/images/ablogo.png)
![]( https://philippinerevolution.nu/wp-content/uploads/2024/06/20240621.negros-kilusang-pagwawasto-1024x738.jpg )
Iti sango ti awan-ressat a terorismo ken pasista a pananglapped idiay Negros, sigagaed nga ipatpatungpal dagiti kadre ken kameng ti Partido iti isla ti panawagan ti Komite Sentral idi Disyembre 2023 nga itandudo ti tignay panagilinteg.
Inaramat da ti Rebolusyon, teoretikal a pagiwarnak ti Partido Komunista iti Pilipinas, kas praktikal a tarabay, ken dagiti insursurat ni Jose Maria Sison, kadagiti taripnong, miting, panagtasa, panagamiris ken panaglagom kadagiti agsisilpo a rebolusyonaryo a trabaho kadagiti amin a larangan gerilya iti isla. Nagbalin a positibo ti resulta daytoy iti sibubukel a rebolusyonaryo a tignay idiay Negros. Napapartak na ti resulta iti panangitudo kadagiti kakapuyan manipud iti kolektibo a panagamiris kadagiti praktikal nga usapin ken rebolusyonaryo a trabaho, nangruna dagiti kakapuyan iti armado a pannakidangadang a nagresulta iti negatibo nga epekto iti kabuklan a panagdur-as.
Iti umuna a kwarto ti 2024, sinublian ti Partido iti Negros ti 22-tawen a komprehensibo a panaglagom kadagiti rebolusyonaryo a kapadasan iti rehiyon manipud pay Maikadua a Naindaklan a Tignay Panagilinteg (MNTP) inggana tawen 2016. Nagbalin daytoy a basaran para iti komprehensibo a panaglagom ti Partido iti isla iti trabaho iti ideolohiya, pulitika, ken organisasyon iti tawen 2017-2022, ken tapno itudó ken ilinteg ti nadumaduma a porma iti nagbiddutan ken kakapuyan.
Iti panangipatungpal iti tignay panagilinteg, nangituding kadagiti responsable a kadre iti Partido tapno ibuelo ti tignay panagadal. Uray iti sango ti nairteng nga atake ti kabusor kadagiti base a gerilya, agtultuloy ti panangirussuat kadagiti kolektibo a panagadal kadagiti dokumento ti Partido iti umuna ken maikadua a tignay panagilinteg. Ad-adda a rimmegta dagiti panagadal kadagiti yunit ti New People’s Army inggana kadagiti lokal nga yunit ti Partido gapu iti aktibo a partisipasyon dagiti agad-adal manipud kadagiti agkakabanwag ken natataengan a kadre ken kasapian. Kolektibo da a nagadalan ti pablaak ti Komite Sentral ken Komiteng Rehiyon ti Partido iti Isla ti Negros iti maika-55 tawen nga anibersaryo ti Partido.
Nairussuat met laeng ti konsentrado a panagadal dagiti aktibista ken barbaro a rekrut ti NPA iti Basaran a Kurso ti Partido. Iti panagadal iti Imperyalismo, natalmegan ti agdama a krisis a nagresulta iti nasaknap a gerra manipud iti panangisungsong ti imperyalista a US kadagiti kaalyado na a pagilian nangruna iti nakaro a risiris ti US-China, ken ti kongkreto nga epekto na kadagiti umili a Pilipino. Malaksid dita, inrussuat ti tunggal larangan gerilya ti panagtasa iti maysa tawen a programa ti Partido ken panagdillaw ken panagdillaw-iti-bagi, bayat nga irusrussuat ti indibidual a panagtasa iti uneg ti NPA.
Segun kenni Ka Marga, “Iti panagrebolusyon, kasapulan ti awan-panagdudua iti panagadal kadagiti basaran a prinsipyo ken awan-babannogan a panagamiris iti obhetibo a kasasaad, kangrunaan iti amin, ti panagbrektru iti panangpapigsa iti taktikal nga opensiba tapno samsamen dagiti armas manipud iti kabusor.”
Segun kenni Ka Dayan, maysa kadagiti instruktor iti panagadal, limmatak pay ti kaammoan na kadagiti basaran a prinsipyo ti Partido bayat a mangmangted ti innadal. Saan met a ninamnama ni Ka Victor, maysa kadagiti nabaybayag a kadre iti Partido manipud iti MNTP, a kasla subsublian na dagiti paspasamak iti pakasaritaan ti Partido ken rebolusyon.
“Karkariten da tayo iti nakaro unay a panawen ken kontradiksyon. Saan nga agbuteng. Ti pudno a wayawaya ket saan a parnuay ti panunot nu di ket magun-od babaen iti panangriing, panang-organisa ken panangpatignay iti masa tapno agbaringkuas!” kuna ni Ka Yan, maysa kadagiti naub-ubing a kadre a nagadal.
Minandaran ti Partido iti isla ti amin a yunit ti NPA nga agpursige iti trabaho a rekoberi, konsolidasyon ken panagpalawa. Kasapulan a gaw-aten dagiti lugar a nabayagen a saan a nasublian, nangruna dagiti lugar a saan pay a nadanon. Namandaran met laeng dagiti komite ti Partido a tarabayan ti napinget a panagabante dagiti masa kadagiti kontra-pyudal ken kontra-pasista a kampanya iti kaaw-awayan, ken isilpo ken ingato daytoy iti tukad ti kontra-imperyalista ken kontra-pasista a kampanya iti syudad tapno gun-oden dagiti demokratiko nga interes da.
Kangrunaan iti amin, nasken nga agirussuat kadagiti naballigi a taktikal nga opensiba ken makasamsam kadagiti armas iti pasista a kabusor babaen ti umno a taktika, teknika ken pamuspusan iti gerilya a pannakidangadang.